Kōrā ro im Kajoor in Bujen

Pija

illustration of woman

Kōmeļeļe ko jān Amber Eldredge

Būreejtōn Russell M. Nelson ekar katakin bwe lan̄ ko reppeļo̧k n̄an kōrā ro em̧ōj aer bōk menin letok kwojarjar ippān kajoor eo an Anij tok jān bujen ko aer kōn priesthood āinwōt an em̧m̧aan ro kabwijer priesthood eo.

Ij jar bwe m̧ool in enaaj jeje ioon būruom̧i kōnke ij tōmak enaaj ukōte mour eo ami. Kiiō, ilo kilōke, ikōņaan likūt ioomi juon kōjeraam̧m̧an eo me komaron̄ meļeļe kajoor in priesthood eo kwaar bōke im bwe kwonaaj kōļapļo̧k kajoor in jān kōjerbale tōmak eo am̧ ilo Irooj im ilo kajoor eo An.

Būreejtōn Nelson ekar karuwaineneik kōrā ro an Kabun̄ in “lukkuun jar im ekkatak” kōn kajoor eo an priesthood im “jeļā ta eo Jetōb Kwojarjar enaaj katakin” kōj. Eļap aō m̧ōņōņō bwe rikanaan eo an emour ekar karuwaineneik kōj kajjojo, n̄an ekkatak im n̄an bōk revelesōn im bwe en em̧m̧anļo̧k “bōk, meļeļe im kōjerbal kajoor eo me [jekar] bōke kōn menin letok kwojarjar.”¹

Elōn̄ alen ilo mour eo aō, ikar en̄jake kōjeraam̧m̧an ko kar kallim̧ur kaki me rej itok jān ļoor kapilōk an rikanaan ro. Kūr in ekar jab oktak. Ij ļōmņak kōn kūr eo an Būreejtōn Nelson, kōļmenļo̧kjeņ eo aō ekar kajju oktak n̄an tampeļ eo—jikin eo me ikar bōk menin letok kwojarjar eo kōn kajoor eo an priesthood—im menin letok eo me kajoor ekar letok ilo aolepān mour eo aō. Ekar bōk elōn̄ iiō ko bwe in kile wāween an kajoor itok n̄an mour eo aō.

Kajoor in priesthood, eļap āinwōt menin letok eo an Jetōb Kwojarjar, ej itok jān Jemād Ilan̄ im jān mour jim̧we ko ad. Ilo ad kōjparok bujen ko ad ippān Irooj, ewōr aer iien em̧m̧an n̄an bōk revelesōn kōn mour ko ad, kōn baam̧le ko ad, jerbal ko, jikuuļ—aolep men ko me jej kappukot tōl n̄ani. Ejjeļo̧k juon men eaorōk n̄an kōj me ejjab aorōk n̄an Irooj. Im n̄e jej karuwaineneik Jetōb n̄an pād ippād, jemaron̄ jeļā eļapļo̧k kōn jeļāļo̧kjeņ eo kōn kajoor in priesthood itok jān tōl eo an Jetōb Kwojarjar.

Jon̄an ļapļo̧kin men ko ikar ekkatak kōn kajoor in priesthood kōn en̄jake im ekkatak ko aō make, jon̄an ļapļo̧kin an meļeļe jon̄an aorōk in n̄an aolep jekjek ko ilo mour ko ad. Kajoor in priesthood ej jipan̄ kōj bōk revelesōn n̄an idajon̄jon̄e mour ko ad aolep raan.

Ilo kūr eo aō, kōnke ij kōm̧m̧ane kōn mālim an priesthood kar letok n̄an eō jān juon eo ewōr ippān kii ko, elōn̄ tōre ko ekar jiktok ļōmņak im naan ko kar letok n̄an eō me rej n̄an kōrā ro rem̧m̧an dettaer ak sister ilo doulul eo an kōrā ak ajri in Būrāimere rekar aikuj in ron̄. Ijeļā bwe naan ko rej itok kōn mālim an priesthood me kar letok ilo iien eo kar kōjenoļo̧k eō kōn kūr eo.

Ilo m̧are, āinwōt ilo jem̧jerā ko jet, armej rej dibuk bun̄tōn im lābōļ in ekkatak im eddōkļo̧k. Ikar ekkatak bwe ke ij keememej wōn ļeo pāleeō, wōn n̄a, im ta eo kōm kar aikuj kōm̧m̧ane ippān doon āinwōt ajri ro nejin Anij, ekar ukōt buruō. Liāp ippān doon kōn mālim an priesthood eo ekar kōkajoor im kōketak kom̧ro jim̧or n̄an erom̧ juon wōt. Ke Rilo̧mo̧o̧r eo ekar ba, “Eļan̄n̄e kom̧ij jab juon kom̧ij jab Aō” (Katak im Bujen Ko 38:27), Ejjab meļeļe wōt juon ilo Mōnjar eo Ej meļeļein ilo jem̧jerā ko ilo baam̧le ko ad barāinwōt.

Im āinwōt juon m̧am̧a, ij keememej aō inepata kōn juon ajri em̧m̧an dettan eo ekar kōm̧m̧an men ko me ikar jeļā ke reban kam̧ōņōņōiki. Kōm kar errā n̄an ekkōnono kōn inepata im kar karōk juon iien n̄an kōnono. Mokta jān iien eo kar karōk kōn kōnono ilo taļboon, ikar pojak kōn naan in katakin ko aō; ikar lukkuun jeļā ta eo in kar ba. Ikar jar bwe Jetōb eo en pād ippa. Ta eo ikar kwaļo̧k jān lo̧n̄iiū jān jinoin ekkōnono eo am̧ro im ilo taļboon ekar lukkuun dedeļo̧k jān ta eo ikar karōke bwe in ba. Ak ekar juon men eo me juon ajri eļap an aikuji. Menin letok eo an Jetōb Kwojarjar ekar kōm̧m̧an bwe bōro ko ren med im en bōk juon uwaak em̧m̧an. En̄in ej juon wāween kwaļo̧k an kajoor in priesthood eo jerbal ilo mour ko ad.

Pija

illustration of a couple holding up the walls of their home in a storm

Ekkā an waļo̧k, kōrā ro rej keidi er make ippān ro jet. Ak ejjeļo̧k iaad jej en̄jake n̄e jej keidi kōj make ippān ro jet. Kajjojo kōrā ewōr juon kobaik in maron̄ im taļōn ko rej make wōt, im aolep men kein rej menin letok jān Anij. Kōn kwe im n̄a kōjro rejjab āinwōt juon—ak jabdewōt oran kōrā ro āinwōt juon—ejjab meļeļein edik ak eļap ad aorōk. Jej kappukot menin letok ko ad im kaddōkļo̧k er, keememej wōn eo ekar leļo̧k n̄an er, innem kōjerbali n̄an jibadbad ko An. Ilo ad kwaļo̧k menin letok ko ad n̄an kōjeraam̧m̧an ro jet, jej en̄jake kajoor in priesthood eo ilo mour ko ad.

Ewōr aō iien em̧m̧an n̄an jelm̧ae elōn̄ kōrā ro rej kwaļo̧k tōmak im kajoor eo aer jān kōm̧m̧an ko aer. Kōrā ro rej leļo̧k taļōn ko aer im maron̄ ilo wāween ko rekabilōn̄lōn̄ im okkotaktak. Rej kōm̧m̧an eļap oktak ilo mour ko ad kōn ro ipeļaakid—ilo baam̧le ko ad, jikin jerbal ko, m̧ōnjar ko, jikuuļ ko, ak ijoko jet rej joļo̧k iien ko aer ie.

Juon iaan men ko ikar ekkatak kōn priesthood eo ej bwe jej kōm̧m̧ane ijo koņaad ippān doon. En̄in ej wāween an Irooj ļōme menin; en̄in ej jon̄ak eo ekwojarjar. Jejjab aikuj jiāe kōnke aolep menin letok ko im taļōn im maron̄ ko remenin aikuj—jān jim̧or m̧aan im kōrā. Irooj ej tōl kōj ilo iaļ in bwe jen aolep bōk juon jeļāļo̧kjeņ em̧m̧an kōn wāween jerbal ippān doon im wāween kaorōk jipan̄ ko an doon. Em̧ool ej wāween eo em̧m̧antata n̄an kōttōbrak jerbal eo An.

Kōrā ro rejjab kōttar juon armej n̄an ba n̄an er ta eo ren kōm̧m̧ane kōn menin letok ko aer, taļōn ko, im kajoor. Ewōr ad maron̄ n̄an bōk revelesōn ko n̄an kōj make. Jejjab aikuj kōttar an make waļo̧k; jej aikuj peran n̄an jerbal ekkar n̄an revelesōn eo me jej bōke. Pukot im̧we im uwaake tōl in ilo jetōb ej kam̧ool eo me jemaron̄ epaakeļo̧k kajoor in priesthood eo kar kallim̧uri kōj kake n̄e jej kōjparok bujen ko ippān Anij.

Āinwōt an kar Būreejtōn Nelson katakin, “Ta eo emaron̄ ļapļo̧k an kalimomo jān n̄an jerbal kōn Jetōb eo n̄an meļeļe kajoor eo an Anij —kajoor in priesthood eo?” Ekar kallim̧ur bwe, “Ilo an meļeļe ko am̧ ļapļo̧k im ilo am̧ kōjerbal tōmak ilo Irooj im kajoor in priesthood eo An, maron̄ eo am̧ n̄an bōk ioom̧ mennin aorōk ko an jetōb me Irooj ekar kōpooji renaaj ļapļo̧k.”² Im ijeļā kallim̧ur kein jān rikanaan eo emour rem̧ool.