Na o Tusiga Faatekinolosi
Po o Taofia Oe e Aso ua Mavae?
Ua uma ona totogi e le Faaola le tau. Uu Lona aao ma agai pea i luma.
I se taimi e lei leva atu, na valaaulia ai matou e lo matou epikopo a le matou uarota e mafaufau i nisi o vaivaiga po o agasala e mafai ona matou tuua i le laulau o le faamanatuga ina ia aveese e Iesu Keriso. E i ai ni agasala sa ou tauaveina ia te au ma le olaga atoa talavou matua, sa ou taumafai e faatoilalo ae sa lei mafai ona faatoilaloina e ala i le tatalo po o lou lava malosi. E ui i lou tuputupu ae i le aluga o tausaga, ae sa ou iloaina e tatau ona ou faatoilaloina i latou e faaauau ai pea ona alualu i luma.
O le aso Sa ina ua mavae le lui a le epikopo, sa ou filifili ai o le a ou tuua na o se tasi o au agasala i luga o le laulau o le faamanatuga, o se faatusa faaletino o le Faaola ma Lana taulaga togiola. A o ou sauni e ai ma inu i le faamanatuga, sa ou manatua o le ie e faatusa i Lana ie falelauasi, ma le falaoa ma le vai e faatusa i Lona tino ma le toto.
Faatasi ai ma le faamaoni ma le faamoemoe atoa o le loto, sa ou faafouina au feagaiga o le papatisoga ma faia se tatalo i lou loto, ma ole atu i le Tama Faalelagi mo se fesoasoani ma le faia o se tautinoga e tuua ai lenei agasala. Ona tupu ai lea o se mea ou te lei mafaufauina: ua aluese atoa lava lou manao e agasala. Sa tele atu ni taimi sa ou toe taumafaia ai lenei mea, ma o le mea lava lea e tasi na tupu i isi agasala. Pe ua lelei tele ea le tulaga ua moni ai?
Faaogatusaina o Lo’u Loto ma Lona [Finagalo]
O le vaiaso na sosoo ai, sa ou iloa ai le agasala sa ou manao e ave i le laulau o le faamanatuga, ae sa ou le lagonaina le saunia e tuua. O le toe tepa i tua, ua ou iloa ai e lei i ai lou loto i le tulaga e tatau ona i ai. Sa lei lava lou faamaoni e tautino atu ai se suiga. Ae sa ou iloaina le tele o le faatiga o lea agasala i le Tama Faalelagi. Sa ou iloaina e tatau ona faaogatasi lou loto ma Lona finagalo ma faaogatotonuina lo’u olaga ia te Ia ina ia saoloto. O lea sa ou faia ai le mea sili ou te mafaia ina ia taunuu lea mea.
Sa ou aloese mai i soo se faaosoosoga e mafai ona oo atu ai i lenei agasala. Sa ou suia le ala sa ou faitau ai au tusitusiga paia i aso uma ma mafaufau loloto i ai ma faaaogaina i lou olaga. Sa ou taulai atu ma le faamaoni i lau tautinoga e sui, ma sa ou saili i aso uma e saili le finagalo o le Alii nai lo lou loto. Sa ou faamuamua o Ia, aua sa ou iloa e le mafai ona ou tuua lenei agasala e aunoa ma le mana o le Togiola a le Faaola. O le faaauau pea ona faamuamua o Ia, sa mafai ai ona ou tuuina atu lenei agasala i le laulau o le faamanatuga. Na iu lava ina ou saoloto mai se mea sa taofia ai au i le tele o tausaga.
E ala i lenei faagasologa, sa tupu a’e le latalata atili i lou Tama Faalelagi ma lou Faaola. Sa ou mafaufauina o loo Laua silasila mai ia te au mo nei tausaga uma i le onosai ma le alofa — i le iloa, mulimuli ane, o le a ou lafoaia agasala ua faasalaveia faaleagaga ai lou alualu i luma. Ma ina ua ou sauni e tuuina atu, sa i ai Iesu Keriso iina e siitia a’u—e tago mai i lo’u lima ma aumai ia te a’u le faamagaloga ma le malosi. Ua uma ona Ia saunia le ala mo a’u ina ia ou saoloto ai mai a’u agasala e ala i Lana Togiola. Na Ia totogiina le tau mo o’u vaivaiga, mea sese, ma agasala. Sa na o lo’u faalagolago ia te Ia na mana’omia.
E Mafai ona E Agai i Luma
I lena taimi, sa ou faitau ai i ni upu mai ia Elder Richard G. Scott (1928 – 2015) o le Korama a Aposetolo e Toasefululua lea na ou maua ai sina uunai itiiti na ou manaomia: “Afai o loo le mautonu lou olaga ma ua e lagona le le logolelei ma le le agavaa … , aua e te popole. Ua uma ona Ia silafia na mea uma. O loo Ia faatalitali mai ia te oe e te tootuli i le lotomaualalo ma faia nai laa muamua. Tatalo mo le malosi. . . . Tatalo ia liligi ifo le alofa o le Faaola i lou loto.1
Ina ua matou usuina le pese “Ou Te Tu Ma Ofo” (o le pese e sili ona ou fiafia i ai) i le vaiaso na sosoo ai, e tatagi moni lava upu taitasi; Sa ou maofa lava—i le maofa ona o mea sa ou tauivi ai mo le silia ma le sefulu tausaga, na aveesea mai ia te au. I le maofa ai ona o le mana o le Togiola a le Faaola, e mafai ai ona ou agai i luma. E mafai ona Ia faamaloloina uma agasala ma manu’a ma e le tuua lava se faamaoniga o ia mea. E le manaomia ona ou toe taofia mai e ala i lou taimi ua tuanai.
O loo tele pea mea ou te aoaoina ma faatoilaloina, ae o lou olaga o loo i ai i le ala e agai i luga. Ua ou lagonaina le olioli ma le filemu sili atu. Ua faateleina lou agaga faafetai. Ua ou latalata atu ma faamalosia lau molimau i le Tama Faalelagi ma le Faaola. O aso uma lava ou te filifili ai e toe taumafai, e tasi se laa ou te latalata atili atu ai ia i Laua ma le tagata La te iloa e mafai ona avea ai a’u.