O le Ala ua Faia ai e le Autalavou Matutua se Eseesega i le Toefuataiga Faifai Pea

Ina ua saunoa e uiga i la tatou augatupulaga, sa aoao mai Peresitene Russell M. Nelson, “o loo e ola i le ‘itula lona sefulutasi.’ Ua folafola mai e le Alii o le taimi mulimuli lenei o le a Ia valaaulia ai e e galulue i Lona tovine e faapotopotoina le au filifilia mai itu e fa o le lalolagi. (Tagai i le MF&F 33:3-6.) Ma o oena auina mai ia auai i lenei faapotopotoina.”¹

Mafaufau e uiga i le malosiaga o le 65,000 faifeautalai faamisiona o loo faasoa atu le talalelei i le aso atoa, i aso uma, i le lalolagi atoa. Mafaufau i talavou matutua uma o loo osia feagaiga i le malumalu, faaaogaina tatau le perisitua toefuataiina ma faamanuiaga o le malumalu ma osifeagaiga ina ia faamaoni, ia faamalolosia o latou aiga, ma ia fausia le malo o le Atua i le lalolagi. Mafaufau i le autalavou matutua o loo auauna atu o ni taitai o le Ekalesia i le lalolagi atoa. Mafaufau ia i latou o e o loo fetaomi atu i luma e mulimuli ia Iesu Keriso e ui lava i mea e le fiafia i ai. Ua avea le autalavou matutua ma se vaega taua o le Toefuataiga mai le amataga. Ma o le Toefuataiga faifai pea ua avea ma se vaega taua o olaga o talavou matutua e le mafaitaulia o le Ekalesia.

Mo le toatele o i tatou, o lo tatou auai i le Toefuataiga e mafua mai i mea ua aoaoina ai i tatou. Mo Vennela Vakapalli, o se taulealea matua liliu mai o Andhra Pradesh, Initia, “o le Toefuataiga e faatatau i le sailia o faaaliga. Na sailia e Iosefa Samita faaaliga i le vao. Sa ia filifili ma le Alii, sa ia faatalitali mo le tali, sa onosai o ia. O le mea lena ou te fiafia i ai.” Ua faamatala mai e Vennela, “ae ou te lei faalogo e uiga i le Toefuataiga, sa le tele se mea na ou iloa e uiga i le sailia o faaaliga. O se tasi o mea aupito sili e ofoofogia ia te au, o le tele o lona faaaluina o lona taimi e maua ai faaaliga mai le Atua. O le mea lena sa ou aoaoina mai le Toefuataiga.”

O Ema ma Iakopo Roberts, o se ulugalii talavou mai Iuta, ISA, ua ioe o le Toefuataiga e faatatau i “faaaliga faifai pea” — mo i tatou lava ma mo le lalolagi — “faapea e mafai ona tatou maua se perofeta, o se failauga i lenei lalolagi mai le Atua, ia mautinoa po o a lava luitau e aumai e le lalolagi, ua tatou maua se tasi o loo galue ma tatalo ma talanoa ma le Atua ina ia mautinoa ua tatou saunia ma mafai ona feagai ma soo se luitau e aumaia e le lalolagi a o suia.”

“O le tele o le malamalama e oo mai i le Toefuataiga, ua faigofie ai lou olaga ma faaitiitia ai le atuatuvale,” o le tala lea a Iakopo. E oo mai uma ma le mautinoa “o loo i ai se Atua e alofa ma leoleo ia i tatou,” o le tala lea a Ema. “O lona faamoemoega o lo tatou fiafia. I le avea ai ma talavou matutua, e mafai ona tatou matua faatuatuaina ma mulimuli ia te Ia aua ua tatou iloa o Lana sini o lo tatou fiafia. Ua tatou iloa o i tatou o ni tagata e faavavau, ma ua tuuina mai ia te au le faamoemoe tele ma le faatuatua, o soo se mea lava ou te faia i le taimi nei ma soo se mea sese ou te faia i le taimi nei, e mafai lava ona ou salamo ma ua ou maua lenei taimi e alualu ai i luma ma aoao.”

O lena ituaiga o faamautinoaga na fesoasoani foi ia Ramona Morris, o se talavou matua mai Barbados, ina ua ia faatoa aoao i le Toefuataiga. Faatasi ai ma isi mea, sa ia maua se molimau faapea “O loo i ai le Tama Faalelagi iina mo i tatou. E aumaia e le Toefuataiga le filemu ia i latou o e fesiligia o latou olaga ma fesiligia le fuafuaga a le Atua mo i latou.”

Ae e ui lava o le malamalama i le Toefuataiga ua aumaia le manino i lona olaga, ae ua ia tautino mai foi “o le mamao ese tele mai le laumua o le Ekalesia, e faigata ona fesootai ma le talalelei, ae ona sa malosi lau molimau i le talalelei toefuataiina, ua ou iloa ai lena mea i le mamao ese e pei ona ou i ai, ou te lagona lava le pei o se vaega o le Toefuataiga, e le o tuua na o au.”

Ma e le o tuua na o ia. Ua auai le autalavou matutua i le lalolagi atoa i le Toefuataiga e ala i auaunaga i le malumalu, talafaasolopito o aiga, ma le galuega faafaifeautalai. Faatasi ai ma le malamalama o faaaliga faaletagata lava ia ua tatou maua mai le aoaoina e uiga i le Uluai Faaaliga a Iosefa Samita ma le Toefuataiga, e mafai ai e i tatou uma ona saili e iloa le finagalo o le Atua ma le vaega e mafai ona tatou faia i le Toefuataiga faifai pea.

Ata

world map

Faafanua mai le Getty Images

Atonu o i tatou o ni talavou matutua, ae e mafai ona avea i tatou ma taitai i le Ekalesia i le taimi nei. E ui ina sa na o le pau lea o le tagata o le Ekalesia i lona aiga, o Janka Toronyi mai Győr, Hanikeri, ua faamalosia e ona uso a talavou matutua i le auai i isi vaega o le Toefuataiga: “O se vaega o au uo ua o i misiona, ma e ese le manaia o le vaaia o lo latou alualu i luma ona latou toe foi mai lea ma ua latou matuai matutua lava e ala i o latou aafiaga uma lava. O se aafiaga sili mo i tatou uma lava. Ma e ofoofogia i taimi uma le vaaia o au uo talavou nofofua matutua o loo auauna atu i o latou valaauga ma o nisi taimi e oo lava i avanoa latou te faia e i latou lava, e pei o le volenitia e avea ma faufautua i konafesi a le MMA (Mo le Malosi o le Autalavou). Ou te lagona e pei o le Toefuataiga e le o taimi uma e aoao ai tagata e uiga i le talalelei — ae e faatatau i le faamalolosia o tagata o le Ekalesia o loo ia i tatou.”

Ua malamalama le autalavou matutua i Hanikeri o i latou o taitai o le Ekalesia i le lumanai. “E manaomia i tatou ma e manaomia ona tatou fuaina i le galuega, lea e lofituina i nisi taimi,” o le tautino mai lea a Janka. “Ua faanatinatiina e le Alii le galuega ma o i tatou o se vaega o lena mea. O nisi taimi tatou te mafaufau ai, ‘E faapefea ona ou faia lenei mea?’ Ae e manaia le vaai ua i ai i o tatou taitai le faatuatuaga tele ia i tatou. O se uunaiga mo i latou o e alolofa i le Ekalesia ma e i ai se molimau malosi, aua ua tatou iloa o le a i ai se aso o le a tatou nafa ai ma i tatou. E tatau ona tatou tauaveina le tiutetauave mo lo tatou lava alualu i luma faaleagaga.”

Na auai Sean ma Stefany Iosefa mai Ausetalia i Sisifo i le Toefuataiga e ala i le fautuaina o le autalavou i la latou uarota. “Mo au, o le auai i le Toefuataiga o le fesoasoani lea i tupulaga o le lumanai ia malamalama i le uiga o le talalelei ma le auala e mafai ona fesoasoani ai ia i latou ma isi i o latou olaga,” o le tala lea a Stefany. “E mafai ona tatou fesoasoani e fausia se faavae e malosi atu mo le Ekalesia i lo tatou atunuu i se taimi mulimuli ane.”

“Matou te fia fesoasoani i le autalavou e maua se molimau i le Tusi a Mamona ma Iosefa Samita ma iloa o i latou moni lava o fanau a le Atua mo i latou lava,” o le faamalamalama mai lea a Sean. “Matou te le mananao ina ia avea ma se mea sa na o na latou usuina i le Peraimeri — matou te mananao ia latou iloa moni lava e moni.”

Mo Vennela, o le ola ai i le talalelei i Initia e le faigofie i taimi uma, ae na te silafia o le malosi o le autalavou matutua o le a uunaia ai isi ma fesoasoani i le alualu i luma o le Toefuataiga. “O iinei, e matuai faamaoni uma le autalavou matutua. Latou te vaavaai mo avanoa e faasoa mai ai a latou molimau,” o lana tala lea. “E pei i matou o paionia i Initia. Matou te o mai nofoaga eseese ma o nisi o i matou e tuua lava o matou aiga. E mafai ona faigata le olaga iinei, ae matou te filifili lava e ola i le talalelei. Ua tuuina mai e tusitusiga paia ia te au le tele o le faamoemoe, malosi, ma le lototele.”

Po o fea lava o tatou i ai, o ni talavou matutua, e mafai ona faaauau pea ona tatou maua se uunaiga mamana i le Toefuataiga faifai pea e ala i lo tatou faatuatua ma le tuuto atu i le talalelei.

O i tatou o le lumanai o le Ekalesia. Ua tatou i ai i le taua mulimuli. E faalagolago le Tama Faalelagi ia i tatou e fesoasoani ia te Ia e faia Lana galuega —Lana galuega e suia ai olaga e faavavau. Ua Ia silafia ua lava lo tatou malosi e fetaomi atu ai pea i luma ma finau faasaga atu i mea uma ua i ai i le tiapolo. Ma ua atuatuvale Satani. Ua ia iloa o loo ia tauina se taua faiaina mulimuli aua o le galuega a le Alii o le a manumalo.

“Ua tatou iloa o loo faanatinatiina e le Alii le galuega ma e leai se tasi e mafai ona taofia lena mea,” o le tala lea a Janka. “Ua matou iloa o le a tupu po o le a lava. Ae e tatau ona tatou filifili pe o le a avea i tatou ma sona vaega ma fesoasoani ia agai i luma pe matamata atu i ai mai le autafa. Ua ia i tatou le faitalia e avea ai ma sona vaega, ma ua ia i tatou le molimau ina ia mafai ona filifili le mea sao ma filifili e mulimuli ia Keriso. E tatau ona avea i tatou ma sona vaega.”

O lea, e pule i tatou e filifili po o le itu a ai tatou te i ai.

E pule i tatou pe maua le lototele e tutu atu ai mo mea tatou te talitonu i ai.

E pule i tatou pe saili atu i faaaliga patino mo o tatou olaga.

E pule i tatou pe faataga luitau faigata tatou te feagai e faamalosia lo tatou faatuatua i le Faaola.

E pule i tatou pe mulimuli ia te Ia ma faia mea uma tatou te mafaia e aumai ai isi ia te Ia.

E pule i tatou pe tumau seia oo i le iuga i le auala sili tatou te mafaia.

Ua tatou i ai moni lava i aso e gata ai. Ma taitaiina le Ekalesia i le mea ua taua e Peresitene Nelson o le “tisipenisione aupito sili ona faatauanau i le talafaasolopito o le lalolagi”² e foliga mai o se tiutetauave e matua taufaafefe tele. Ae mafaufau i ai — ua lava le faatuatuaina o i tatou e le Tama Faalelagi ma ua taofia ai i tatou ina ia tatou i ai i lenei lalolagi i lenei tulaga faapitoa, o le taimi lea tatou te feagai ai ma le anoanoai o faaosoosoga ma mea faalavefau ma le tele o manatu faafeagai.

E ala i le auina mai o i tatou iinei i le tisipenisione aupito sili ona taua, e lei faatuina i tatou e le Tama Faalelagi mo le toilalo. Na te silafia o tatou gafatia, lo tatou malosi, lo tatou lototetele, ma iu ai ina Ia silafia e mafai ona tatou faia se eseesega i le Toefuataiga o le Ekalesia, e tusa lava po o le a lo tatou matutua po o le tulaga faale-faaipoipoga. Po o le a lava le faigata o o tatou tofotofoga, pe o le a le faigata o le taitaia ma le faasoaina atu o le talalelei i le salafa o le lalolagi e ono foliga mai ai, faatasi ma Ia i lo tatou itu, o ai e mafai ona faasagatau ia i tatou? O le a Ia fesoasoani ia i tatou e ausia mea e le mafaia.