Teuteu ki he Temipalé he ‘Aho Kotoa Pē
Ko e taimi naʻá ku taʻu hiva aí, naʻe ʻi ai haʻaku faiako Palaimeli lelei naʻe ui ko Sisitā Kola. Na‘á ku mā ʻaupito, ka naʻe angalelei pea naʻá ku saiʻia ke nofo mo ia. Naʻá ne tufa mai kiate kimautolu takitaha ʻi ha ʻaho ʻe taha ha laʻi pepa. Naʻa mau hiki kotoa ai e meʻa naʻa mau fie fai ʻi haʻamau lalahi hake. Naʻá ku hiki: “Hū ki he ʻunivēsití mo mali ʻi he temipalé.” Naʻá ku fakapipiki ʻeku laʻi pepá ʻi ʻolunga he matapā hoku tautauʻanga valá. Naʻe hū mai ʻa e huelo ʻo e maama halá ʻi he taimi poʻulí ʻi hoku matapā sioʻatá. Na‘á ku sio hake ki heʻeku laʻi pepá. Naʻá ne fakamanatu mai naʻá ku fie ʻalu ki he temipalé.
ʻI he taimi ko iá, naʻe temipale pē ʻe 12 he māmaní. Naʻá ku fie ʻalu ki he temipale kotoa pē.
Ko e taimi pē ne palani ai heʻeku faʻeé mo ʻeku tamaí ha mālōlō ʻeveʻeva, naʻá na ʻave maʻu pē homau fāmilí ki he temipalé. Naʻa mau nofo ʻi ʻOlikoni, USA. Ko e temipale ofi tahá naʻe maile ʻe 600 (kilomita ʻe 965) ʻi Kātisitoni, ʻAlapeta, Kānata. Na‘e ʻikai ke ʻi ai ha ʻea fakamokomoko ʻi heʻemau kaá. Naʻá ku tangutu mo hoku tokouá mo hoku tuofefiné ʻi he nofoʻanga muí. Naʻa mau tautau ha konga tupenu viviku ʻi he tuʻa matapā sioʻata ʻo e kaá. Pea mau tautau ia ʻi homau kiá ke mokomoko.
Ko ha meʻa fakafiefia ke faifai pea mau sio ki he temipalé. Naʻe ʻikai ke fuʻu lahi haʻaku ʻilo ki he meʻa naʻe hoko aí, ka naʻe fiefia maʻu pē ʻeku ongomātuʻá he taimi naʻá na hū mai aí. Na‘á ku ʻilo‘i naʻe fu‘u mahuʻinga ‘a e temipalé. Na‘á ku ʻilo ko e fale ia ‘o e ʻEikí. (Ko au ʻoku tui sote hina ʻi he taá.)
Hili e hoko hoku taʻu 12, naʻá ku fakahoko leva ʻa e papitaiso he temipalé ʻi ha ngaahi temipale. Pea ʻi he taimi ne u fetaulaki ai mo hoku husepāniti ki he kahaʻú, naʻá ku ʻilo naʻe manako mo ia ʻi he temipalé foki! Na‘á ma mali ʻi he Temipale Manitai ‘Iutaá.
Te ke lava ʻo teuteu ki he temipalé ʻi he ʻaho kotoa pē. ‘Alu ki he temipalé ʻi he taimi te ke lavá. Ala ki hono holisí. ‘I he taimi na‘e 11 ai hoku mokopuna tangata ko Sēletí. Naʻá ne ngāue ʻi he hisitōlia fakafāmilí he Sāpate kotoa mo ʻene tangataʻeikí. Naʻá ne ma‘u ha ngaahi hingoa ʻe 200 tupu ʻo e ngaahi kuí. ʻI heʻene hoko ko ʻeni ʻo taʻu 12 lahi, ʻokú ne ʻi he fakahoko e papitaiso ʻi he temipalé maʻá e ngaahi kui ko ʻení!
Ko e taimi ʻokú ke ʻi he temipalé aí, te ke lava ʻo ʻaʻeva ʻi he feituʻu ʻoku ʻaʻeva ai ʻa Sīsuú. Ko Hono fale ia. ‘Oku ou fakatauange te ke lotu he ʻaho kotoa ke tokoni atu ʻa e Tamai Hēvaní ke ke teuteu ke hū ki he temipalé mo ongoʻi ʻEne ʻofá.