សិក្សាដំណឹងល្អ តាមរបៀប របស់អ្នក
សូមមើលគន្លឹះទាំងនេះ អំពីការសិក្សាដំណឹងល្អ និង ការស្វែងរកចម្លើយចំពោះសំណួរខាងវិញ្ញាណរបស់អ្នក ។
តើអ្នកសិក្សាដោយរបៀបណា នៅពេលអ្នកកំពុងស្វែងរកចម្លើយចំពោះសំណួរខាងវិញ្ញាណ ឬ កំពុងព្យាយាមយល់ព្រះគម្ពីរឲ្យកាន់តែច្បាស់នោះ ? ខ្ញុំចង់និយាយ—អំពីការសិក្សាតាមរបៀប ផ្ទាល់ខ្លួនរបស់អ្នក ។ មនុស្សម្នាក់ៗ មានទម្លាប់សិក្សាផ្សេងៗគ្នាសម្រាប់ការសិក្សានៅសាលា ប៉ុន្តែជួនកាលយើងភ្លេចថា យើងអាចសិក្សាដំណឹងល្អរបស់យើងតាមរបៀបនោះផងដែរ ។ នៅពេលក្រោយ ប្រសិនបើអ្នកមានសំណួរខាងវិញ្ញាណ ឬ ខាងគោលលទ្ធិ សូមព្យាយាមធ្វើតាមគន្លឹះទាំងនេះ ដើម្បីស្វែងរកមើលថា តើគន្លឹះណាមួយដែលល្អបំផុតសម្រាប់អ្នក ។
១. បង្កើត
ធ្វើបញ្ជី តារាង ឬ ផែនទីមួយ ។ ( សូមមើលឧទាហរណ៍ខាងក្រោមនេះ ) ។
ធ្វើការសិក្សាបែបបណ្តាញ ។ សរសេរពាក្យ និង គំនិតនានា បន្ទាប់មកគូសបន្ទាត់ភ្ជាប់ និងគូររង្វង់លើពាក្យ និង គំនិតទាំងនោះដើម្បីបង្ហាញថាវាទាក់ទងគ្នា ។
២. សរសេរ
កត់ត្រាគំនិត និង អារម្មណ៍ដែលអ្នកទទួលបានអំឡុងពេលសិក្សាព្រះគម្ពីររបស់អ្នក នៅក្នុងសៀវភៅកំណត់ហេតុសិក្សា ហើយមើលគំនិតទាំងនោះឲ្យបានញឹកញាប់ ។
កត់ត្រាគំនិត និង អារម្មណ៍របស់អ្នក បន្ទាប់ពីអ្នកអធិស្ឋាន ទោះបីជាអារម្មណ៍នោះ មិនទាក់ទងផ្ទាល់ទៅនឹងប្រធានបទដែលអ្នកកំពុងសិក្សាក្តី ។ ចាំមើលថាតើព្រះវិញ្ញាណបង្រៀនអ្នកអ្វីខ្លះ ពេលអ្នកធ្វើបែបនេះ ។
កត់ត្រាសំណួររបស់អ្នកនៅក្នុងសៀវភៅកំណត់ហេតុ ក្នុងទូរសព្ទ ឬ នៅលើទំព័រកំណត់ចំណាំដែលដាក់នៅជិតគ្រែដេក ដើម្បីរំឭកអ្នក ហើយជួយអ្នកបន្តគិតអំពីអ្វីដែលអ្នកកំពុងរៀនរៀងរាល់ថ្ងៃ ។
៣. ស្តាប់ ហើយពិភាក្សា
និយាយជាមួយឪពុក/ម្ដាយ ឬ ថ្នាក់ដឹកនាំដែលអ្នកទុកចិត្ត ។ ស្វែងរកចម្លើយជាមួយគ្នា ។ វាត្រូវចំណាយពេលបន្តិច ប៉ុន្តែអ្នកនឹងរីកចម្រើននៅក្នុងដំណើរការនេះ ។
បង្រៀនដល់អ្នកដទៃផ្សេងទៀត ។ ចែកវេនគ្នាចែកចាយពីអ្វីដែលអ្នកដឹង ពិតប្រាកដ ។ ពិភាក្សាអំពីអ្វី ដែលអ្នកបានរៀនពីគ្នា ។
ស្តាប់ព្រះគម្ពីរដែលអានជាសំឡេង ឬ រឿងអិល.ឌី.អេសផ្សេងៗទៀត និង ធនធាននានាដោយចាក់វាឲ្យឮៗ ។
៤. ស្រាវជ្រាវ
ស្វែងរកជំនួយសិក្សានៅក្នុងព្រះគម្ពីរ និង តាមអ៊ិនធើរណែត ( សូមមើលបញ្ជីខាងក្រោយសម្រាប់បញ្ជីនៃធនធានអិល.ឌី.អេស.សំខាន់ៗ ) ។
សូមស្រាវជ្រាវរកវីដេអូ និង ចម្រៀងអំពីអ្វីដែលអ្នកកំពុងសិក្សានៅក្នុងគេហទំព័រ LDS.org ។
សូមសិក្សាអំពីបរិបទ ។ ស្រាវជ្រាវប្រវត្តិ ឬ ជំពូកដែលទាក់ទងនឹងប្រធានបទ ឬ ខគម្ពីរដែលអ្នកកំពុងសិក្សា ។
៥. អនុវត្ត
សម្តែងតាមរឿងនានាដែលមាននៅក្នុងព្រះគម្ពីរ ឬ ធនធានផ្សេងទៀត ។ តើការដាក់ខ្លួនរបស់អ្នកទៅក្នុងស្ថានភាពរបស់បុគ្គលនោះ ជួយអ្នកឲ្យយល់កាន់តែច្បាស់ អំពីអ្វីដែលអ្នកកំពុងសិក្សាយ៉ាងដូចម្តេច ? តើមានស្ថានភាពណាខ្លះនៅក្នុងជីវិតអ្នក ដែលស្រដៀងនឹងស្ថានភាពនោះ ?
ធ្វើខគម្ពីរប្រទាក់គ្នា ដែលទាក់ទងនឹងចម្លើយ ដែលអ្នករកឃើញនៅក្នុងព្រះគម្ពីរ ។ ( សូមមើលឧទាហរណ៍ខាងក្រោមនេះ ) ។