Ua Na’o Tusiga Faatekinolosi: Talavou Matutua
Mauaina o le Olioli i le Faia o le Galuega a le Alii
I le avea ai ma talavou matutua, e pisi le olaga. E tele naua mea e mafai ona tatou faia: e faalauteleina ai a tatou aoaoga, sailia o a tatou soa e faavavau, filifilia se matata, amataina o se aiga. Ma faatasi ai ma na mea lelei uma, ua uunaia foi i tatou “ia maua pea o faia le galuega a le Alii.”1
“Ua oo ina tatou malamalama manino atili i le uiga o la tatou matafaioi i le faanatinatiina o le galuega o le faaolataga. A o tatou faia galuega faafaifeautalai a tagata o le Ekalesia, … galuega o le malumalu ma talafaasolopito o aiga, ma aoao atu le talalelei o se vaega masani o o tatou olaga, o le a tatou maua le olioli sili ma faaeeina atu i meaalofa faaleagaga tatou te manaomia e faamalosia ai le Ekalesia.”2
O ni nai talavou nei e pisi tele, o e ua maua le olioli i le faaavanoaina o le taimi mo le galuega a le Alii.
Talafaasolopito o Aiga: Amata Loa Nei
“E tele mea na faia e le Toefuataiga mo au lava ia ona ua ou iloa e mafai ona faatasi aiga e faavavau,” o le tala lea a Itumeleng Tlebere mai Maseru, Lesoto. “Ua mafai ona ou vaai i ou matua matutua ma ou tuaa ua maliliu. O le mea lena ou te fiafia tele ai i le talafaasolopito o aiga. Ona o au o le augatupulaga muamua i le Ekalesia, o lea ua tele ai ni au galuega e fai mo i latou.”
E iloa e Itumeleng mai aafiaga o le sailia i luga o faamaumauga ma faamatalaga e ono faigata, ae o loo ia uunaia isi talavou matutua ia auai i o latou talafaasolopito o aiga: “Na o le amata lava ona faia. … Ua faaoo mai e le talafaasolopito o aiga se lagona faafetai mo mea uma ua ia te au.” E mafai foi ona faia lea lava mea mo oe.
Auaunaga: Avea ma Aao o le Atua
O Lusi Fergeson mai Iuta, ISA, na faasoa atu le auala na fesoasoani ai le auaunaga ia te ia i le vaiaso sili ona leaga o lona olaga—ae i se ala e lei mafaufauina. O le vaiaso mulimuli mo suega i le aoga, o se vaiaso faigaluega pisi, ma sa faatoa uma ona faauma e lana uo tama le la faigauo. Ona ia fai mai lea, “Sa galo ia te au, ae sa ou fuafua ma lau soa o auaunaga e fai ni sikoni mo uso na tofia i ai i maua e auauna atu i ai.”
A o la taoina faatasi sikoni, sa faalogologo le soa galue a Lusi, agaalofa, ma tuuina mai ni fautuaga. “O le faia ma le tilivaina o sikoni [muffins] e le o se mea e taua tele pe faia ai se eseesega tele,” na manatunatu ai Lusi. “Ae ina ua uma ona tuua au e lau soa i le fale, sa ou iloaina ai o le mea tonu lava lea sa manaomia ona ou maua e maua ai se lagona lelei ma o nisi taimi e auina mai ai e le Atua isi tagata e fai ma Ona aao. O le mea na manaia ia te au o le fesoasoani lea na sau mai lau soa a auauna nai lo o uso na tofi mai ia te au. Ou te faafetai ona sa ia fesoasoani mai ia te au ia ou lagona le pei e le o tuua na o au ma e alofagia au.”
Galuega Faafaifeautalai: Ola Ina ia Avea ma se Faataitaiga
E le faapea e mana’omia ona avea oe ma se faifeautalai faamisiona e faasalalau atu le talalelei. Na faamatala e Vennela Vakapalli, mai Andhra Pradesh, Initia, “Pe a ou alu i pasi, pe a ou alu i le nofoaafi, ou te tatalaina le Tusi a Mamona ma faitau i ai. Ma e toatele tagata e fesili mai ia te au.”
Na faasoa mai Ashlee Dillon mai Iuta, ISA: “E ui ou te lei alu i se misiona ae e le faapea e le o au o se faifeautalai. Nai lo le tuua o lou aiga e auauna i le Alii, ou te auauna i le Alii ma lou aiga. Ou te auauna atu i isi, ma o loo ou ola foi o se faataitaiga o se soo o Iesu Keriso.”
Tulaga Faamatua: Aoao Atu Fanau i le Talalelei
O Ingrid de Bastian Ortiz, mai Veracruz, Mekisiko, o se tina e 26 tausaga le matua e toatolu le fanau. Ua ia faamatala mai, “I le avea ai ma ni matua talavou o se fanau laiti, e i ai aso e lofituina ai, faatasi ai ma feau e le uma, atoa ai foi ma le gauaiga o loo manaomia mai e tamaiti. Ae ui i lea, tatou te lagonaina se tiutetauave maoae e aoao atu le talalelei i a tatou fanau ina ia latou iloa o i latou o fanau a le Atua.
“O lou tiute o se tina o le fesoasoani atu lea ia i latou ia iloa mo i latou lava, o loo i ai se fuafuaga o le fiafia a lo tatou Tama Faalelagi mo i latou.”
E tusa lava pe le o oe o se matua, e mafai lava ona e faia se vaega e fesoasoani ai e aoao atu tamaiti. “E matua taua tele le iloa e tamaiti o nei mataupu ma aoaoga faavae,” o le tala lea a Ingrid, “ma e mafai ona tatou saofaga moni atu o ni tagata matutua nofofua pe ua faaipoipo i nisi o valaauga a le Peraimeri ma le vasega pepe.”
O i matou uma o talavou matutua pisi. Ae po o a lava ou tulaga atonu e i ai, e mafai ona e maua ni auala faigofie e faia ai le galuega a le Alii i vaega uma o lou olaga—o mea tetele ma mea laiti.