5 ka Paagi nga Makakaplag og Kalipay sa Pagkainahan

Imahe

mother and baby

Sa dihang bag-o ko nahimong mama, gibati nako nga natuok sa inadlaw-adlaw nga naandang pag-atiman sa bata. Lisud kaayo nga magtan-aw ko sa akong bana ug sa uban nga nangita og makadasig nga bag-ong buhatunon samtang ako nagpuyo lang sa among gamay nga apartment sa tibuok adlaw nga nag-atiman sa duha ka gagmayng mga bata. Gusto ko nga maganahan isip usa ka inahan, apan naglisud ko. Mao nga miduol ko sa Langitnong Amahan pinaagi sa pag-ampo. Mihangyo ko Kaniya sa pagtabang nako nga makahibalo unsaon nga mausab ang akong panglantaw ug ang akong kaugalingon. Ang mga tubag nga akong nadawat mga yano apan gamhanan:

1. Ipha ang imong panalangin. Kon ako motutok sa maayong mga butang sa akong kinabuhi imbis sa negatibo nga mga butang, mobati ko nga mapasalamaton ug malipayon.

2. Pangitaa ang katahum ug kalipay sa matag adlaw. Akong namatikdan ang akong mga anak mokatawa kanunay ug makapakatawa kanako. Ganahan ko magtan-aw nila nga motubo matag adlaw. Nagsugod ko nga malipay nga mahimo ang mga buluhaton sa balay, bisan kadtong himoon nako makadaghan sa usa ka adlaw. Mao kini ang panalangin sa Espiritu nga akong naangkon pinaagi sa pag-ampo ug paningkamot.

3. Pakigdula sa imong mga anak. Ang paggahin og panahon sa pagpakigdula sa akong mga anak usa ka dako nga panalangin. Nakatabang kini nako sa paghatag og prayoridad sa akong panahon ug mapagamay ang mga makabalda, ug naghatag kini sa akong anak og gamayng panahon sa pagtan-aw og TV, pag-away ug pagsamok-samok sa usag usa! Kon makigdula ko sa akong mga anak, malipayon sila, ug kon sila malipayon, mao usab ako. Ang pag-apil sa ilang dula makatabang nako nga mopalambo og mas lig-on nga relasyon uban nila ug nagtugot nako nga makakita sa kalibutan pinaagi sa ilang kasinatian. Nagpahinumdom kini nako ngano nga ang mga kahigawad sa pagkaginikanan bililhon.

4. Ayaw tan-awa ang imong kaugalingon. Kon motutok ko sa uban, dili ko makahunahuna sa akong kaugalingong mga problema. Kini makapalingkawas nako nga dili mahigawad, masubo, o mawad-an og paglaum ug makatabang nako nga pulihan kadtong mga pagbati uban sa tiunay nga gugma ni Kristo. Nasayud ko nga kini tinuod, apan kinahanglang makat-unan nako kini pag-usab. Dili nako buhaton ang tanan alang sa akong kaugalingon; buhaton nako kini alang sa bililhong mga kalag nga gisalig sa Dios kanako. Motubo ako nga mas mahisama Kaniya samtang motudlo ako kanila nga mahimong mas sama Kaniya.

5. Ipadayon ang taas nga panglantaw. Kon ako mahigawad sa ingon og sa walay katapusan nga mga buluhaton nga naghulat kanako, pahinumduman nako ang akong kaugalingon kon unsa ka bililhon ug kaimportante kining panahona sa kinabuhi. Ang akong mga anak ania kanako sa mubo kaayo nga panahon, ug akong gipakabililhon ang panahon nga ako motabang kanila nga makat-on ug magtan-aw nila nga motubo ngadto sa pagkatalagsaon nga mga tawo nga gusto sa Langitnong Amahan nga sila mahimo.

Ang pagsunod niini nga mga pag-aghat nakapausab sa hingpit sa akong panglantaw sa pagkainahan. Kaniadto, gibati nako nga dili makaapil sa talagsaong mga panimpalad. Apan karon nasayud ko nga ang akong mga anak mao ang talagsaong panimpalad. Ang kadasig ug katuyoan nga akong gipangita anaa sa akong atubangan sa tibuok panahon. Dili ko usa ka maid; usa ko ka magtutudlo, usa ka magtatambag, usa ka sinaligan. Ang pagkainahan usa ka dakong panalangin ug dakong hagit, ug mapasalamaton ko sa mga paagi nga kini nakatabang nako, nagtudlo nako, ug mihashas nako nga mahimong tawo nga nahibaloan sa Langitnong Amahan nga ako mahimo.