Football ug mga Dominggo
Ni Elder Jörg Klebingat
Sa Seventy
Sa Germany, ang football mao ang labing inila nga sport. Ang akong papa mipalista nako sa usa ka football club sa dihang singko anyos pa ko. Magpraktis mi katulo o kaupat matag semana. Ang mga dula sa kasagaran sa mga Sabado ug mga Dominggo. Kon wala ko magdula og football alang sa club team, makigdula ko og football uban sa akong mga higala. Nagdula mi og football hapit kada adlaw hangtud mosalop ang adlaw.
Sa dihang 15 anyos na ko, nagsugod ko sa pagdula sa team sa mas dako nga siyudad. Ang football nahimong mas seryoso. Nagpraktis mi pirme. Mobiyahe mi ngadto sa daghang dapit. Makigdula mi batok sa mas daghang mga team. Ang football mao ang akong kinabuhi.
Dayon, sa dihang hapit na ko mag-18, didto ko sa usa ka konserto. Nakakita ko og usa ka lalaki nga akong kaedad. Lahi kaayo siya sa ubang mga tawo. Wala siya moinom, manigarilyo, o manumpa. Gusto kong masayud kon ngano. Akong nahibaloan nga siya miyembro sa Ang Simbahan ni Jesukristo sa mga Santos sa Ulahing mga Adlaw. Ang iyang ehemplo maoy nagtukmod nako nga gustong makat-on pa. Sa wala madugay miapil ko sa Simbahan.
Human ako mabunyagi, nakat-unan nako ang duha ka butang. Una, kinahanglan nga dili ko magdula sa Igpapahulay. Kinahanglang mosimba ko. Ikaduha, ang Langitnong Amahan nagpaabut nako nga moserbisyo og misyon. Apan maayo kaayo ko sa football. Duna koy usa ka higala nga akong kadula sa football nga dako na. Kaming duha dunay tanyag sa pagdula sa professional team. Ang akong higala midawat sa tanyag. Gipili nako nga mobiya sa football ug nagmisyon. Dili kadto lisud nga pagpili tungod kay nasayud ko nga ang Simbahan tinuod.
Apan ang akong pagpili lisud alang sa akong pamilya ug mga higala. Wala sila makasabut unsay akong gibuhat. Ang akong mga ginikanan mipadala nako og mga artikulo sa pamantalaan sa akong higala nga nagdula og football. Dili kadto sayon alang kanako. Apan wala ko magmahay nga nagserbisyo og misyon.
Ang Langitnong Amahan mipanalangin nako sa matag adlaw tungod kay mipili ko nga moserbisyo og misyon. Gipanalanginan ko niya og kalinaw. Gibati nako ang maayong pagbati nga moabut gikan sa paghimo og matarung nga pagpili.