Era a Raici Koya
O ira yadua oqo era a raica dina na iVakabula sa tucaketale, ia sa rawa talega mo ivakadinadina i Karisito ena nomu lewa ga.
Sa Tucaketale o Koya, mai vei Greg K. Olsen, e sega ni vakadonui me lavetaki
Na cava o nanuma ni na vakacava beka na ituvaki mo vakadinadinataka kina na iVakabula sa tucaketale? E drau na tamata ena gauna i Jisu, era a sega tale ni raitayaloyalotaka—era a bula donuya. E tukuna na ivolanikalou ni vica mada ga na gauna a tukuni ena Veiyalayalati Vou kei na vica tale eso ena iVola i Momani ena Nona a rairai vei ira na tamata na Turaga sa tucaketale. O ira yadua oqo era a vakadinadinataka e dua vei ira na cakamana cecere duadua ni veigauna: Nona sa qaqa o Jisu Karisito vei mate ka sa rawa kina kivei keda yadua meda na bula tale. Sa qai totoka dina, donu?
Sa qai cava na ibalebale dina meda ivakadinadina i Karisito? Meda dikeva mada e vica na veigauna oqo ena ivolanikalou ka vakasamataka na sala, sega mada ga ni da raici Koya e yagoda, meda sa ivakadinadina talega i Karisito.
Meri Makitala
E a isevu ni ivakadinadina o Meri Makitala. Ena mataka ni Sigatabu ni oti na Mate e Kauveilatai, a gole mai o koya ki na ibulubulu kei na so tale na marama me ra mai lumuta na yago ni Turaga. Ni sa raica o Meri ni sa lala tu na ibulubulu, sa tagi. E dua a gole mai e dakuna ka taroga, “Yalewa, ko sa tagi ena vuku ni cava?” Raitayaloyalotaka mada na nona kurabui ni sa kila ni o ya o Jisu, sa tucaketale mai na mate. (Raica na Joni 20:1–18.)
E Rua na Tisaipeli ena Gaunisala ki Emeo
Na Gaunisala ki Emeo, mai vei Jon McNaughton
Ena gauna a lako tiko kina o Kaliopasa kei na dua tale na tisaipeli ena gaunisala ki Emeo a tomani rau sara e dua na vulagi. Rau a sega ni kila na nodrau itokani vou oqo, ia ni ratou sa vakayakavi vata kina, sa dovia na madrai na vulagi o ya. Sa qai dola na matadrau, ka rau sa qai kila ni rau a taubale vata tiko kei koya na iVakabula. “Sa sega li ni katakata sara na yalodaru … ?” rau sa dui taroga, ka vakasamataka na veivakadeitaki ni nodrau a vakila ni a tiko dina kei rau. (Raica na Luke 24:13–34.)
Na iApositolo E Tini
Raica na Ligaqu kei na Yavaqu, mai vei Harry Anderson
Oi rau na tisaipeli ka a gole ki Emeo vata kei Karisito rau a lesu ki Jerusalemi ka laki tukuna vei ira na tini na iApositolo na ka a yaco vei rau. Ni rau sa vosa tiko, sa rairai mai vei iratou na iVakabula, ka kaya, “Raica na ligaqu kei na yavaqu, sai au dina ga: tarai au, ka raica; ni sa sega ni vakalewena se vakasuina na yalo, me vaka dou sa raica vei au.” (Raica na Luke 24:36–41, 44–49.)
Na iApositolo o Tomasi
droini kei Tomasi mai vei Brian Call
A sega ni tiko na iApositolo o Tomasi ena imatai ni gauna a rairai kina na iVakabula vei ira na iApositolo tale eso, a sega kina ni vakabauta ni sa tucaketale na Karisito. Ni oti e dua na macawa, a rairai tale na Karisito vei iratou na iApositolo. Ena gauna oqo sa tiko kina e kea o Tomasi, baleta ni sa qai raici Karisito, ni sa vakabauta sa tucaketale o Koya. Sa qai vunauci Tomasi na iVakabula me kakua ni vakadinata walega ni sa raica oti “Ni ko sa raici au Tomasi, ko sa vakadinata: sa kalougata ko ira era sa sega ni raica, ka ra sa vakadinata.” (Raica na Joni 20:24–29.)
O Iratou na Lewe Tinikadua na iApositolo ena Wasawasa mai Taiperia
Na Karisito sa Tucaketale ena Wasawasa e Taiperia, maivei David Lindsey
Dua na siga ni sa oti toka na Tucaketale, e vica vei iratou na tisaipeli a gole ki qoli ena Wasawasa o Taiperia ka sega ni katoa. Ena mataka e tarava, a rairai yani na iVakabula ka vakasalataka me ratou viritaka na lawa ena yasa imatau ni waqa. Ni ratou sa cakava, sa coko na lawa ena levu ni ika ka dredre me ratou yavia cake mai! Ni oti nodratou kana vata, a vakavulica na iVakabula na bibi ni nodra qaravi na tamata, ka kaya kina, “Vakani ira na noqu lami.” Era na cakava oqo na iApositolo ena vo ni nodra bula taucoko—vakavulici ira na tamata baleti Karisito—ka so na gauna, era na solia na nodra bula ena vuku ni cakacaka oqo. (Raica na Joni 21:1–22.)
Ira na Nifai mai Amerika
Duabau na iVakatawa, mai vei Howard Lyon
Ni sa rube tu e kauveilatai, a boloraki na vanua o Amerika ena uneune, kama, kei na so tale na tavuki ni vanua, ka tolu na siga ni buto me vakatakilakilataka na mate ni iVakabula. E muri, a qai siro sobu mai lomalagi na Karisito ka rairai ki na 2,500 na tamata era gole yani ki na valetabu e Vanuasautu. A sureti ira na tamata mera mai tara na we ni mavoa e Ligana kei na yavana kei na sarisarina, a vunau, ka masulaki ira yadudua na luvedra na Nifai. Dina ni vuqa na tamata era gole mai ena siga e tarava, a sikovi ira mai na iVakabula ka vakavulici ira. Era sa qai tauyavutaka na tisaipeli na Lotu i Karisito, ka ra ciqoma na Nifai e dua na ivakadinadina kaukauwa ka yaco o ira kei ira na Leimani mera saumaki yani vua na Turaga. (Raica na 3 Nifai 11–18; raica talega na 3 Nifai 8–10; 4 Nifai 1.)
iVakadinadina Taumada kei na Gauna Oqo
A rairai talega na Karisito ki na vuqa tale eso, oka kina e vica na marama eratou a gole ki na ibulubulu mera vukei Meri Makitala me lumuti na yago i Karisito, e dua na iwiliwili ni 500 vakacaca na tamata, vei Jemesa, kei Paula. (Raica na Maciu 28:9, Cakacaka 9:4–19; 1 Korinica 15:6–7; raica talega na 3 Nifai 19; 26:13.)
Eda na sega beka ni raica rawa na iVakabula me vakataki ira sa ivakadinadina bula kina, ia sa rawa mo dua sa ivakadinadina i Karisito. Sa rawa mo vakasaqara vakai iko na iVakabula, me vakataki Meri ena nona a gole ki na ibulubulu, ena nona vulici Koya vakalevu. Se sa rawa mo cakacakataka nomu vakabauti Koya ena maroroi ni ivakaro ka muria na nodra ivakasala na parofita. Se sa rawa mo kila na veivakalougatataki ni iVakabula ena nomu bula, me vakataki rau na tisaipeli ena ilakolako ki Emeo. Ena Siga ni Mate oqo, mo vakasamataka mada na ibalebale mo dua na ivakadinadina i Karisito O ira na tamata oqo era a ivakadinadina bula era a raica dina na Karisito sa tucaketale—ia oqori e sega duadua ga ni sala o rawa ni o vakadinadinataki Koya ena nomu bula.