Eddōkļo̧k ilo Pedped in Katak an Revelesōn
Jān Būreejtōn Russell M. Nelson
Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata
Ij kōketak eok n̄an bōk bun̄tōn ko rekkar n̄an em̧m̧anļo̧k im emakijkij am̧ ron̄jake Irooj bwe kwon maron̄ bōk meram eo me Ej kōņaan lewaj n̄an eok.
Pija ko jān Getty Images
Ilo Jeptōm̧ba 30, 2017, ļoor m̧wen̄an eo an ālkin raelep in kweilo̧k eo eļap, ikar bōjrakļo̧k n̄an aujpitōļ n̄an lale membōr in doulul eo aō ejitōnbōro Elder Robert D. Hales. Eto an pād ilo aujpitōļ kōn an en̄taan kōn metak ob jejjo raan m̧oktaļo̧k.
Ekar juon iien loļo̧k eo em̧m̧an, im āinwōt em̧m̧anļo̧k an mour. Ekar make emenono ippān make, eo me ekar juon kōkaļļe em̧m̧an.
Joteen eo, ijoke, Jetōb eo ekar kōnono ilo buruō im ļōmņak eo bwe ij aikuj jepļaak n̄an aujpitōļ ilo Jabōt. Ilo m̧wen̄an eo an jibbon̄ in Jabōt an kweilo̧k eo eļap, im̧we eo ekajoor ekar bar jiroktok eō. Ikar en̄jake bwe ij aikuj joļo̧k iien m̧ōn̄ā im ekairiir n̄an turin peet eo an Elder Hale iien eo em̧ōkajtata ke ej jem̧ļo̧k m̧wen̄an eo an jibbon̄ōn eo, im ikar etal.
Ke ij itaakļo̧k, ikar lo bwe Elder Hales ekar lukkuun nana an mour. Būrom̧ōj eo, ekar jako 10 minit ālkin aō kar itaakļo̧k, ak eļap aō kam̧m̧oolol bwe ikar pād turin ilo peet eo an ippān kōrā eo pāleen ejitōnbōro, Mary, im ļaddik ro ruo nejin ke rekar em̧akūt jān mour in.
Eļap aō kam̧m̧oolol bwe unoojdikdik eo an Jetōb Kwojarjar ekar im̧we eō n̄an kōm̧m̧an juon men bōlen ijjan̄in kar kōm̧m̧ane m̧okta. Im eļap aō kam̧m̧oolol kōn m̧ool in revelesōn im bwe lan̄ ko rej bar peļļo̧k juon alen.
Iiō in jibadbad n̄an ekkatak an juon make im ekkatak ilo kūlaajruum̧ enaaj kōn Katak im Bujen Ko. Men kein “revelesōn ko jān lan̄ im kean̄ ko” emaron̄ kōjeraam̧m̧an aolep ro rej ekkatak kaki im mour ekkar n̄an tōl ko aer rekwojarjar. Rej karuwaineneik “aolep armej ijoko jabdewōt n̄an ron̄jake ainikien Irooj Jisōs Kraist,”1 bwe ilo m̧ool “ainikien Irooj ej n̄an aolep armej” (Katak im Bujen Ko 1:2).
Kauwōtata, Marok, Riab
Mellijon̄ ko an ānbwin im jetōb rej jet m̧ōttanļo̧k mour in ioon laļ in, āinwōt ajedeed in COVID-19 ekar kakeememej kōj. Iien ko m̧okta jān Itok eo An Kein Karuo, Rilo̧mo̧o̧r ekar kōkaļļeiki raan ko āinwōt iien mellijon̄ eļap. Ekar ba, “Enaaj wōr n̄ūta ko, im nan̄inmej ko, im m̧akūtkūt ko in laļ, ilo elōn̄ jikin ko” (Josep Smith—Matu 1:29).
Kobain melejon̄ kein ej ļapļo̧k maron̄ im maron̄ ko me rej jepooļ kōj. Āinwōt an Jisōs kar ba n̄an rikaļoor ro An, “Nana enaaj kanooj ļap” m̧okta jān An jepļaaktok (Josep Smith—Matu 1:30).
Setan ekar kobaik kajoor eo an im ire ņae jerbal eo an Irooj im ro rej bōk koņaer ie. Kōn an ļapļo̧k kauwōtata ko jej jelm̧aeiki, aikuj ko ad n̄an bōk tōl kwojarjar ejamin ļapļo̧k, im ad kijejeto n̄an ron̄jake ainikien Jisōs Kraist—ad Rijojomar, Rilo̧mo̧o̧r, im Ripinmuur—ejjan̄in kar lukkuun ekairiir n̄an jon̄an in.
Āinwōt aō kar ba ālkin aō kar bōk kūr in āinwōt juon Būreejtōn n̄an Kabun̄ in Irooj ej pojak n̄an kwaļo̧k ļōmņak eo An n̄an kōj. Menin ej juon iaan kōjeraam̧m̧an ko An reļļap n̄an kōj.2
Ilo raan kein ad, Ekar kallim̧ur, “Eļan̄n̄e kom̧ naaj kajjitōk, kom̧ naaj bōk revelesōn ioon revelesōn, jeļāļo̧kjeņ ioon jeļāļo̧kjeņ” (Katak im Bujen Ko 42:61).
Ijeļā bwe Enaaj uwaake kajjitōk ko an armej ro An.
En̄in ej wāween ad ron̄jak E!
Jeļā wāween an Jetōb ekkōnono emenin aikuj rainin. N̄an bōk revelesōn an juon make, n̄an kappukot uwaak ko, im n̄an bōk kōjparok im tōl, jej keememej jon̄ak eo an Rikanaan eo an Josep Smith ekr kwaļo̧k n̄an kōj.
Mokta, jej leļo̧k ad make ilo jeje ko rekwojarjar. Kōm̧m̧ane menin enaaj kōppeļļo̧k kōļmenļo̧kjeņ im buruōd n̄an katak ko im m̧ool ko an Rilo̧mo̧o̧r. Naan ko an Kraist “jiron̄ [kōj] aolep men ko [jej] aikuj kōm̧m̧an” (2 Nipai 32:3), eļaptata ilo raan kein me eļap poktak im jorrāān.
Eo Juon jej jar. Jar emenin aikuj jibadbad, bwe jen ettā im̧aan Anij, kappukot juon jikin eļur ijo jemaron̄ etal n̄an e aolep iien, im leļo̧k aolepān buruōd n̄an E.
Irooj ej ba, “Kepaatok Eō im Inaaj kepaakwaj kom̧; kappukot Eō im kom̧ naaj lo Eō; kajjitōk, im kom̧ naaj bōk; kaļļaļļaļ, im enaaj peļļo̧k n̄an kom̧” (Katak im Bujen Ko 88:63).
Epaake Irooj ej boktok aenōm̧m̧an im peran, kōjatdikdik im kōmour. Kōn menin, jej jar ilo Etan kōn inepata im m̧ōjņo ko ad, ad jan̄nuwaade, im ro rejitōnbōro ippād, kūr im kajjitōk ko ad.
Innem jej ron̄jake.
Eļan̄n̄e jenaaj bukwelōlō ilo juon iien ālkin ad kadedeikļo̧k ad jar, ļōmņak ko, en̄jake ko, im tōl ko renaaj itok n̄an kōļmenļo̧kjeņ ko ad. Rekoote im̧we ko enaaj jipan̄ kōj keememej ta kōm̧m̧an ko Irooj ekōņaan bwe jen kōm̧m̧ane.
Āinwōt jej āliji jerbal in, ilo naan ko an Rikanaan Josep Smith, “eddōkļo̧k ilo pedped in katak an revelesōn.”3
Mour Erreo n̄an Bōk Revelesōn
Kōkm̧anm̧anļo̧k maron̄ ko ad n̄an kile unoojdikdik eo an Jetōb Kwojarjar im ļapļo̧kin maron̄ n̄an bōk revelesōn emenin aikuj n̄an mour erreo. Mour erreo ejjab menin aikuj wāppen, ak emenin aikuj bwe jej kajjieon̄ kōļapļo̧k ad mour erreo.
Irooj ej kōtmene kijejeto ko ad, em̧m̧anļo̧k eo ad, ad ukweļo̧k aolep raan. Mour erreo ej bōktok erreo, im erreo ej kōkarbōbe kōj n̄an Jetōb Kwojarjar. Ilo ad bōk “Jetōb Kwojarjar bwe en [ad] ritōl” (Katak im Bujen Ko 45:57), jej karbōb n̄an bōk revelesōn an juon make.
Eļan̄n̄e juon men ej kabōjrak kōj jān kōppelļo̧k kōjem̧ n̄an bōk tōl ko an lan̄, jej aikuj ukweļo̧k. Ukweļo̧k ej kōtļo̧k ad kōppelļo̧k kōjem̧ eo bwe jen maron̄ ron̄ ainikien Irooj emakijkij im ealikkar ļo̧k.
“Jon̄ak eo ealikkar,” Elder David A. Bednar ekar katakin jān Doulul eo an Jon̄oulruo Rijilōk Ro. “Eļan̄n̄e juon men jej ļōmņake, loe, ron̄, ak kattoļo̧k kōj jān Jetōb Kwojarjar, innem jej aikuj bōjrak ad ļōmņak, loe, ron̄, ak kōm̧m̧ane men eo. Eļan̄n̄e jibadbad eo an menin n̄an kam̧ōņōņō, n̄an waanjon̄ak, kattoļo̧k kōj jān Jetōb Kwojarjar, innem ealikkar bwe kain kam̧ōņōņō in ejjab n̄an kōj. Kōnke Jetōb eo ejjab maron̄ pād ippān men ko me Kōnke Jetōb eo ejjab maron̄ pād wōt ippān eo ej kōnono naan ko renana, kōm̧m̧ani men ko rekōmetak armej, ak ejjab erreo m̧wilin, innām elukkuun alikkar bwe men kein rejjab n̄an kōj.”4
N̄e jej ripālele kōļapļo̧k ad erreo im pokake ilo ad jitlo̧k, tiljek ilo kappukot, ekkatak jeje ko rekwojarjar im naan ko an rikanaan eo ad emour, im tampeļ im jerbal in menmenbwij, lan̄ ko renaaj pelļo̧k. Irooj, an nej ukot tok, enaaj kakūrm̧ool kallim̧ur eo An: “Inaaj ajejewaj n̄an eok Jetōb eo Aō, eo enaaj kōmeram am ļōmņak” (Katak im Bujen Ko 11:13).
Ej pukōt n̄an kōjeraam̧m̧an eok im jipan̄ eok ilo wāween eo An im ilo iien eo An make im ilo jekjek eo An make.
Juon Jetōbōn Meļeļe
Job ekar kwaļo̧k, “Ewōr jetōb ilowaan armej, im menono in Eo e Kajoor Bōtata ej leļo̧k n̄an er jeļāļo̧kjeņ” (Job 32:8). Ilo iiō in ekāāl, ij kōketak kom̧ n̄an bōk bun̄tōn ko remenin aikuj n̄an ron̄jake ainikien Irooj em̧m̧anļo̧k im emakijkijļo̧k bwe kwon maron̄ bōk mera eo Ekōņnaan lewaj n̄an eok.
Mokta jān an kar Elder Hales jako ilo raan eo ilo Oktoba ilo 2017, ekar kōpooj juon an kōnono ekadu n̄an kweilo̧k eo eļap me eban kar maron̄ kwaļo̧k ie. Ilo kōnono eo, ekar je, “Ad tōmak ej kōpooj kōj n̄an pād im̧aan mejān Irooj.”5
N̄e jej bōk revelesōn, jej joļo̧k iien im̧aan mejān Anij ilo An kwaļo̧k An ļōmņak, Ankilaan, im Ainikien n̄an kōj (lale Katak im Bujen Ko 68:4). N̄e jej likūt ad tōmak ilo jerbal ko ad, kūr E, mour erreo n̄an kallim̧ur ko reim̧we, im jerbal ko kōn tōl eo jej bōke.