Elder Brook P. Hales

Sa dihang si Elder Brook P. Hales otso o nuybe anyos pa lang, anaa siya sa usa ka miting sa puasa ug pagpamatuod diin ang iyang amahan mao ang nagdumala nga bishop. Ang iyang amahan midapit sa kongregasyon sa pagpaambit og mga pagpamatuod, ug hapit tanan nga anaa ang mihatag og pagpamatuod. “Mao siguro kadto ang unang higayon nga gibati nako ang Espiritu nga nagsaksi kanako sa kamatuoran sa ebanghelyo,” mihinumdom si Elder Hales.

Kadaghan na niya gibati kana nga pagsaksi human niadto, ilabi na samtang nagserbisyo isip sekretarya sa Unang Kapangulohan sukad niadtong 2008. Dihang si Presidente Thomas S. Monson gipaluyohan isip propeta ug Presidente sa Simbahan, ug usab sa dihang gipaluyohan si Presidente Russell M. Nelson, nakasaksi siya “sa awtoridad sa propeta nga miabut sa matag usa niining mga tawhana, ug nasayud ko sa walay pagduha-duha nga sila gipili ug gitawag nga mahimong Presidente sa Simbahan alang sa ilang piho nga panahon.”

Si Elder Hales gitawag isip General Authority Seventy niadtong Mayo 17, 2018, ug gipaluyohan niadtong Oktubre 6, 2018. Mopadayon siya isip sekretarya sa Unang Kapangulohan.

Natawo sa Ogden, Utah, USA, niadtong Abril 7, 1956, ngadto kang Klea ug Glenn Phillip Hales, si Elder Hales nakadawat og degree sa banking ug finance gikan sa Weber State College (karon Weber State University) niadtong 1980. Human makagradwar, mitrabaho siya sa pagpadagan og komersyal nga banko ug diha sa Finance and Records Division sa Simbahan. Naminyo siya kang Denise Imlay Hales niadtong 1981, ug mga ginikanan sila sa upat ka anak. Si Elder Hales nakaserbisyo isip full-time nga misyonaryo sa France Paris mission, magtatambag sa bishopric, high priest group leader, bishop, presidente sa stake, organist sa priesthood, magtutudlo sa Sunday School, ug sealer sa templo.

Nianang adlawa sa bata pa siya, wala mohatag sa iyang pagpamatuod si Elder Hales. Apan nahimo kining mas lig-on sukad niadto. “Ang ebanghelyo ni Jesukristo gipahiuli pinaagi ni Propeta Joseph Smith, ang Basahon ni Mormon tinuod, ang Dios hingpit nga nahigugma kanato ug naghinam-hinam sa pagpanalangin kanato, si Jesus mao ang atong Manluluwas, ug bulahan kita nga makabaton sa padayong pakig-uban sa Espiritu Santo kon kita takus niini,” miingon siya.