Katak ko Repidodo an Gospel eo
Anij ej Kōnono n̄an Kōj Rainin
Jemedwōj Ilan̄ ekōņaan jipan̄ kōj. Jej ke ron̄jake E?
Rubukwi iiō ko rem̧ootļo̧k, Jemedwōj Ilan̄ im Jisōs Kraist rekar waļo̧k n̄an juon jodikdik etan Josep Smith. Visōn In M̧oktata ej katakin kōj aorōk in m̧ool ko. Jisōs ej bar juon alen tōl juon Kabun̄ ilo laļ in. Elōn̄ rikanaan ro raan kein āinwōt ilo kar tōre ko etto. Im Anij ejeļā kōj kajjojo kōn et ko etad im ej ron̄jake jar ko ad. Jej jeraam̧m̧an n̄e jej kajjieon̄ ron̄jake Ainkien kajjojo raan.
Ta in Revelesōn?
N̄e Anij ej kōnono n̄an ro Nejin, rej ņa etan “revelesōn.” Elōn̄ kain revelesōn ko.
Revelesōn an juon make ej n̄e Anij ej kōnono n̄an kōj kajjojo kōn Jetōb Kwojarjar. Emaron̄ kaenōm̧m̧an im tōl kōj.
Jemaron̄ barāinwōt bōk revelesōn kōn wāween n̄an jipan̄ ro em̧ōj ad kūr er bwe ren tōl. N̄an waanjon̄ak, jinen im jemān ajri ro remaron̄ bōk revelesōn kōn baam̧le ko aer, im juon bisop emaron̄ bar bōk revelesōn kōn ward eo an.
Rikanaan eo wōt emaron̄ bōk revelesōn kōn aolep Kabun̄ in, ak kōj kajjojo jemaron̄ jar n̄an jeļā eļan̄n̄e ta ko ritōl ro ad rej katakin kōj.
Pija in juon leddik ioon jea eo an Kabun̄ in jān Miguel A. Honores Troncosc; pija in juon kōrā ej jar jān Catherine Frost; pija in juon em̧m̧aan ilo bukwin wōjke ko jān David Winters; Irooj ej Kōjparok juon Kallim̧ur, jān Sam Lawlor
Ewi Wāween Aō Maron̄ Karuwaineneik Revelesōn?
Jej kōnono n̄an Jemedwōj Ilan̄ eo eļap iakwe ippān, aolep kajoor repād ippān im ejeļā aolep men ilo jabdewōt iien kōn jar. Ej kōņaan bwe jen kam̧m̧oolol E kōn kōjeraam̧m̧an ko, kōnono n̄an E kōn mour ko ad, im kajjitōk kōn ta ko jej aikuji. Innem jej aikuj leļo̧k ad ak keron̄ļo̧kjeņ n̄an ļōmņak im en̄jake ko ad me rej itok jān Jetōb Kwojarjar, eo ej āinwōt juon ribōkto bōktak meļeļe jān Jemedwōj Ilan̄.
Ta Āinwōt Revelesōn?
Ejjab juon wōt iaļan ak wāween kōmeļeļeik revelesōn. Anij ej kōnono n̄an kōj kajjojo ilo juon wāween eo jenaaj meļeļe kake (lale Katak im Bujen Ko 1:24). Armej ro jet iien rej ettōņak im ellolo visōn ko. Ak emakijkij, Anij ej kōnono n̄an kōj kōn en̄jake ko edik ainikier jān Jetōb Kwojarjar, āinwōt en̄jake meņāān, aenōm̧m̧an, ak lan̄lōn̄.
Ilo ekkatak eo an allōn̄ in jān Katak im Bujen Ko, jej riit kōn Oliver Cowdery, eo ekar katakin bwe revelesōn enaaj itok n̄an jim̧or ilo kōļmenļo̧kjeņ im buruōd (lale Katak im Bujen Ko 8:2).
Ta Waanjon̄ak ko an Revelesōn ilo Jeje ko Rekwojarjar?
Elōn̄ bwebwenato ko jān jeje ko rekwojarjar rej kōmeļeļe an Anij kōnono n̄an armej ro An:
-
Anij ekar ba n̄an Noa kōn wāween an kakoņ baam̧le eo an (lale Jenesis 6:17–18).
-
Jemedwōj Ilan̄ im Jisōs rekar kaenōm̧m̧an juon rikaļoor etan Stephen (lale Jerbal 7:55).
-
Revelesōn ekar jipan̄ Nipai kōjparok kien ko (lale 1 Nipai 4:6).
-
Ilo an jeje ko jet rekwojarjar itok jān rekoot ko etto, Katak im Bujen Ko ekar ejaak jān revelesōn ko raan kein. Ilo iiō in ekar wōr ad iien em̧m̧an n̄an ekkatak juon bok eobrak kōn naan ko rej kajju jān Irooj.