Sili Atu le Taua Nai lo se Taulima Siliva

Ata

bracelet

Ata na tusia e Emily Lui

Ina ua fesiligia au e taitaia se talanoaga i le Aualofa e uiga i le valaaulia a le Faaola e fafaga Ana mamoe, sa ou filifili ai afai ou te manao e faaosofia ia tamaitai, e tatau ona ou faia se mea mo se tasi o Ana mamoe.

Sa ou tuuina faatasi lou lototele ma valaaulia se uso e le toaga i le lotu e sau i se gaoioiga a le Aualofa faatasi ma au. Sa ia taliaina lau valaaulia ma sa matou maua se taimi fiafia. Sa ou lagonaina o se faataitaiga lelei lenei, ma sa ou naunau e faasoa atu lou aafiaga. Ae e tele atu mea na i ai i le Alii e aoaoina ai au.

I se tasi taeao a o fai ou lavalava, na ou iloa ai ua misi lau taulima siliva. O lenei taulima sa tuuina mai ia te au o se meaalofa o le aso fanau a o ou asiasi atu i Farani, ma e i ai sona uiga faapitoa ia te au. Sa amata ona ou sueina i nofoaga e sili ona talafeagai, ae sa le mafai ona ou mauaina. Ona ou tau lea ia te au lava ia afai na ona ou tatalo lava, o le a mafai ona vave maua lau taulima.

Ina ua uma lau tatalo, sa ou tilotilo i nofoaga uma lava. E lua aso sa ou tatalo ai ma le naunau ma sailiili ma le totoa. Sa ou aioi atu i le Tama Faalelagi e fesoasoani mai ia ou maua, ae sa le mafai lava ona ou mauaina. Sa mamafatu lou loto ona o lenei taulima sa pele ia te au.

I se tasi afiafi sa ma tatalo ai ma lou atalii i tafatafa o lou moega. Ina ua uma le ma tatalo, sa ia pikiina i luga se mea ma tuu mai ia te au. O lau taulima! Sa ia mauaina i lalo o le moega. Atonu na ou misia i lau sailiga. Sa ou tagi i le fiafia ua toe maua mai.

Na faafuasei lava, ona oo mai se lagona ia te au: “O e tatalo ma le naunau faapea mo ou uso i le Ekalesia? Pe o taua ea i latou ia te oe e pei o lau taulima? Ae faapefea ou uso i fafo atu o le Ekalesia? Po o e tatalo foi mo i latou?“

Ina ua ou faasoa atu lou aafiaga i lau taulima na leiloa i le Aualofa, sa matagofie le matou talanoaga. Sa ou tau atu i tamaitai sa ou aoaoina, a fetalai mai le Faaola ia i tatou e fafaga Ana mamoe, e tatau ona tatou manatua “ua tele lava le taua o agaga i le silafaga a le Atua” (Mataupu Faavae ma Feagaiga 18:10). E finagalo o Ia ia tatou mataala ia i latou o siomia i tatou ma alolofa, fetausiai, ma tatalo ma lo tatou malosi atoa mo i latou. A tatou faia lena mea, o le a tatou iloa ai e sili atu ona taua tagata taitoatasi nai lo o se taulima siliva.