Digital Lamang: Mga Young Adult
Pagsinati sa Gahom ni Kristo isip usa ka Pungkol nga adunay Pagkaibog sa Sama og Sekso
Ang akong mga kasinatian sa kinabuhi migiya kanako sa pagsabot kon sa unsang paagi si Kristo makaayo kanato—sa pisikal ug espirituhanon nga paagi—pinaagi sa Iyang Pag-ula.
Usa kadto ka normal nga Biyernes. Didto ko sa trabaho, nga nagdrayb og forklift sama sa naandan, sa dihang kalit lang nawad-an ko og kontrol. Wala ra kaayoy kasaba sa dihang nadasmag ko sa bungbong, apan mibati ko og kalit, grabe nga kasakit sa akong tiil.
Mitan-aw ko sa ubos ug nakaamgo nga ang akong tiil napiit tali sa bungbong ug sa forklift.
Misiyagit ko og pakitabang, ug wala na koy mahinumdoman kaayo human niana gawas sa tingog sa siren sa ambulansiya ug sa kabalaka sa unsay mahitabo sa umaabot.
Didto sa ospital, nakahinumdom ko nga naghunahuna nga daghan ra kaayo ang mga nars sa lawak. Nalisang usab ako tungod kay taga Colombia ko ug ang sinultihan Kinatsila, ug ang mga nars sa ospital sa Utah paspas kaayong nag-istorya sa Iningles. Naglisod ko sa pagsabot kanila. Ang kada segundo daw kahangtoran. Apan ako nasayod sa kahiladman nga mawad-an ko sa akong tiil, bisan sa wala pa kini gitan-aw.
Samtang naghulat alang sa usa ka truma nga doktor nga tig-opera, naghunahuna ko sa akong pag-umangkon nga lalaki. Ganahan siya og soccer, ug gusto nako nga ipabilin ang akong tiil aron makadula uban kaniya. Ug usa lamang kana sa daghan nga mga butang nga akong gikinahanglan sa akong tiil! Human nga duha ka doktor nga tig-opera ang mitimbang-timbang sa akong angol [injury], sila nakahukom nga ang labing maayong paagi sa pagpaminos sa dugang nga mga komplikasyon mao ang pagputol sa akong tiil. Nasayod ko nga kadto mao ang husto nga desisyon, apan nasagmuyo gayod ako.
Usa ka Aksidente o usa ka Silot?
Pagkasunod buntag human sa operasyon, ingon og ang kinabuhi dili tinuod. Ako adunay daghan ra kaayo nga mga pangutana ug gamay ra kaayo nga mga tubag. Oo, swerte gayod ako nga nabuhi, ug ang aksidente tingali unta mas grabe pa, apan mibati usab ako nga nawala. Ang akong tiil wala na, ug wala ako masayod kon unsa kaha ang akong kinabuhi sukad niadto.
Nagpabilin ko og 20 ka adlaw sa ospital. Ang akong pamilya ug mga higala mihupay ug misuporta kanako latas niini, ug misugod usab ako sa pisikal nga therapy ug misugod sa dalan paingon sa pagkaayo ug pagkaalim. Makapasurprisa nga ako adunay igo nga kaisog nga nakahuman og daghan diha niana nga dalan paingon sa pagkaayo sulod niadtong 20 ka adlaw, lakip sa pagsugod og kat-on sa paglakaw nga adunay prosthetic.
Ang butang nga wala koy kaisog sa pagbuhat, hinoon, mao ang mag-ampo. Daw gibati nako nga dili ako makaatubang sa Dios. Nagtuo ko nga nasuko ako Kaniya, apan sa pagkatinuod naulaw lang ko sa akong kaugalingon. Sa akong hunahuna, kining tibuok nga “aksidente” ingon og usa ka silot, tungod kay sa usa ka bahin ako mihunong sa pagsimba ug ako wala magsunod Iyang mga sugo, apan kasagaran tungod kay nakasinati ako og pagkaibog sa sama og sekso sulod sa dugay na nga panahon kutob sa akong mahinumdoman. Ako nasayop sa pagtuo nga Siya nasagmuyo ug naulaw kanako.
Nasamdan ako sa pisikal ug espiritwal nga paagi.
Sa dihang nakagawas na ako sa ospital, ang akong kahimsog sa pangisip nag-antos. Bisan og anaa ang akong pamilya ug mga higala sa akong palibot, gibati gihapon nako nga nag-inusara. Nasayod ko nga akong gikinahanglan ang Langitnong Amahan ug si Jesukristo aron mamaayo, apan nanglimbasog ko sa pagdasig sa akong kaugalingon nga mag-ampo.
Sa kataposan, dili na gayod nako kini maagwanta. Miabot ako sa punto nga dili na nako makaya ang kaugtas ug andam na nga moluhod ug mag-ampo sa unang higayon sulod sa dugay na nga panahon. Mibakho ako sa dihang sinsero nakong gipahayag ang akong mga pagbati ngadto sa Langitnong Amahan. Nangutana ako Kaniya ug misulti Kaniya sa akong mga kabalaka hangtod nga nahutdan ako og ginhawa.
Sa hinay-hinay, usa ka pagbati sa kalinaw ang mipuno kanako. Ug kini nga mga pulong miabot sa akong kasingkasing ug hunahuna: “Tanan niini nga mga butang mahimong alang sa imong kaayohan aron sa paglunsay sa imong kinaiya. Usa lang kadto ka aksidente.”
Seryoso gayod?
Usa lang ba gayod kini ka aksidente? Dili usa ka silot? Wala ko kasabot niana nga tubag. Apan human sa pipila ka adlaw nga pagpamalandong, nasayod ko nga tinuod kini. Nasayod usab ako nga ang Langitnong Amahan nahigugma kanako. Nagpanawag Siya og balik kanako ngadto sa Iyang panon sulod sa dugay na nga panahon, ug andam na ako sa kataposan nga mobalik. Mihukom ako nga mobalik sa simbahan ug misugod og usa ka talagsaon, espiritwal nga proseso sa pagkaayo uban sa akong mahigugmaon nga bishop, kinsa mitabang kanako nga hingpit nga madapit ang kalinaw nga gitanyag sa Manluluwas sa akong kinabuhi.
Kalinaw Puli sa Kakulang
Ang pagbalik ngadto sa Simbahan dili sayon. Sulod sa dugay nga panahon, ako adunay dako kaayo nga kaulaw mahitungod sa akong kaugalingon. Apan sa dihang mas nakasabot ko sa akong balaan nga pagkatawo, naminosan ang kaulaw nga akong gibati. Nasayod na ako karon nga ang akong mga pagbati ngadto sa mga babaye wala mohimo nako nga usa ka makasasala, ug ang pagputol sa akong tiil wala naglimita sa akong bili. Kini nga mga kinaiya naghatag gayod kanako og usa ka lahi nga panglantaw ug adunay tahas sa akong espiritwal nga paglambo. Nasayod usab ako nga ang akong panglantaw makapanalangin sa uban diha sa ebanghelyo. Pinaagi sa grasya sa Manluluwas, masaligon akong nakadawat nga ako usa ka anak sa Dios. Hingpit akong gihigugma. Ug ang Langitnong Amahan ug si Jesukristo kaniadto, karon, ug kanunay nga andam sa pagpanalangin kanako samtang ako modangop ngadto Kanila. Kanunay.
Ang pagkawala sa akong tiil ug ang pagkaibog sa sama og sekso nagdala og pipila ka wala damha nga mga kalisdanan sa akong kinabuhi. Usahay dili gani ko gusto nga mobangon gikan sa higdaanan nga nakahibalo nga ako kinahanglan nga mogamit sa akong prosthetic nga tiil. Ang pagpaningkamot sa pagtuman sa tanang sugo sa Langitnong Amahan mahimong lisod sa pipila ka panahon usab. Bisan og kini dili ang pagpili sa tanan kinsa nakasinati og pagkaibog sa sama og sekso, ang akong personal nga pagpili mao ang pagtinguha og usa ka mahangtorong kompanyon. Usahay ako adunay makapawala og kadasig nga mga hunahuna nga walay lalaki ang mainteresado gayod nga makigminyo kanako tungod sa akong mga kahimtang, apan misalig ko nga ang Langitnong Amahan ang mopahinabo niadto nga mga detalye ug mopanalangin kanako kon ako motuman sa akong mga pakigsaad Kaniya.
Ang kawalay kasigurohan sa akong umaabot usahay makapawala sa kadasig. Nasayod ako nga kini nga mga hunahuna sa kakulang ug pagduha-duha nagagikan kang Satanas. Pinaagi sa pagdangop ngadto kang Kristo, nakakaplag ako og hilabihan nga kalinaw ug kalipay, ug kalig-on nga akong gikinahanglan sa pagbuntog niini nga mga hunahuna.
Nagsalig ako karon sa Dios sa paggiya sa akong kinabuhi. Niini nga proseso, nagkat-on usab ako kon unsaon sa pagkonektar ngadto sa mga babaye ug mga lalaki sa mas lawom, mas makahuluganon nga mga paagi nga anaa sulod sa mga utlanan nga gitakda sa Ginoo. Mitabang Siya kanako nga madugangan ang akong pagsalig nga sa umaabot nga adlaw Siya mohimong posible alang kanako nga makakaplag og usa ka lalaki nga akong higugmaon ug diin ako masilyo. Apan bisan unsay mahitabo, ako nakakat-on sa paghatag og bili kon kinsa ako ug sa pagdawat sa akong kinabuhi ug sa pagsalig sa mga panalangin nga Iyang giandam alang kanako.
Ang Atong mga Samad Makapaduol Kanato sa Manluluwas
Sa tibuok nakong kinabuhi, akong nakat-onan nga ang tanan mag-atubang og lisod, dili makiangayon, ug usahay sakit nga mga kasinatian nga wala nila masabti sa hingpit. Kitang tanan masamdan sa lain-laing paagi. Apan karon nasayod usab ako nga ang atong indibidwal nga mga kasinatian makapaduol kanato sa Manluluwas ug makatabang kanato nga makasabot sa Iyang walay kinutoban nga gahom sa atong kinabuhi.
Si Elder Neil L. Andersen sa Korum sa Napulog Duha ka Apostoles mitudlo: “Atol sa grabing pag-ant[o]s, ang Ginoo miingon kang Propeta Joseph, ‘Kining tanan nga mga butang makahatag kanimo og kasinatian, ug alang sa imong kaayohan.’ Sa unsang paagi ang nagngutngot nga mga samad mahimong para sa atong kaayohan? Sa panglimbasog sa yutan-ong mga pagsulay, nga nagmapailubon sa pagpadayon, ang makaayo nga gah[o]m sa Manluluwas magdala og kahayag, panab[o]t, kalinaw, ug pagla[o]m.”1
Alang kanako, ang pagkahimong usa ka pungkol ug pagkaibog sa mga babaye nagsugod isip sakit nga mga kasinatian. Apan kini nakatabang kanako nga moduol ngadto kang Kristo, ug Siya mihatag kanako og kalinaw. Nakasabot na ako karon nga walay usa niini nga mga kasinatian ang nakapaminos sa akong pagkatawo. Walay usa niini ang nagpugong kanako sa pagbaton sa tanan nga panalangin sa plano sa kaluwasan. Ug walay usa niini ang mopugong kanako sa pagkaplag sa tinuod nga kalipay nga nagagikan sa pagsunod kang Jesukristo ug pagtuman sa Iyang mga sugo kutob sa akong mahimo.
Wala gayod ako masayod unsa ang mahitabo sa akong umaabot o unsa ang ubang mga hagit nga kinahanglan nakong atubangon hangtod mobalik ako ngadto sa presensya sa akong Langitnong Amahan. Apan ako nasayod niini: Bisan unsa nga hagit nga atong giatubang o samad nga kita aduna—mental, emosyonal, pisikal o espiritwal man—mahimong maayo kon kita moduol sa Manluluwas. Makatabang Siya kanato nga makakaplag og paglaom ug kalig-on sa atong mga panglimbasog dinhi sa yuta. Ug Siya misaad nga sa adlaw sa Pagkabanhaw, ang atong mga lawas, hunahuna, ug kasingkasing hingpit nga mamaayo (tan-awa sa Alma 42; 11:42–44).
Kinahanglan nako nga mamaayo gikan sa akong mga pagbati sa kaulaw ug kakulang kabahin sa akong pagkaibog sa sama og sekso ug usab gikan sa pisikal ug mental nga mga sangpotanan sa pagkaputol sa akong tiil. Ug akong nasinati ang makaayo nga gahom ni Kristo ug nagpadayon sa kada adlaw samtang ako mopili Kaniya. Mitabang Siya kanako sa paghigugma sa akong kaugalingon ug makakaplag og katagbawan sa pagsunod sa Iyang ebanghelyo. Kon kamo mopili sa pagsunod Kaniya ug mobutang sa inyong kinabuhi sa mga kamot sa Dios, mamatikdan ninyo ang paglunsay sa inyong kaugalingon, giya sa tanan nga butang, gugma ug tinuod nga kalinaw (tan-awa sa Alma 42:13).