O Mea na Faamamafa Mai mai le Konafesi Aoao Faaleafatausaga Lona 190

I le lotolotoi o le le mautonu, e faitau miliona tagata na maua se taimi o le filemu i le taimi o le konafesi aoao na faia i le aso 3–4 o Oketopa, 2020. Na faasino mai e taitai o le Ekalesia i tatou ia Iesu Keriso i savali o le lotogatasi ma le alofa, faamoemoe ma le faamalologa, ma le filemu i le faamoemoega paia.

Sa aoao mai e Peresitene Russell M. Nelson i tatou i le ala e maua ai faamanuiaga o le avea ma tagata o le Atua.

“A o e filifili e tuu atu i le Atua e manumalo i o outou olaga, o le a outou maua mo outou lava o lo tatou Atua o ‘se Atua o vavega’ [Mamona 9:11].” — Peresitene Russell M. Nelson (tagai i le itulau 92)

E toatele failauga na laugaina le tuputupu ae patino e ala i le mulimuli ia Iesu Keriso, faalagolago ia te Ia, ma le tuuina atu o o tatou loto i Lona finagalo.

“A o tatou liliu atu ma le faamaualalo ia [Iesu Keriso], o le a Ia faateleina lo tatou gafatia e sui ai.” — Becky Craven (tagai i le itulau e 58)

Sa toe aafia foi i le coronavirus mea na tatou vaaia ma faalogoina i le konafesi. Peitai, o le i ai o se aafiaga faaopoopo na oo mai ai se vaaiga sili atu a failauga e le gata i le faamoemoe ae faapea foi i se malamalamaaga sili atu i le fuafuaga a le Atua mo lo tatou fiafia e faavavau.

“O su’ega i le a’oga o le olaga faaletino o se elemene taua o lo tatou alualu i luma e faavavau. … Ou te tatalo o loo tatou aoaoina … ni lesona taua ia e na o aafiaga faigata e mafai ona aoao ai i tatou.” —Elder David A. Bednar (tagai i le itulau 8)

Faatasi ai ma le vevesi faaleagafesootai na aafia ai le tele o vaega o le lalolagi, sa tausalaina ai e taitai le faailoga lanu ma fetauaiga. Sa latou valaau mai ia i tatou o le Au Paia o Aso e Gata Ai ina ia tasi i le amiotonu, saili le lotogatasi i mataupu eseese, ma fesoasoani e fausia se sosaiete lelei ma le agaalofa.

“O loo tatou ola i se taimi ua sili ona malolosi ai fevaevaeaiga. … E mafai ona avea i tatou ma malosiaga e siitia ma faamanuia ai le malo atoa.” —Elder Quentin L. Cook (tagai i le itulau 18)

A o e toe faaolaola le konafesi e ala i lenei lomiga, matou te faamoemoe o le a toe oo atu ia te outou le faamoemoe ma musumusuga sa outou lagonaina i le taimi muamua, faapea foi ma le mauaina o malamalamaaga fou e ala i au suesuega i masina o lumanai.