Kae ʻOua Ke Tau Toe Fakataha Mai
Ko e Mālohi ʻo e ʻOtuá
Mei ha malanga konifelenisi lahi naʻe ui “Ko e Tokāteline ʻo e Lakanga Fakataulaʻeikí,” Ensign, Mē 1982, 32–34; naʻe fakalelei‘i ʻa e fakamata‘itohi lahí.
Ko e tuí ko e mālohi pea ko e mālohí ko e lakanga fakataulaʻeikí ia.
Ko e Kolo ko Saione kuo Liliú, tā ‘e Del Parson
ʻOku ʻOtua ʻa e ʻOtuá koeʻuhí he ko e kānokato ia ʻo e tui mo e mālohi kotoa pea mo e lakanga fakataulaʻeiki kotoa pē. ʻOku ui ʻa e moʻui ʻokú Ne ʻi aí ko e moʻui taʻengata.
Pea ko e tuʻunga lahi ʻo ʻetau hoko ʻo tatau mo Iá ko e lahi ia ʻo e tui ʻoku tau maʻu kiate Iá, mo e maʻu Hono mālohí, pea mo e fakaʻaongaʻi Hono lakanga fakataulaʻeikí. Pea ko e taimi kuo tau hoko ai ʻo hangē kakato mo moʻoni ko Iá, ʻe maʻu ʻe kitautolu foki ‘a e moʻui taʻengatá.
ʻOku fetākinima ʻa e tuí mo e lakanga fakataulaʻeikí. Ko e tuí ko e mālohi pea ko e mālohí ko e lakanga fakataulaʻeikí ia. ʻOku tau maʻu ʻa e lakanga fakataulaʻeikí ʻi he hili ʻetau maʻu ʻa e tuí. Pea ʻi he lakanga fakataulaʻeikí, ʻoku tau tupulaki ʻi he tui kae ʻoua kuo tau hoko ʻo tatau mo hotau ʻEikí, ʻo maʻu ʻa e mālohi kotoa pē.
ʻOku vaheʻi hotau taimi ʻi heni he moʻui fakamatelié ko ha taimi ʻo e vakaiʻi mo e siviʻi. Ko hotau faingamālie ke fakahaohaoaʻi ʻetau tuí mo tupulaki ʻi he mālohi ʻo e lakanga fakataulaʻeikí he lolotonga ʻetau ʻi hení. …
Na‘e fai ʻe he lakanga fakataula‘eiki māʻoni‘oní ha meʻa lahi ange ke fakahaohaoaʻi ʻa e kakaí ʻi he kuonga ʻo ʻĪnoké ʻo laka ange ʻi ha toe taimi. Naʻe ʻiloa he taimi ko iá ko e lakanga ʻo ʻĪnoké (vakai, T&F 76:57), ko e mālohi ia naʻe liliu ai ia mo hono kakaí. Pea naʻe liliu kinautolu koeʻuhí naʻa nau maʻu ʻa e tuí mo fakaʻaongaʻi e mālohi ʻo e lakanga fakataulaʻeikí.
Naʻe fai ʻe he ʻEikí mo ʻĪnoke ha fuakava taʻengata ko e taha kotoa te ne maʻu ʻa e lakanga fakataulaʻeikí te nau maʻu ʻa e mālohi ʻi he tui, ke puleʻi mo mapuleʻi ʻa e meʻa kotoa ʻi he māmaní, ke fakafepakiʻi e kautau ʻa e ngaahi puleʻangá, pea mo tuʻu nāunauʻia mo hākeakiʻi ʻi he ʻao ʻo e ʻEikí.
Ko Melekisēteki ko ha tangata tui tatau, “pea ‘oku fakahoko ʻa e ma‘oniʻoni, ‘a hono kakai pea ne maʻu ‘a e langi, pea naʻe fekumi ki he kolo ‘o ʻInoké” (Liliu ‘a Siosefa Sámitá, Sēnesi 14:34). …
Ko e hā leva ʻa e tokāteline ‘o e lakanga fakataulaʻeikí? Pea ʻe founga fēfē ʻetau moʻui ko e kau tamaioʻeiki ʻa e ʻEikí?
Ko e tokāteline ko ‘ení ko e ʻOtua ko ʻetau Tamaí ʻoku nāunauʻia, haohaoa, pea mo ha taha kuo hakeakiʻi ʻokú Ne maʻu ʻa e mālohi, mo e pule kotoa, ʻokú Ne tokaimaʻananga ʻa e meʻa kotoa pea ʻoku taʻe fakangatangata hono ngaahi ʻulungāngá kotoa, pea ʻoku nofo ʻi ha ʻiuniti fakafāmili.
ʻOku maʻu heʻetau Tamai Taʻengatá ha tuʻunga māʻolunga ʻo e nāunau mo e haohaoa pea mo e mālohi koeʻuhí he ʻoku haohaoa ʻa ʻEne tuí mo taʻe fakangatangata Hono lakanga fakataulaʻeikí.
Ko e lakanga fakataulaʻeikí ʻa e hingoa totonu ʻo e mālohi ʻo e ʻOtuá, pea kapau ʻoku tau fie maʻu ke tatau mo Ia, kuo pau ke tau maʻu pea mo ngāueʻaki Hono lakanga fakataulaʻeikí pe mālohí ʻo hangē ko ʻEne fakaʻaongaʻí. …
Ko ia, ‘oku tau maʻu ‘a e mālohí, ʻi he tui, ke puleʻi mo mapuleʻi ʻa e meʻa kotoa, fakatuʻasino mo fakalaumālie fakatouʻosi; ke fakahoko ha ngaahi mana mo fakahaohaoaʻi ʻa e moʻuí; ke tuʻu ʻi he ʻao ʻo e ʻOtuá ʻo tatau mo Ia koeʻuhí he kuo tau maʻu ʻEne tuí, ʻEne haohaoá, pea mo hono mālohí, pe ʻi hono fakalea ʻe tahá, ʻa e kakato Hono lakanga fakataulaʻeikí.
Ko e tokāteline leva ʻeni ʻo e lakanga fakataulaʻeikí, ka ʻikai ia, he ʻikai ha meʻa ʻe lava ʻo toe maʻongoʻonga ange. Ko e mālohi ʻeni te tau lava ʻo maʻu tuʻunga ʻi he tuí mo e māʻoniʻoní …
ʻOku ʻi ai moʻoni ʻa e mālohi ʻi he lakanga fakataulaʻeikí—ko ha mālohi ʻoku tau feinga ke maʻu ke fakaʻaongaʻi, ko ha mālohi ʻoku tau lotua fakamātoato ke nofoʻia ʻiate kitautolu pea mo hotau hakó ʻo lauikuonga.