Ang mga Pag-ampo sa usa ka Bag-ong Inahan
Krystal Baker Chipman
Utah, USA
Paghulagway ni Joshua Dennis
Isip unang higayon nga inahan sa gamay ug aktibo nga batang lalaki, usahay bation nako nga ang akong kinabuhi mas labaw lang og gamay kay sa pag-ilis og diaper ug mga iskedyul sa pagpakaon.
Samtang nagpahiangay sa pagkainahan, akong nakita ang akong kaugalingon nga nagbaliwala sa akong espirituhanong mga panginahanglan. Imbis mobasa sa mga kasulatan, sa kasagaran modalikyat ko sa mas gikinahanglan nga pagtagpilaw o pagpanglaba. Ang mga pag-ampo dinali-dali lang nga pangamuyo ngadto sa akong Amahan sa Langit alang sa akong anak nga lalaki nga makatulog na ug magpabilin nga matulog, o alang panabang nga makalahutay sa tibuok adlaw.
Sa dihang ang akong anak nga lalaki nag-edad na og upat ka bulan, akong naamguhan unsa na kaluya ang akong pagkaespirituhanon. Ang akong tinguha nga lig-unon ang akong pagpamatuod nagkakunhod. Dili ko ganahan nga maglingkod sa tibuok tulo ka oras sa simbahan, ug ang ubang mga responsibilidad sa panimalay ug diha sa simbahan ingon og mga butang nga ako walay panahon o kalagsik. Gusto nako nga mobati sa kahayag sa ebanghelyo pag-usab, apan gikapoy na ko ug wala ko masayud asa ko magsugod. Usa ka gabii nag-ampo ko og maayo alang sa panabang.
Pagkasunod buntag nagduha-duha ko nga mosimba. Samtang naminaw sa leksyon sa Relief Society, nakakita ko og poster nga naghulagway sa katuyoan sa Relief Society. Nakita na nako ang poster kada Dominggo, apan wala gayud nako hunahunaa kaniadto ang iyang mensahe. Kini nag-ingon nga ang katuyoan sa Relief Society mao ang “pagpalambo sa pagtuo ug personal nga katarung, paglig-on sa mga pamilya ug panimalay, ug pagpangita ug pagtabang sa nanginahanglan.”
Gibasa ko kini pag-usab. Niining higayuna ang akong hunahuna nagtutok sa “pagpalambo sa pagtuo ug personal nga katarung.” Naklaro nga sa dili pa ako makatuman sa akong mga calling sa Simbahan ug epektibong makaserbisyo sa uban, kinahanglan nakong atimanon ang akong kaugalingong espirituhanong kahimsog. Nagsugod ko sa paggahin og panahon matag adlaw sa pagbasa sa mga kasulatan. Naningkamot usab ako nga mas maghunahuna kon mag-ampo ko.
Samtang nagsugod ko sa pag-amuma sa akong kaugalingong hugot nga pagtuo ug personal nga pagkamatarung ug sa pagtinguha sa giya gikan sa Langitnong Amahan, gibati nako ang gugma alang sa gipahiuli nga ebanghelyo ni Jesukristo nga nahibalik sa pagkalig-on. Ang pagserbisyo sa mga calling, pagbisita sa akong mga sister sa Relief Society, ug pag-ambit sa sakrament matag semana nahimong makahuluganon sa akong kinabuhi pag-usab. Ug ang mga butang nga kanhi akong gitan-aw nga walay panahon ug kalagsik nahimo na karon nga kahupayan ug kalig-on kanako ug sa akong pamilya.