Nangulo si Presidente Nelson

Si Presidente Russell M. Nelson mitambag sa matag usa kanato nga mahimong mas mabination, sama kang Kristo, ug espirituhanon samtang mangalagad kita sa uban, ug mipakita siya og ehemplo kon unsay gipasabut niana sa paagi sa iyang pagpangalagad sukad sa miaging kinatibuk-ang komperensya.

Wala madugay human sa kinatibuk-ang komperensya sa Abril 2018, mibiyahe si Presidente Nelson nga midala kaniya ug sa iyang asawa, si Wendy, ug ni Elder Jeffrey R. Holland sa Korum sa Napulog Duha ka mga Apostoles ug sa iyang asawa, si Patricia, ngadto sa England, Israel, Kenya, Zimbabwe, India, Thailand, China, ug Hawaii, USA.

Sa misunod nga pagbiyahe, si Presidente Nelson nakighimamat sa mga miyembro, mga misyonaryo, mga lider, ug mga higala sa Simbahan sa kasadpan, tunga-tunga, ug silangang bahin sa Canada; sa Seattle, Washington, USA; ug sa Dominican Republic—diin dugay siyang namulong sa Kinatsila, ang unang higayon nga ang usa ka Presidente sa Simbahan mihatag og taas nga pakigpulong sa pinulongan nga dili Iningles.

Sa mga miting ug sa mga fireside, si Presidente Nelson mitudlo mahitungod sa sakto nga ngalan sa Simbahan; sa pagpaambit sa ebanghelyo ngadto sa uban; sa pagmanggad sa Basahon ni Mormon; sa unsang paagi ang pagsunod sa ebanghelyo makahimo sa kinabuhi nga mas maayo; sa unsang paagi nga ang dalan ni Kristo mao ang dalan sa kalipay, karon ug sa kahangturan; sa pag-ampo; sa paghimo sa panimalay nga usa ka santuwaryo alang sa mga bata; sa paggamit sa kabubut-on sa pagbuntog sa tintasyon ug pagsunod sa Manluluwas; sa pag-amuma sa uban; ug sa pagpangandam ug pagdawat sa mga panalangin nga magagikan sa templo.

Si Presidente ug Sister Nelson namulong usab sa tibuok kalibutan nga debosyonal sa kabatan-onan niadtong Hunyo 3, 2018, diin miingon si Presidente Nelson nga ang mga batan-on kinsa moapil sa “batalyon sa Ginoo” ug motabang sa pagpundok sa Israel adunay oportunidad nga mahimong “parte sa usa ka dakong butang, mahinungdanong butang, halangdong butang!” Giawhag niya ang kabatan-onan ngapaminosan ang kanunay nga pagsalig sa social media, mosakripisyo og panahon alang sa Ginoo, mohimo og hingpit nga pagtimbang-timbang sa kinabuhi uban sa Ginoo, mag-ampo matag adlaw nga ang tanang anak sa Dios unta modawat sa ebanghelyo, ug mahimong kahayag sa kalibutan.