Pagkat-on gikan sa mga Mensahe sa Kinatibuk-ang Komperensya (2018 ug 2019)
Ang mga pagtulun-an sa buhing mga propeta, mga manalagna, ug mga tigpadayag makahatag og dinasig nga giya alang sa buhat sa mga elders quorum ug mga Relief Society. Sa mga semana nga tun-an ang mga mensahe sa komperensya, ang kapangulohan sa elders quorum o Relief Society mopili og usa ka mensahe sa komperensya nga maoy gamiton, base sa panginahanglan sa mga miyembro. Usahay, ang bishop o presidente sa stake mahimong mosugyot usab og mensahe. Ang mga lider kinahanglang mohatag og gibug-aton sa mga mensahe nga gikan sa mga sakop sa Unang Kapangulohan ug sa Korum sa Napulog Duha ka mga Apostoles. Hinoon, ang mga sakop sa kapangulohan mahimong mopili og bisan unsang mensahe gikan sa labing bag-o nga komperensya, base sa mga panginahanglan sa lokal nga mga Santos ug sa inspirasyon gikan sa Espiritu.
Ang mga lider ug mga magtutudlo kinahanglan nga mangita og mga paagi sa pag-awhag sa mga miyembro nga mobasa daan sa pinili nga mensahe. Kinahanglan nga awhagon nila ang mga miyembro nga moabut sa mga miting nga andam mopaambit sa ilang nakat-unan nga mga kamatuoran sa ebanghelyo ug sa ilang mga ideya kon unsay buhaton kalabut niadto nga mga kamatuoran. Ang gisugyot nga mga kalihokan sa pagkat-on nga anaa sa ubos, nga gibase sa mga baruganan nga gitudlo diha sa Pagtudlo sumala sa Pamaagi sa Manluluwas, makatabang sa mga miyembro nga makat-on gikan sa mga mensahe sa kinatibuk-ang komperensya.
Quentin L. Cook, “Lig-on ug Malungtarong Pagkakabig ngadto sa Langitnong Amahan ug kang Ginoong Jesukristo”
Ang mga miyembro mahimong interesado nga maminaw sa usag usa kon unsa ang ilang unang mga reaksyon sa dihang nadungog nila ang mga kausaban nga gihulagway diha sa mensahe ni Elder Cook. Kon ang usa ka higala sa laing tinuohan mangutana nila nganong ang Simbahan naghimo niini nga mga kausaban, unsa man ang ilang isulti? Awhaga sila sa pagpangita og posibling mga tubag diha sa mensahe ni Elder Cook. Unsa ang atong mahimo isip mga indibidwal ug mga pamilya, ug isip usa ka korum o Relief Society, sa pagsiguro nga ang mga kausaban makakab-ut sa unsay tuyo sa Ginoo? Isip kabahin niini nga diskusyon, mahimo usab nimong ipaambit ang mga ideya gikan sa pasiuna nga pakigpulong ni Presidente Nelson nga nagdasig sa mga miyembro nga “madasigong mohangup” niini nga mga kausaban.
Ronald A. Rasband, “Ayaw Kabalaka”
Ang mensahe ni Elder Rasband nagpatataw og pipila ka mga kasulatan nga makatabang kanato sa pagwagtang sa bisan unsang kahadlok nga tingali aduna kita mahitungod sa malisud nga mga panahon nga atong gipuy-an. Hangyoa ang mga miyembro sa pagsiksik niini nga mga kasulatan alang sa tambag nga mahimo nilang mapaambit sa usa ka tawo nga nahadlok sa umaabut. Unsa pa ang mahimo nilang mapaambit gikan sa mensahe ni Elder Rasband? Sa unsang paagi ang kahadlok “[mopakunhod] sa panglantaw sa mga anak sa Dios”? Dapita ang mga miyembro sa pagpaambit kon sa unsang paagi nakakat-on sila sa pagbuntog sa ilang mga kahadlok ug magpuyo uban ang pagtuo.
David A. Bednar, “Paghiusa diha kang Kristo sa Tanang mga Butang”
Ikonsiderar ang pagdala og pisi ug usa ka checklist aron ipakita. Dapita ang mga miyembro sa paghisgot sa kalainan tali sa paghunahuna sa mga kamatuoran sa ebanghelyo ug mga programa sa Simbahan nga sama sa usa ka pisi ug sa paghunahuna niini nga sama sa usa ka checklist sa indibidwal nga mga hilisgutan ug mga buluhaton. Awhaga ang mga miyembro sa pagpangita og mga ideya diha sa mga ehemplo sa mensahe ni Elder Bednar. Unsa ang gipasabut sa “paghiusa diha kang Kristo sa tanang mga butang”? (tan-awa sa Mga Taga-Efeso 1:10). Unsay atong mabuhat aron madawat ang saad sa katapusan sa mensahe ni Elder Bednar?
Dallin H. Oaks, “Kamatuoran ug ang Plano”
Sa unsang paagi ang pagsabut sa “gipahiuli nga mga kamatuoran sa ebanghelyo” makatabang kanato kon mag-atubang kita og oposisyon sa atong mga gituohan ug mga binuhatan? Aron sa pagtubag niini nga pangutana, ang mga miyembro mahimong moribyu sa mga ehemplo sa sukaranang mga kamatuoran diha sa seksyon II sa mensahe ni Presidente Oaks. Mahimo usab nilang ribyuhon ang mga ehemplo kon sa unsang paagi magamit kini nga mga kamatuoran (tan-awa sa seksyon III). Mahimong makatabang sa mga miyembro ang pag-role-play kon unsaon nila sa paggamit ang pipila niining sukaranan nga mga kamatuoran aron sa pagtubag sa mga pagpanaway sa usa ka pagtulun-an o binuhatan sa Simbahan.
D. Todd Christofferson, “Lig-on ug Makanunayon diha sa Hugot nga Pagtuo kang Kristo”
Mahimo nimong sugdan ang usa ka diskusyon niini nga mensahe pinaagi sa pagdrowing og linya diha sa pisara nga adunay Sosyal nga Konsiderasyon sa usa ka tumoy ug Kristohanon nga Pasalig sa pikas tumoy. Dapita ang mga miyembro sa pagbasa sa parapo [paragraph] nga nagsugod sa “Kadaghanan nato makakita sa atong kaugalingon niining duha ka nagkalahi nga sitwasyon …” ug sa pagpamalandong kon asa nila gibati nga anaa sila niining duha ka nagkalahi nga sitwasyon. Unsa ang atong makat-unan gikan sa mga ehemplo sa mensahe ni Elder Christofferson nga nagdasig kanato nga mahimong lig-on ug makanunayon diha sa kasakit? (tan-awa usab sa Alma 36:27–28). Awhaga ang mga miyembro sa pagpaambit og mga ehemplo sa mga tawo nga ilang kaila kinsa mipakita og Kristohanong pasalig sa ebanghelyo, bisan kon nag-atubang og kasakit.
Ulisses Soares, “Usa ra Diha kang Kristo”
Sumala ni Elder Soares, sa unsang paagi ang Suba sa Amazon nagrepresentar sa mga miyembro sa gipahiuli nga Simbahan ni Jesukristo? Unsa ang gitudlo kanato niini nga pagkumpara mahitungod sa impluwensya sa bag-ong mga miyembro diha sa Simbahan? Unsaon nato isip usa ka korum o Relief Society sa pagsunod sa tambag ni Elder Soares sa pag-awhag, pagsuporta, ug paghigugma sa bag-ong mga kinabig? (tan-awa sa Moroni 6:4–5). Tingali ang pipila ka mga miyembro mahimong mopaambit og pipila ka hagit nga ilang giatubang isip bag-ong mga miyembro sa Simbahan ug sa unsang paagi ang ubang mga miyembro mitabang kanila. Mahimo usab kamong maghisgot og mga paagi nga ang bag-ong mga miyembro nakalig-on sa inyong ward o branch.
Gerrit W. Gong, “Ang Atong Campfire sa Hugot nga Pagtuo”
Ikonsiderar ang pagpakita og litrato sa usa ka campfire ug pagdapit og usa ka tawo nga mopaambit og kasinatian sa diha nga siya mapasalamaton nga adunay campfire. Hangyoa ang mga miyembro sa paghisgot kon unsa ang gipasabut ni Elder Gong sa dihang naghisgot siya og “campfire sa hugot nga pagtuo.” Dayon mahimo nimong igrupo-grupo ang mga miyembro ug dapita ang matag grupo sa pagribyu ug sa pagpaambit og usa sa lima ka paagi nga gisugyot ni Elder Gong nga ang usa ka “campfire sa hugot nga pagtuo,” makaawhag kanato. Hatagi ang mga miyembro og panahon sa pagpamalandong kon unsaon nila sa pagpalig-on sa ilang kaugalingong pagtuo o ang pagtuo sa tawo nga ilang kaila.
Dieter F. Uchtdorf, “Motuo, Mohigugma, Mobuhat”
Mahimo nimong sugdan ang usa ka diskusyon niini nga mensahe pinaagi sa pagsulat diha sa pisara og Kawalay Paglaum ug Kalipay. Dapita ang mga miyembro sa pagsiksik sa mensahe alang sa mga kinaiya ug mga tinuohan nga mosangput ngadto sa kawalay paglaum ug kalipay ug ilista kini diha sa pisara. Dapita ang mga miyembro sa pagpaambit og mga paagi nga ilang nasinati ang kalipay nga moabut gikan sa pagtuo, paghigugma, ug pagbuhat, sama sa gitudlo ni Elder Uchtdorf. Awhaga ang mga miyembro sa pagpangita og makadasig nga kinutlo gikan sa mensahe nga ma-display sa ilang panimalay o mapaambit ngadto sa usa ka higala.
Joy D. Jones, “Alang Kaniya”
Ikonsiderar ang pagpaambit sa istorya sa sinugdanan sa mensahe ni Sister Jones ug sa paghangyo sa mga miyembro sa paghunahuna sa mga panahon dihang ang ilang pagserbisyo ug mga paningkamot sa pagpangalagad mora og “wala tagda o … wala hangupa o gani wala kinahanglana.” Human mahisgutan ang istorya, ikonsiderar ang pagsulat diha sa pisara sa Nganong kinahanglan kitang moserbisyo? Dapita ang mga miyembro sa pagtubag niini nga pangutana pinaagi sa pagribyu sa tibuok mensahe ni Sister Jones, nga mangita og mga ideya (tan-awa usab sa Doktrina ug mga Pakigsaad 59:5). Sa unsang paagi ang tambag ni Sister Jones makausab sa paagi sa atong pag-amuma ug pagpangalagad sa usag usa?
Michelle D. Craig, “Balaan nga Pagkawala Matagbaw”
Si Sister Craig namulong mahitungod sa “gintang tali sa asa ug kinsa kita, ug asa ug kinsa ang gusto nato nga mamahimo.” Unsay gusto sa Dios nga atong bation mahitungod niini nga gintang? Unsay gusto ni Satanas nga atong bation mahitungod niini? Ang matag miyembro mahimong mosiksik sa usa sa tulo ka mga seksyon sa mensahe ni Sister Craig aron makakita og mga tubag niini nga mga pangutana. Unsay atong mabuhat aron sa pagsiguro nga ang atong “balaan nga pagkawala matagbaw” dili mahimong “makaparalisar nga pagkawala sa paglaum”?
Cristina B. Franco, “Ang Kalipay sa Dili Hinakog nga Pagserbisyo”
Aron matudlo nga “gihimong sagrado ang gugma pinaagi sa sakripisyo”, si Sister Franco mipaambit og duha ka istorya—ang usa mahitungod ni Victoria ug ang usa mahitungod sa usa ka biyuda. Mahimo ka nga modapit og duha ka miyembro nga motambong nga andam mopaambit sa unsay ilang nakat-unan mahitungod sa gugma ug sakripisyo gikan niini nga mga istorya. Unsa pa nga mga kasinatian ang atong mapaambit nga nagtudlo sa samang mga baruganan? Ang pagpasalida og video nga nagpakita sa Manluluwas nga nagserbisyo sa uban (sama sa “Light the World—Follow the Example of Jesus Christ [Pahayaga ang Kalibutan—Pagsunod sa Ehemplo ni Jesukristo]” sa LDS.org) mahimong moresulta sa usa ka diskusyon kon sa unsang paagi kita makasunod sa Iyang ehemplo sa “pagserbisyo inubanan sa gugma ug sakripisyo.”
Henry B. Eyring, “Kababayen-an ug Pagkat-on sa Ebanghelyo diha sa Panimalay”
Ang mga tudling sa kasulatan ug mga kinutlo gikan sa “Ang Pamilya: Usa ka Pamahayag ngadto sa Kalibutan” nga gigamit ni Presidente Eyring sa iyang mensahe naghatag og panabut mahitungod sa kaimportante sa impluwensya sa mga babaye diha sa panimalay. Ang mga miyembro mahimong magtinabangay sa pagpangita niini nga mga tudling ug mga kinutlo ug maghisgot unsay ilang nakat-unan. Unsa nga mga pagdapit ang gihatag ni Presidente Eyring? Unsa nga mga saad ang iyang gihimo? Ikonsiderar kon sa unsang paagi ang pagkanta o pagbasa og usa ka himno mahitungod sa panimalay makapalambo sa diskusyon.
Dallin H. Oaks, “Mga Ginikanan ug mga Bata”
Samtang mangandam ka sa pagtudlo, ikonsiderar kon hain nga seksyon diha sa mensahe ni Presidente Oaks ang labing mahinungdanon sa mga tawo sa inyong korum o Relief Society. Ania ang posible nga mga pangutana nga mahimo nimong ipangutana aron sa pag-awhag og diskusyon mahitungod sa iyang mensahe: Sa unsang paagi ang moderno nga mga uso nga gihisgutan diha sa mensahe ni Presidente Oaks sa seksyon I molihok batok sa plano sa Langitnong Amahan? Unsa nga mga ehemplo sa matinud-anong mga babaye ang mahimo natong mapaambit nga nagrepresentar sa mga pamahayag mahitungod sa mga babaye diha sa seksyon II? Unsaon nato pag-awhag ang mga batan-ong babaye nga atong kaila sa pagsunod sa piho nga tambag ni Presidente Oaks ngadto kanila diha sa seksyon III?
Russell M. Nelson, “Ang Partisipasyon sa mga Sister sa Pagpundok sa Israel”
Kon nagtudlo ka sa Relief Society, ikonsiderar ang pagbahin sa mga sister ngadto sa upat ka grupo ug sa paghangyo sa matag grupo sa pagbasa mahitungod sa usa sa upat ka mga pagdapit diha sa mensahe ni Presidente Nelson. Ang mga grupo mahimong maghisgot kon unsay ilang ganahan mahitungod sa pagdapit, ilang mga kasinatian sa pagbuhat niini, ug mga ideya kon unsaon nila sa pagbuhat niini sa umaabut. Dayon ang matag grupo mahimong mopaambit ngadto sa tanan sa unsay ilang nahisgutan. Kon nagtudlo ka sa mga tighupot sa priesthood, mahimo nimo silang hangyoon sa pagpangita og mga pamahayag diha sa mensahe ni Presidente Nelson nga nagpakita kon unsa ang pagbati sa Langitnong Amahan mahitungod sa Iyang mga anak nga babaye. Unsay atong mabuhat aron sa pagsuporta ug pag-awhag sa pag-apil sa mga sister diha sa pagpundok sa Israel?
M. Russell Ballard, “Ang Panan-awon sa Katubsanan sa mga Patay”
Mahimo nimong dapiton ang mga miyembro nga modawat sa pagdapit ni Presidente Ballard ug mobasa sa Doktrina ug mga Pakigsaad 138 sa dili pa ang inyong diskusyon. Hangyoa ang mga miyembro sa pagpaambit sa ilang mga kasinatian ug mga panabut gikan niini nga seksyon panahon sa miting. Ang mga pangutana sama niini makatabang sa mga miyembro nga makasabut sa kaimportante niini nga pinadayag: Sa unsang paagi kini nga pinadayag makahatag kanato og kahupayan? ug Unsa nga mga kamatuoran nga anaa niini nga pinadayag ang makaapekto ‘sa paagi sa atong pagpakabuhi matag adlaw’?
Bonnie H. Cordon, “Pagkahimong usa ka Magbalantay”
Aron matabangan ang mga miyembro sa paghunahuna og mga paagi nga mahimo silang molambo sa ilang mga paningkamot sa pagpangalagad, mahimo nimo silang bahinon sa tulo ka grupo ug hangyoa ang matag grupo sa pagbasa sa usa sa tulo ka gingalanan nga mga seksyon sa mensahe ni Sister Cordon. Dapita sila sa pagpaambit sa mga baruganan sa pagpangalagad nga ilang nakat-unan. Sa unsang paagi ang pagpaningkamot nga mosunod niini nga mga baruganan makatabang kanato nga “mahimong mga magbalantay nga gikinahanglan sa Ginoo nga kita mahisama”? Dapita ang mga miyembro sa pagpaambit og mga kasinatian sa diha nga ang pagpangalagad sa laing tawo nakatabang kanila nga mobati nga nailhan ug gihigugma sa Manluluwas.
Jeffrey R. Holland, “Ang Pangalagad sa Pagpasig-uli”
Makasugod ka og usa ka diskusyon mahitungod sa mensahe ni Elder Holland pinaagi sa pagdapit sa mga miyembro sa paghunahuna og usa ka relasyon sa ilang mga kinabuhi nga nagkinahanglan og pagkaayo o pakig-uli. Dayon mahimo silang mosiksik sa mensahe ni Elder Holland, nga mangita kon sa unsang paagi si Brad ug Pam Bowen nakatabang sa ilang amahan nga mamaayo. Unsa nga mga panalangin ang miabut gikan niini nga paningkamot? Unsa nga mga panabut ang maangkon sa mga miyembro nga makatabang nila sa pag-ayo sa ilang kaugalingon nga mga relasyon?
Neil L. Andersen, “Nasamdan”
Aron masugdan ang mensahe ni Elder Andersen, mahimo ninyong basahon og dungan ang Lucas 10:30–35. Sa unsang paagi nga kitang tanan susama sa tawo nga nabiktima sa mga tulisan? Sumala ni Elder Andersen, sa unsang paagi si Jesukristo mao ang “atong Maayo nga Samarianhon”? Unsaon nato pagdawat ang Iyang pagpang-ayo? Tingali mahimo nimong dapiton ang mga miyembro sa pagpaambit og mga paagi diin ang Manluluwas miayo sa ilang mga samad o mga samad sa mga minahal. Mahimo usab nilang siksikon ang mga pulong ni Elder Andersen sa pagpangita og makadasig nga mensahe nga mahimo nilang mapaambit sa usa ka tawo nga samaran.
Russell M. Nelson, “Ang Sakto nga Ngalan sa Simbahan”
Mimando si Jesukristo nga ang Simbahan pagatawgon sa Iyang ngalan. Makatabang ka sa mga miyembro nga mapalambo ang ilang tinguha sa pagsunod niini nga direksyon pinaagi sa pagdapit kanila sa pagsiksik sa mensahe ni Presidente Nelson, nga mangita sa mga rason nganong “ang ngalan sa Simbahan dili mausab.” Dayon, dapita sila sa pagsiksik sa katapusan sa mensahe ni Presidente Nelson alang sa mga saad nga iyang giingon nga moabut samtang maningkamot kita sa “pagpahiuli sa saktong ngalan sa Simbahan sa Ginoo.” Unsa ang atong mahimo sa pagtabang niini nga paningkamot?
Henry B. Eyring, “Sulayi, Sulayi, Sulayi”
Si Presidente Eyring mihatag og “duha ka labing importanting mga pangutana”: “Unsay angay nakong buhaton aron madala ang ngalan [sa Manluluwas] ngari kanako?” ug “Unsaon nako sa pagkahibalo nga ako naglambo?” Tingali mahimo nimong isulat kini nga mga pangutana diha sa pisara ug dapiton ang mga miyembro sa pagpaambit og mga panabut nga ilang naangkon mahitungod niini nga mga pangutana gikan sa mensahe ni Presidente Eyring ug sa ehemplo ni Sister Eyring. Si Presidente Eyring naghisgot usab sa kanta nga “Maninguha Kong Mahimong Mahisama Kang Jesus” (Songbook sa mga Bata, 40–41). Unsa ang madugang sa mga pulong niini nga kanta ngadto sa diskusyon?
Dale G. Renlund, “Magpili Kamo Niining Adlawa”
Ang mga miyembro mahimong maghunahuna og tawo nga gusto nilang awhagon sa pagsunod sa plano sa Langitnong Amahan, sama sa usa ka sakop sa pamilya o usa ka tawo nga ilang gipangalagaran. Dayon mahimo nilang ribyuhon ang mensahe ni Elder Renlund aron madiskubrihan kon unsa ang gibati sa Langitnong Amahan ug ni Jesukristo ngari kanato. Giunsa Nila kita sa pagtabang nga mopili sa pagkamasulundon? Unsa ang gisugyot sa Ilang ehemplo kon sa unsang paagi kita makapalambo sa atong mga paningkamot diha sa atong mga pamilya ug sa atong pagpangalagad?
Gary E. Stevenson, “Pagbantay sa mga Kalag”
Kadtong imong gitudloan tingali nakapangutana og sama niini nga pangutana gikan sa mensahe ni Elder Stevenson: “Unsaon nato pagkahibalo nga nangalagad kita sa paagi sa Ginoo?” Tingali makabenipisyo sila sa paghisgot sa posibling mga tubag niini nga pangutana nga ilang nakit-an diha niini nga mensahe. Sa laing paagi, mahimo ka nga modala og hulagway sa Manluluwas isip usa ka magbalantay (tan-awa sa Libro sa mga Hulagway sa Ebanghelyo [2009], nu. 64) ug dapita ang mga miyembro sa pagpaambit og usa ka kamatuoran gikan sa mensahe ni Elder Stevenson nga girepresentaran sa hulagway. Ang mga miyembro makahimo dayon sa pagpaambit sa mga butang nga nadasig sila sa pagbuhat isip resulta sa diskusyon.