Pagsimba Panahon sa Digital
Ikonsiderar kining tulo ka mga baruganan sa tukmang paggamit sa mga device diha sa chapel.
Usa ka Dominggo samtang ang sakrament gipaambit, usa ka presidente sa Relief Society sa ward mikuha sa iyang smartphone aron mobasa sa “Ang Buhi nga Kristo: Ang Pagpamatuod sa mga Apostoles.” Nadasig niining apostolikanhong pagpamatuod bahin sa Manluluwas, gibati niya nga nabag-o ang iyang pasalig sa paghinumdom Kaniya kanunay.
Hinoon, ang iyang positibo nga mga pagbati nahanaw paglabay sa pipila ka adlaw sa dihang nakadawat siya og sulat gikan sa miyembro sa ward nga wala magpaila. Ang nagsulat misaway niya sa pagpakita og dili maayo nga ehemplo pinaagi sa paggamit sa iyang smartphone sa miting sa sakrament. Naguol siya.
Sa tinuod, dili niya tuyo nga mopasilo ni bisan kinsa pinaagi sa paggamit sa iyang mobile device. Panagsa ra niya kini gamiton sa chapel, ug gamiton lang niya kon bation niya nga angay. Apan human makadawat sa sulat, nagsugod siya sa pagduha-duha sa iyang kaugalingon.
Usa ka Bag-o nga Hagit
Ang matag henerasyon adunay iyang mga hagit. Usa ka pagtuon nag-report nga inig 2020 adunay mas daghan pa nga mga tawo nga dunay mobile phone (5.4 billion) kay sa tubig (3.5 billion).1 Dugangan pa sa mga tablet, “phablets,” ug ubang connected devices, ug ang kalibutan makigbisog sa pangutana: Unsa ang angay nga “digital nga kinaiya”?
Samtang ang mga ginikanan, mga lider, ug mga magtutudlo maningkamot sa paghukom unsay angay nga digital nga kinaiya diha sa mga miting sa Simbahan, lain-laing mga opinyon misangpot ngadto sa nagkasumpaki nga mga paagi sa paggamit sa mga digital device diha sa mga miting sa Simbahan.
Ang mga lider sa Simbahan mihatag og tambag sa mga panalangin ug mga kakuyaw sa paggamit sa teknolohiya. Hinoon, ang mga lider sa Simbahan dili mohatag kanunay sa angay nga buhaton o dili buhaton sa pagsunod sa ebanghelyo (tan-awa sa Mosiah 4:29–30). Gipaabut ang mga miyembro nga ilang tun-an ang maong butang sa ilang kaugalingon ug mangayo og giya sa Espiritu Santo sa paghimo og mga desisyon. Subo lang, sama sa sitwasyon nga gihulagway sa ibabaw, usahay mohimo ta og dili lang opinyon apan kinaiya usab nga manaway niadtong adunay lahi nga opinyon.
Dinasig sa Dios; Gipahimuslan ni Satanas
Ang Dios mihatag og mga panalangin sa teknolohiya alang sa atong kaayohan ug sa pagpalambo sa Iyang buhat.2 Mao nga samtang ang ubang mga miyembro naggamit sa ilang mga digital device sa dili angay nga paagi, si Elder David A. Bednar sa Korum sa Napulog Duha ka mga Apostoles mitudlo nga “kinahanglan nga dili nato tugutan ang kahadlok sa mga sayop nga makapugong nato sa pagdawat sa daghang mga panalangin nga ikahatag niini nga mga himan.”3 Kinahanglan kitang makat-on sa paggamit niini sa angay nga paagi ug sa pagtudlo sa atong mga anak sa pagbuhat usab sa ingon.
Ang mga mobile device makatabang sa mga miyembro sa Simbahan sa pagtuon sa ebanghelyo, sa buhat sa family history ug sa templo, ug sa pagpakigbahin sa ebanghelyo. Pananglitan, ang sobra tulo ka milyon ka tawo naggamit sa Gospel Library app niadtong Enero 2018. Ang ilang hiniusang panahon sa pagtuon miabut og labaw sa liboan ka tuig.
Uban sa mga panalangin, ang mga lider sa Simbahan nagpasidaan usab mahitungod sa potensyal nga kakuyaw, lakip sa nausik nga panahon, naguba nga mga relasyon, ug nalit-ag sa sala.4 Sa Simbahan, ang dili angay nga paggamit makasamok kanato ug sa uban sa pagsimba ug pagkat-on nga importante sa pagpalambo sa atong relasyon sa Dios.
Hinoon, kini nga mga kakuyaw dili talagsaon sa mga digital device. “Ang pipila niini nga mga himan—sama sa bisan unsa nga himan diha sa usa ka wala mabansay o walay disiplina nga kamot—mahimong delikado,” gitudlo ni Presidente M. Russell Ballard Akting Presidente sa Korum sa Napulog Duha ka mga Apostoles. “… Walay kalainan sa unsang paagi mopili ang mga tawo sa paggamit sa telebisyon o mga sine o bisan sa librarya. Si Satanas kanunay gayud nga abtik mogamit sa negatibo nga gahum sa bag-o nga mga imbensyon, sa pagdaot ug pagpakaubos, ug sa pagsanta sa bisan unsang epekto alang sa kaayohan.”5
Mga Mobile Device sa Miting sa Sakrament
Gihatagan niining potensyal nga mga panalangin—ingon man usab sa potensyal nga makasamok—niining mga digital device, unsaon sa mga miyembro paghukom unsay buhaton? Misugyot si Joseph Smith sa gahum nga gibase sa baruganan nga paagi sa dihang miingon siya, “Ako mitudlo kanila sa husto nga mga baruganan, ug gidumala nila ang ilang mga kaugalingon.”6
Dinhi, susihon nato ang mga baruganan nga makatabang sa paghimo og mga desisyon mahitungod sa paggamit sa mga mobile device sa miting sa sakrament. Alang sa panaghisgot sa angay nga paggamit sa mga digital device diha sa classroom, tan-awa sa “Pagtudlo sa Tech: Pagpaapil sa Kabatan-onan sa Panahon sa Digital,” ni Brother Brian K. Ashton, Ikaduhang Magtatambag sa Kinatibuk-ang Kapangulohan sa Sunday School, sa pahina 30 niini nga isyu.
Baruganan 1: Ang akong mga pagpili nagsuporta sa pagsimba.
Ang miting sa sakrament alang sa “[paghalad sa atong] debosyon ngadto sa Labing Halangdon” (D&P 59:10). Si Presidente Dallin H. Oaks, Unang Magtatambag sa Unang Kapangulohan, mitudlo nga ang atong tutukan mao ang pagbag-o sa atong mga pakigsaad ug sa atong pagtuo ni Ginoong Jesukristo ug sa Iyang Pag-ula.7 Unsay atong gipili nga buhaton sa miting sa sakrament kinahanglang makatabang nato sa pagbuhat niadtong mga butanga.
Gihatagan niana nga pagtutok, kon moabut ang panginahanglan, mahimong gamiton nato sa angay nga paagi ang atong mga device sa:
-
Pagpalambo sa atong pagsimba. Ang usa ka miyembro mahimong mogamit sa digital device panahon sa miting sa sakrament aron motan-aw sa mga kasulatan, mokanta og mga himno, o mosulat bahin sa espirituhanon nga mga impresyon.
-
Mangalagad. Ang bishop tingali makakita og bag-o o dili kaayo aktibo nga adto molingkod sa luyo nga bahin sa chapel atol sa miting sa sakrament ug kon nadasig, i-text ang ward mission leader nga mo-welcome sa indibidwal ug modapit kanila ngadto sa klase sa Mga Baruganan sa Ebanghelyo human sa miting.
-
Makapasayon sa importante nga koneksyon. Ang mga doktor, mga first-responder [unang motabang], ug ubang on-call nga mga propesyunal makaapil sa mga tulumanon sa pagsimba tungod kay nahibalo sila nga makontak ra sila kon gikinahanglan pinaagi sa ilang mga mobile device.
Kon maningkamot kita nga motutok sa Manluluwas, importante nga mahinumdom nga ang atong mga device makapasayon sa atong pagtuon, apan dili kini makahimo sa atong pagkat-on. Makahatag kini nato og butang nga pamalandungan, apan dili kini makahunahuna alang nato. Makatabang gani kini nato sa paghinumdom sa pag-ampo, apan ang pag-ampo kinahanglan nga atong buhaton sa atong kaugalingon.
Si Elder Bednar mitudlo nga ang atong relasyon uban sa Dios tinuod, dili virtual.8 Dili kini ma-double-click o ma-download.9 Mao nga ang presidente sa Relief Society sa sinugdanan niini nga artikulo migamit sa iyang telepono aron matabangan siya nga masentro ang iyang mga hunahuna kang Kristo, ang pakigsaad nga iyang gibag-o dili ang iyang telepono; kon dili kang Kristo. Ang panaw nga gitabang sa iyang device kaniya nga makasugod kinahanglan tapuson sa iyang mga hunahuna, sa iyang mga pag-ampo, ug sa iyang mga aksyon.
Baruganan 2: Akong giminusan ang mga makasamok.
Kinahanglan nga maningkamot kitang tanan alang sa kahimtang nga makapalambo sa atong pagtutok sa pagsimba ug pagkat-on. Ang pagpaminus sa mga makasamok importante. Kini nga baruganan magamit sa daghang mga sitwasyon, gikan kon unsaon nato sa pagpakig-istoryahanay o pagdumala sa samukan nga mga bata ngadto sa unsa nga paagi nato gamiton ang atong mga digital device.
Adunay daghan kaayong mga paagi nga ang device makasamok apan gidisenyo sa paghimo og daghan kaayong mga butang. Klaro nga ang pagtan-aw og mga video, pagpaminaw sa musika, o pagdula makapalisud sa pagtutok sa mga tulumanon sa sakrament. Apan mao usab ang pagsusi sa email, mga text message, social media, mga sports score, ug sa daghang mga saba, ug mga badge nga mobira nato ngadto sa mga panghitabo, mga relasyon, mga panag-istoryahanay nga anaa sa gawas sa miting. Kining tanan ug uban pa makasamok nato ug sa uban, bisan kadtong tua sa layo-layo nga lingkuranan.
Alang niadtong gusto nga mawala sa hingpit ang digital nga mga kasamok, ang pagbilin sa ilang mga device sa balay o pagpalong niini mao ang angay. Alang niadtong kinsa mogamit sa ilang mga device sa pagsuporta sa ilang pagsimba apan gustong makalikay nga masamok ang uban, tingali igo na nga ibutang sa silent ang device, ibutang kini sa do not disturb, o sa airplane mode.10
Baruganan 3: Nakatutok ko sa akong kaugalingong pagsimba.
Aduna gayuy makasamok kanunay, ug dili tanan niini digital. Tingali maglakip kini sa langas nga bata, tingog sa insekto, o ang kasaba sa trapiko sa gawas. Kita ang adunay responsibilidad sa unsay atong makuha sa atong pagsimba. Mao nga kon dunay nakalimot sa pagbutang sa ilang telepono sa airplane mode, maningkamot ta sa pagbutang sa atong kaugalingon sa “pagbaliwala sa mga kasamok” mode.
Si Presidente Russell M. Nelson, mitudlo, “Ang matag miyembro sa Simbahan adunay responsibilidad alang sa espirituhanong kalamboan nga moabut gikan sa miting sa sakrament.”11
Kon makamatikod ta sa uban sa atong palibut nga naggamit sa ilang mga device, kinahanglan nga magbantay kita mahitungod sa pag-asumir nga unsay ilang gibuhat dili angay tungod kay anaa kini sa digital device. Kon ang indibidwal usa ka bata o laing tawo aduna kitay responsibilidad, tingali angay nga susihon ang ilang paggamit sumala sa giya sa Espiritu. Kon dili, maningkamot ta sa atong kaugalingong pagsimba.
Magdungan sa Pagkat-on
Sa usa ka pamahayag nga naglakip niini nga mga baruganan, si Presidente Oaks mitambag, “Panahon sa miting sa sakrament—ug ilabi na atol sa pagpahigayon sa sakrament—kinahanglan nga kita maghunahuna og maayo sa pagsimba ug likayan ang tanang lain nga mga kalihokan, ilabi na sa pamatasan nga makabalda sa pagsimba sa uban.”12
Adunay daghang laing mga baruganan nga makatabang sa paggiya sa atong paggamit. Samtang ang mga digital device nahimong dugang nga normal nga kabahin sa atong kultura, kinahanglan kitang makigbisog sa mga pangutana mahitungod kon unsay angay. Tungod kay ang matag sitwasyon talagsaon ug ang teknolohiya magpadayon sa pagkausab, kinahanglan kita mopadayon sa pagsusi sa atong kaugalingong paggamit, mokonsiderar og bag-o o lahi nga mga panglantaw, ug andam nga mopasaylo sa uban samtang magdungan kita sa pagkat-on.