Sa Na o se Faamanuiaga na Mafai ona Ou Tuuina Atu
Jonathan Mafra Sena de Santana
Santa Catarina, Pasila
Ata na tusia e Allen Garns
Sa ou faamaeaina le aoga faaloia i le taimi o le aso fanau muamua o lou afafine. Sa ma tulimatai atu ma lou toalua e faamanatu lou faauuga, le aso fanau o le ma tama teine, ma avanoa fou o le a ma maua, ae e leai se mea na tupu e pei ona fuafuaina.
Sa leai sau galuega i le faatoa maea ai o lou faailoga tikeri ma sa faigata ona maua se galuega. E lei leva, ae oo mai faafitauli tautupe. O le faailogaina faigofie o se aso fanau o le a faigata.
Ina ua mavae le tele o talanoaga ma lou toalua, sa ma taliaina lo maua tulaga. Sa le faigofie ia te au i le avea ai ma se tama le le mafai ona faatauina e oo lava i se meaalofa faigofie mo lou afafine ma vaaia lagona le fiafia o lau ava pele.
Ou te lei malamalama i le mea na tupu. Sa ou tatalo ma ole atu i le Tama Faalelagi e fesoasoani mai ia ou malamalama i mea na Ia faamoemoeina mai ia te au. Na faafuasei lava, e peiseai o se leo ua tautala mai i lou mafaufau, sa ou faalogo i upu nei: “O loo ia te oe se mea e sili atu le taua nai lo soo se isi lava mea i lenei lalolagi. O loo e umia le perisitua. O le a se meaalofa sili atu e mafai ona e tuuina atu i lou afafine nai lo se faamanuiaga faaleperisitua?”
Na maligi ou loimata a o ou mafaufau i le uiga o le perisitua ia te au. Sa faatumulia lou loto i le agaga faafetai ina ua ou mafaufau faapea o le perisitua o le mana lea e mafai ona tuufaatasia lou aiga mo le faavavau atoa.
Sa ou faasoa atu ou lagona i lou toalua. Sa ou fai atu ia te ia o le ofoina atu o se faamanuiaga i le ma tama teine na pau lea o le mea e mafai ona ou tuuina atu. Sa ma filifili o lenei mea o le a aumaia ai le fiafia ma le filemu ia te ia, ma o le a lava lena.
I le aso fanau o le ma tama teine, o uo, aiga, ma tuaoi na aumaia se keke ma ni teuteuga faigofie. Sa matou faafetai lava i le faamanatuina o lenei aso faapitoa faatasi ma i latou matou te alolofa i ai. I lena po, sa tuu atu ou lima i luga o le ulu o lou afafine ma tuu atu ia te ia se faamanuiaga faaleperisitua. Sa ou faamanuiaina o ia i mea uma na musuia au e le Agaga o le Alii ou te fai atu.
Sa matou i ai pea i se vaitaimi o suiga ma luitau e faatatau i le leai o se galuega ma tupe. Ae e oo lava i le lotolotoi o le faanoanoa ma le le fiafia, e oo mai le filemu ma le mafanafana ia i matou e ala i lo tatou Faaola, o Iesu Keriso. E leai sou masalosalo o le avea ma se tagata O Le Ekalesia a Iesu Keriso o le Au Paia o Aso e Gata Ai ma le mauaina o le mana o le perisitua o se faamanuiaga. Na pau lea o le mea sa mafai ona ou tuu atu i le aso fanau o lou afafine, ma sa sili atu nai lo le mea na manaomia.