Itok, Ļoor Eō: Katak im Bujen Ko 18–19
Aorōk eo an Jetōb an juon Armej
Etke eļap ad aorōk ippān Jemedwōj Ilan̄?
Ejjab to ikar en̄jake aō bar epaake juon baam̧le eo me n̄a im kampānien eo aō kom̧ro kar katakin er im rekar peptaij ke ikar juon mijinede eo edik ekepaak 40 iiō ko rem̧ootļo̧k ilo Brussels, Belgium. Ebwe an kar to jān iien eo ikar kōnono n̄an juon iaer.
Kōn kabwilōn̄lōn̄ in kein jerbal kein raan kein, ikar kappukot etan jinen baam̧le in ilo social media. Ikar jab maron̄ bōk juon bitio kooļ ippān. Jej emeemļo̧k kōn en̄jake ko rekwojarjar jekar jeere iiō ko rem̧ootļo̧k āinwōt an baam̧le eo kar ekkatak kōn gospel eo em̧ōj an jepļaaktok.
Ekar jab em̧m̧an an mour, im jekjek ko ekar pād ie rekar kattoļo̧k e jān baam̧le eo an. Ke kōm kar kōnono, ikar en̄jake m̧wilaļ in iakwe eo an Jemedwōj Ilan̄ im Rilo̧mo̧o̧r n̄an sister in em̧m̧an. Ikar en̄jake aorōk in jetōb eo an n̄an indeeo, men̄e ekar elļo̧k jān Kabun̄ in. Ikar kwaļo̧k aō iakwe e im kam̧ool bwe Anij ej iakwe e im ekar ļōmņak kōn e. Ekar obrak mejān kōn dān in kōmjaļaaļ ilo am kar kwaļo̧k am iakwe n̄an doon. Jej kalllim̧ur bwe en emakijkij ad kōnono ippān doon. Ikar lukkuun kam̧m̧oolol kōn Anij eo ejeļā aolep men im ej iakwe ekar im̧we eō n̄an jipadek ļo̧k eo m̧ōtta ejitōnbōro raan eo.
“Etke” Iakwe eo an Anij
Ke Nipai kar kajjitōkin e jān juon enjeļ kōn an Anij wanlaļtak ilo ettā, ekar ba ilo ettā, “Ijeļā bwe E ej iakwe aolep ro nejin; ijo wōt ke, ijjab jeļā meļeļein aolep men” (1 Nipai 11:17). Ikar bwilōn̄ kōn wāween an Nipai kar meļeļe m̧ool eo eļam waan im eaibojooj: Anij ej iakwe ajri ro Nejin. Ealikkar bwe ekar jeļā kōn katak ko an Kraist āinwōt kar katakin e jān “jema im jinō ro rem̧m̧an” (1 Nipai 1:1). Ak ekar barāinwōt jeļā “etke” Rilo̧mo̧o̧r eo. Im ta eo “etke?”
Etke Anij ekar kōņaan kōtļo̧k bwe Ļaddik eo Nejin en jipan̄ āinwōt juon katok? Etke Ekar jilkintok kōj n̄an ijin n̄an idajon̄jon̄ im kajjieon̄? “Aorōk in jetōb ko ekanooj ļap ilo mejān Anij” (Katak im Bujen ko 18:10).
Etke eļap ad aorōk Ippān? Ilo lukkuun m̧ool, kōnke jej ro Nejin im Ej iakwe kōj. Ak ilo eoon ko tok jejjo, Ej kōmeļeļeik menin letok in eļap n̄an kōjwōj kajjojo kōn iakwe eo An n̄an kōj—Nejin Emake Wōt, Jisōs Kraist. Ekar jilkintok Nejin bwe en en̄taan kōn “mej ilo kanniōk; kōn menin Eaar en̄taan kōn metak an aolep armej, bwe aolep armej ren maron̄ ukeļo̧k im itok n̄an E. Im Eaar bar jerkak jān ro remej, bwe En maron̄ bōktok aolep armej n̄an E, ilo errā ko an ukeļo̧k” (Katak im Bujen Ko 18:11–12). Anij eaar ba n̄an kōj, “en̄iin ej jerbal eo Aō—n̄an kakūrm̧ool jab wabanban im mour indeeo an armej” (Moses 1:39
Ukweļo̧k im Lan̄lōn̄
Unin an Jemedwōj en̄jake eļap lan̄lōn̄ n̄e jej ukweļo̧k. Kōņaan eo ad n̄an ukweļo̧k ej kein kam̧ool kōn kam̧m̧oolol eo ad em̧wūlaļ kōn menin letok eo ekabwilōn̄lōn̄ im jab maron̄ keidi an Ripinmuur eo an laļ in. Ej kōn wōt Jisōs Kraist me jemaron̄ erreo n̄an jutak kōn lōke im̧aan mejān Anij (lale Katak im Bujen Ko 121:45).
Būreejtōn Russell M. Nelson ekar kōmeļeļeik: “Ekanooj lōn̄ armej rej watōk ukweļo̧k āinwōt kaje—juon men n̄an kōjekdo̧o̧n men̄e jekjek ko jepād ie eļap aer kauwōtata. Ak en̄jake in kōn kaje ej kōm̧m̧an jān Setan. Ej kajjieon̄ kabōjrak kōj jān ad reilo̧k n̄an Jisōs Kraist eo ej jutak kōn pā ko reppeļļo̧k, kōjatdikdik im m̧ōņōņō n̄an kōmour, jeorļo̧k bōd, karreo, kōkajoorļo̧k, karreo, im kokwojarjare kōj.
Ejjeļo̧k juon men ej kanemkwoj eļapļo̧k, wōr tokjen, ak aorōkļo̧k n̄an juon jān ukweļo̧k eo emakijkij im ej kōm̧m̧an aolep iien im aolep raan. Ukweļo̧k ejjab juon m̧akūtkūt, ej juon wāween jerbal. Ej kii eo n̄an lem̧ōņōņō im aenōm̧m̧an ilo kōļmenļo̧kjeņ. N̄e kobain tōmak, ukweļo̧k ej kōppeļļo̧k ad deļo̧n̄e kajoor in Pinmuur eo an Jisōs Kraist.1
Kar kūr n̄an Jipan̄
Elōn̄ kōttan ilo revelesōn ko ilo raan ko āliktata, Irooj ej kūr ajri ro nejin rikarejar ro n̄an jipan̄ E im Ļaddik eo Nejin kōn jerbal in lo̧mo̧o̧r im mour ilo aiboojoj eo eutiejtata (lale Katak im Bujen Ko 18:14). Ļōmņak kake! Ijo jej likjab ie, Anij in aolepān laļ in ej kūr kōj n̄an jipan̄ ajri ro Nejin, ro me eļap aorōkier, n̄an jepļaakļo̧k n̄an Ippān. Ejeļā bwe jerbal in epen. Enaaj lōn̄ ro reban eo̧ron̄ kūr in n̄an “ron̄jake E.” Ijoke, Ej kwaļo̧k bwe E ej Anij eo an “juon.” “Im eļan̄n̄e āindein bwe kom̧ro en aikuj jerbal aolepān raan ko amiro ilo kwaļo̧k ukeļo̧k n̄an armej rein, im bōktok, juon wōt armej n̄an Eō, ewi jon̄an an ļap naaj amiro m̧ōņōņō ippān ilo aelōn̄ eo an Jema!” (Katak im Bujen ko 18:15; eoon eo eaorōk kar kobaiktok).
Kwomaron̄ kajjitōkin eok make, “Ta eo imaron̄ kōm̧m̧an n̄an jipan̄ bōktok juon n̄an Kraist, ukweļo̧k, im jeraam̧m̧an kōn Katok in Pinmuur eo An?”
Elder Dieter F. Uchtdorf jān Doulul eo an Jon̄oulruo Rijilōk ro ekar letok kapilōk in kōn bōk koņaad ilo jerbal in lo̧mo̧o̧r im mour ijo eutiejtata: “Meļeļe bwe ejjab am̧ jerbal n̄an ukōt armej. En̄ ne ej jerbal eo an Jetōb Kwojarjar. Jerbal eo am̧ ej n̄an kwaļo̧k ta eo kwoj en̄jake im tōmak im mour jokkun wōt juon ippān tōmak ko am̧.
Kōn menin, kwon jab ebbweer eļan̄n̄e juon ejjab bōk ennaan eo an gospel eo ilo iien eo em̧ōkaj tata. Ejjab am̧ likjab.
Ej ikōtaan kajjojo armej im Jemedwōj Ilan̄.
Eddo eo am̧ ej n̄an iakwe Anij im iakwe ro rūturūm̧, ajri ro Nejin.
Tōmak, iakwe, kōm̧m̧an.
“Ļoor iaļ in, im Anij enaaj jerbali kabwilōn̄lōn̄ ko kōn kwe n̄an kōjeraam̧m̧an ajri ro Nejin raorōk.”2
Jerbal n̄an Ro ilo Rejet ko Jim̧or an Rōn̄ōl eo
Kūr eo n̄an itok n̄an Kraist ej n̄an aolep ro raar mour, ak renaaj mour, ioon laļ in. “Ro remej im rej ukeļo̧k renaaj bōk lo̧mo̧o̧r, kōn pokake n̄an kain̄i ko an m̧weo im̧ōn Anij” (Katak im Bujen Ko 138:58). Tampeļ im jerbal in menmenbwij rej m̧ōttan ko raorōk ilo ainitok Israel eo ejepelōklōk ilo jait ko jim̧or an ran̄ōl. Jemaron̄ en̄jake lan̄ ilo ad kōm̧m̧ane jerbal in n̄an ro em̧ōj aer ilo̧k im̧aan n̄an laļ eo an jetōb bwe ilo laļ eo, āinwōt an Būreejtōn Wilford Woodruff (1807–98) ekar ba, “enaaj lukkuun jejjo wōt, eļan̄n̄e ewōr, wōn eo eban bōk Gospel eo.”3 Ilo jab pere, renaaj reim̧aanļo̧k n̄an raan eo n̄e kain̄i in lo̧mo̧o̧r ro rej kōm̧m̧an n̄an er ilo m̧weo im̧ōn Irooj.
Elder Dale G. Renlund jān Doulul eo an Jon̄oulruo Rijilōk ro ekar katakin: N̄e jej aini menmenbwij eo ad im etal n̄an tampeļ eo ilo etan rūtto ro jibūd im jim̧aad, Anij ej kakūrm̧ool elōn̄ iaan kōjeraam̧m̧an kein kar kallim̧ur kaki jim̧or ijin im ilo turājet in rōn̄ōl eo. Ejjeļo̧k oktak, jej jeraam̧m̧an n̄e jej jipan̄ ro jet ilo ward ko ad im stake ko ad kōm̧m̧ane ejja menin wōt. Membōr ro rejjab jokwe epaake juon tampeļ rej barāinwōt bōk ejja kōjeraam̧m̧an kein jān ad bōk koņaad ilo jerbal in menmenbwij ko an baam̧le, aini etan rūtto ro jibūd im jim̧aad n̄an kain̄i ko an tampeļ n̄an maron̄ kōm̧m̧ani.”4
Eaibojooj ilo ad jeļā bwe Jemedwōj Ilan̄ ej iakwe kajjojo Nejin. Jej aolep jetōb ko raorōk Ippān. Kōj kajjojo ewōr juon ad eddo ekwojarjar n̄an jerbal in karejar n̄an ajri ro Nejin ilo jim̧or jait ko ruo ilo ran̄ōļ im jipan̄ er kile aorōkin jetōb ko aer.
Jipan̄ Er Lo Aorōkin Jetōb ko Aer
Ij kūr eok n̄an loļo̧k ro rej m̧ōttam̧ ilo mour eo am̧ im emaron̄ kar atajinemjeņ ium̧win juon tōre. Loļo̧k ro em̧ōj aer etal jān iaļan bujen in. Jerbal in karejar n̄an ro rej pād ilo aikuj in iakwe eo an Kraist. En̄jake epaak n̄an ippān ro rej pād ilo turājet in ran̄ōļ eo kōn tampeļ im jerbal in menmenbwij an baam̧le, ekoba indexing. Jipan̄ ro jet en̄jake iakwe eo an Anij jān eok.
Āinwōt kar kallim̧ur, eo m̧ōttan ejitōn bōro jān Belgium im ikar kōnono aolep Jabōt ium̧win emān allōn̄ ko. Ikar karuwaineneik e bwe en download Gospel Library app eo. Branch būreejtōn eo jeļā kake e, im mijenede ro rej jerbal aolep raan rekar loļo̧k e im leļo̧k n̄an e juon kōjeraam̧m̧an an priesthood wiik eo tok juon, kein kajuon ium̧win 30 iiō ko, liin ekar itok n̄an kweilo̧k in kwojkwoj eo. Iien eo āliktata kōm̧ro kar kōnono, ekar obrak kōn lan̄lōn̄ bwe emaron̄ bar kobatok ippān ro uwaan Kabun̄ eo an Jisōs Kraist.
Ekar barāinwōt ba n̄an eō bwe leddik eo nejin erūtto tata eo me ekar bōk wōt koņaan ilo Kabun̄ in. Ikar kajju loļo̧k leddik eo nejin ilo video chat. Ej intōrpiuik eō n̄an kajjojo emen iaan ajri ro nejim, innem ba n̄an eō kōn mijinede ro rekar itok n̄an m̧weo m̧ōer bon̄ōn eo n̄an kōjota. Ta kōjeraam̧m̧n eo ekar lo bwe ekar juon eo em̧m̧an an al membōri in Kabun̄ me eļap an niknik.
Ke ikar loļo̧k e, im ikar meļeļe, ilo jet jon̄ak jiddik ko, ennaan in kōn jeje ko rekwojarjar: “Im eļan̄n̄e lan̄lōn̄ eo enaaj ļap kōn juon wōt jetōb eo jaar bōktok e n̄an Rilo̧mo̧o̧r ilo aelōn̄ in kiin̄ eo an Jemed, ewi jon̄an ad naaj lan̄lōn̄ eļan̄n̄e jenaaj bōktok elōn̄ jetōb ko n̄an E!” (Katak im Bujen Ko 18:16).
Aorōk in kajjojo jetōb eļap!
Lift Up The Hands That Hang Down, jān J. Kirk Richards
Meļeļe bwe ejjab am̧ jerbal n̄an ukōt armej. Ej jerbal eo an Jetōb Kwojarjar. Jerbal eo am̧ ej n̄an kwaļo̧k ta eo kwoj en̄jake im tōmak im mour jokkun wōt juon ippān tōmak ko am̧.”
Elder Dieter F. Uchtdorf
Lux Condivis (Shared Light), jān J. Kirk Richards
Elōn̄ iaami em̧ōj aer kar bōk kūr eo im rej kōm̧m̧ani men ko reļļap im em̧m̧an n̄an kōjeraam̧m̧an ajri ro nejin Anij ilo jait ko jim̧or ilo ran̄ōl eo.
Breakthrough, jān J. Kirk Richards