iVola Guilecavi, iVakadinadina Daunanumi

iVakatakilakila

girl in classroom

Dua na yabaki au a lalawataka me vakatorocaketaki na noqu vuli vakayalo. Au dau kauta mai na ivola ni Lotu, tikidua, kei na ivolanikalou ena veivanua, oka kina na koronivuli, niu via kania na vosa ni Kalou. Ia a malumu vakalailai na noqu sasaga niu sa osooso ena dua na kilakila mada.

Dua na siga a liutaka na neimami qasenivuli e dua na veivosaki ka a kerei ira kece na gonevuli sega ni lotu Katolika me ra tucake. O au duadua ga na Yalododonu Edaidai a tiko ena kalasi. Era a le ono talega era a tucake.

Keimami a qai tarogi: Na lotu cava o dou lewena tiko? O cei a tauyavutaka? A tauyavu vakacava na nomudou Lotu?

Au a iotioti meu sauma. Au a lomaleqa niu kila niu a sega ni kauta mai na noqu ivola ni Lotu, ia au sa saga meu nanuma na veika au sa vulica. Au a nanuma sara e dua na tiki ni iVola Tabu:

“Mo vakararavi vei Jiova ena vu ni yalomu; Ka mo kakua ni vakararavi ki na nomu yalomatua.

“Mo vakarogotaka vua na nomu sala kecega, ia ena vakadodonutaka na nomu ilakolako ko Koya.” (Vakaibalebale 3:5–6).

Au a tu e na mata ni kalasi ena qaqa ka guilecava na noqu rere. Au a kaya niu lewe ni Lotu i Jisu Karisito ni Yalododonu Edaidai. Au a wasea na italanoa ni dua na cauravou lailai, o Josefa Simici, ni a raica na Kalou. Au a vakila na katakata vinaka ni lomaqu, ka tuturu na wai ni mataqu. Au a wasea ni a tauyavutaki na Lotu ena 6 ni Epereli, 1830, ka vakadinadinataka ni sa mai kacivi e dua na parofita ni Kalou ka vakalesuimai na matabete. Au a vakadinadinataka niu kila ni sa dina na veika kece oqo.

Sa mai yaga vakaidina na vuqa na auwa ni vuli kosipeli. A vukei au meu taqomaka na noqu vakabauta ka wasea na kosipeli. Au a marau vakalevu, ni oti e vica na macawa, e ratou sa mai tomani au ena lotu e va na noqu lewe ni kalasi.

Na veika au sotava oqo a vakavulici au baleta na bibi ni ivakadinadina. Taumada au a vakasamataka na vuna a sega ni vakauqeti au kina na Turaga meu kauta mai na noqu ivola ena siga o ya. E a dodonu sara ga me ra vukea meu sauma vakavinaka sara na veika a tarogi. Ia au a qai kila ni sega sara ni gadrevi meda cavuqaqataka na veika kece baleta na Lotu se vakararavi ki na ivola—e dodonu meda vuli, bulataka, ka wasea na kosipeli, ka vakararavi ki na Yalo Tabu. A sega beka ni levu na noqu ivola, ia sa tu na noqu ivakadinadina.