ចម្លើយ សម្រាប់ លូសៀ
អ្នកនិពន្ធរស់នៅរដ្ឋ កាលីហ្វូញ៉ា ស.រ.អា. ។
លូសៀបានភាន់ច្រឡំអំពីអ្វីដែលគ្រូបង្រៀនរបស់នាងបាននិយាយ ។ តើនរណាអាចជួយបាន ?
« ខ្ញុំចូលចិត្តអានគម្ពីរបរិសុទ្ធ ហើយរាល់ពេលដែលខ្ញុំអាន ខ្ញុំមានអារម្មណ៍ព្រះវិញ្ញាណចម្រើនក្នុងបេះដូង — ជាទីបន្ទាល់ថាជាការពិត » ( សៀវភៅចម្រៀងកុមារ លេខ ៦៦ ) ។
លូសៀបានជូតទឹកភ្នែក ។ នាងពុំចង់ឲ្យក្មេងផ្សេងទៀតឃើញឡើយ ។ នាងបានចេញពីបរិវេណសាលារៀន ហើយប្រញាប់ធ្វើដំណើរទៅផ្ទះ ។
លូសៀរស់នៅលើកោះតូចមួយដ៏ស្រស់ស្អាត ។ នាងជាសមាជិកសាសនាចក្រតែម្នាក់គត់នៅសាលារៀន ។ មនុស្សផ្សេងទៀតទៅព្រះវិហារដូចៗគ្នា ។ ពួកគេឌឺដងដាក់លូសៀ ហើយមិនលេងជាមួយនាងឡើយដោយសារនាងខុសប្លែកពីគេ ។
នោះពុំមែនជាបញ្ហាតែមួយនោះទេ ។ ជួលកាលគ្រូបង្រៀនព្រងើយកន្តើយនឹងលូសៀ ពេលនាងបានលើកដៃឡើងសួរសំណួរ ។
លូសៀបានគិតថា « ប៉ុន្តែថ្ងៃនេះគឺជាថ្ងៃដ៏អាក្រក់បំផុត ! » ។ នាងបានទាត់គ្រួសនៅតាមដងផ្លូវ ។ អំឡុងពេលរៀន គ្រូបង្រៀនបានអានខគម្ពីរមួយចំនួនពីព្រះគម្ពីរប៊ីបដែលលូសៀពុំយល់ ។ ខគម្ពីរនោះហាក់បីដូចជាថា ព្រះវរបិតាសួគ៌ ព្រះយេស៊ូវ និងព្រះវិញ្ញាណបរិសុទ្ធគឺជាតួអង្គតែមួយ ។ បន្ទាប់មកគ្រូបង្រៀនបាននិយាយថាមានព្រះវិហារ មួយចំនួន ដែលពុំជឿលើអ្វីដែលព្រះគម្ពីរប៊ីបបង្រៀនឡើយ ។ គាត់បានសម្លឹងចំមុខលូសៀ ។ សិស្សគ្រប់គ្នានៅក្នុងថ្នាក់បានសើច ។
លូសៀមានចិត្តច្របូកច្របល់ ។ តើព្រះវរបិតាសួគ៌ ព្រះយេស៊ូវ និង ព្រះវិញ្ញាណបរិសុទ្ធពុំមែនជាតួអង្គផ្សេងគ្នាទេឬ ? តើមានអ្វីកើតឡើងទៅ ?
រំពេចនោះនាងមានគំនិតរីករាយមួយ ។ នាងអាចសួរពួកអ្នកផ្សព្វផ្សាយសាសនា ! ពួកគេមកភូមិរបស់លូសៀរៀងរាល់ថ្ងៃ ។ នាងបានគិតថា « ពួកគេដឹងរបៀបដើម្បីជួយ ! » ។
ពេលលូសៀទៅដល់ផ្ទះ នាងបានឃើញស៊ីស្ទើរ ប្រោន និងស៊ីស្ទើរ រូអ៊ីស ។ ពួកគេកំពុងជួយសប់ទឹកដាក់ក្នុងធុងធំឡើងទៅលើដំបូលផ្ទះ ។
ភ្លាមនោះលូសៀបានសួរសំណួរ ។ « ហេតុអ្វីព្រះគម្ពីរប៊ីបចែងថា ព្រះវរបិតាសួគ៌ ព្រះយេស៊ូវគឺជាតួអង្គតែមួយ ? »
ស៊ិស្ទើរ ប្រោន បានញញឹម ។ « នោះជាសំណួរដ៏ល្អ ។ បន្ទាប់ពេលអាហារថ្ងៃត្រង់ ចូរស្វែងរកខគម្ពីរមួយចំនួនសម្រាប់ជាជំនួយ » ។
លូសៀស្ទើរតែមិនចង់ភ្លក់អាហារ រ៉ូប៉ា វីចា ដ៏ឆ្ងាញ់ដែលម្តាយបានចំអិនឡើយ ។ អ្វីដែលនាងចង់បាននោះគឺជាចម្លើយ !
ទីបំផុតអាហារថ្ងៃត្រង់បានបញ្ចប់ ។ លូសៀ និងពួកអ្នកផ្សព្វផ្សាយសាសនាបានបើកព្រះគម្ពីររបស់ពួកគេ ។ ពួកគេបានអានអំពីការនិមិត្តរបស់យ៉ូសែប ស្ម៊ីធ ។ ពួកគេបានអានអំពីពិធីបុណ្យជ្រមុជទឹករបស់ព្រះយេស៊ូវ ។ ខគម្ពីរទាំងពីរបង្ហាញថា ព្រះវរបិតាសួគ៌ ព្រះយេស៊ូវ និងព្រះវិញ្ញាណបរិសុទ្ធគឺជាតួអង្គដាច់ដោយឡែកពីគ្នា ។
លូសៀបានសួរថា « ដូច្នេះហេតុអ្វីខគម្ពីរផ្សេងទៀតនោះចែងថា ពួកទ្រង់គឺជាអង្គតែមួយ ? »
ស៊ីស្ទើរ ប្រោនចាប់ផ្តើមបើកទៅទំព័រព្រះគម្ពីរ ។ « តោះអាននៅក្នុង យ៉ូហាន ១៧ ។ នោះជាពេលព្រះយេស៊ូវអធិស្ឋានទៅព្រះវរបិតាសួគ៌អំពីពួកសាវករបស់ទ្រង់ ។
ពួកគេបានឆ្លាស់វេនគ្នាអាន ។ នៅក្នុងខគម្ពីរនោះ ព្រះយេស៊ូវបានអធិស្ឋានថា ពួកសាវករបស់ទ្រង់ « អាចរួមគ្នាតែមួយ » ដូចជាទ្រង់ និងព្រះវរបិតាសួគ៌រួមគ្នាតែមួយផងដែរ ។ លូសៀរាប់ពីភាពខុសគ្នាបីដងដែលទ្រង់បានមានព្រះបន្ទូលអំពីរឿងនោះ ។
ស៊ីស្ទើរ រូអ៊ីស បាននិយាយថា « ពួកសាវកទាំងអស់ពុំអាចក្លាយជាបុគ្គលតែម្នាក់បានឡើយ ។ ប៉ុន្តែពួកគេ អាច រួមគ្នាតែមួយនៅក្នុងជំនឿ និងការប្រតិបត្តិ ។ នោះជារបៀបដែលព្រះវរបិតាសួគ៌ ព្រះយេស៊ូវ និងព្រះវិញ្ញាណបរិសុទ្ធគឺជាអង្គតែមួយ » ។
លូសៀចាប់ផ្ដើមមានអារម្មណ៍កក់ក្តៅក្នុងចិត្ត ។ នាងដឹងថា អារម្មណ៍នោះមកពីព្រះវិញ្ញាណបរិសុទ្ធ ។ ទ្រង់កំពុងប្រាប់នាងថា អ្វីដែលស៊ីស្ទើរ រូអ៊ីស បាននិយាយគឺជាការពិត ។
ព្រះវរបិតាសួគ៌ និងព្រះយេស៊ូវពុំមែនជាតួអង្គតែមួយឡើយ ។ ប៉ុន្តែពួកទ្រង់រួមគ្នាតែមួយនៅក្នុងអ្វីដែលពួកទ្រង់មានបន្ទូល និងធ្វើ ។ ហើយលូសៀបានដឹងថា ពួកទ្រង់ទាំងពីរអង្គស្រឡាញ់នាង ។