Unang mga Babaye sa Pagpahiuli
Si Telii Migamit sa Iyang mga Talento sa Pagpakigbahin sa Ebanghelyo
Sama ni Telii, matag usa kanato makakaplag og mga paagi sa pagserbisyo sa uban, pagtudlo sa ebanghelyo ug sa pagbarug alang sa atong mga tinuohan.
Kaniadtong Mayo 1844, si Telii ug ang iyang bana, si Nabota, midapit ni Addison Pratt, usa ka misyonaryo sa Santos sa Ulahing mga Adlaw gikan sa Estados Unidos, sa pagpuyo diha sa ilang panimalay sa Tubai nga isla sa Pasipiko. Si Telii ug Nabota mitudlo ni Elder Pratt sa ilang pinulongan ug mitudlo kaniya kon giunsa nila pagpuyo sa isla. Sila mihatag kaniya og kapuy-an ug pagkaon, ug gani si Telii miatiman sa iyang pangsaput.
Daghang masukiton nga mga tawo ang mibisita ni Elder Pratt sa panimalay ni Telii ug Nabota. Si Telii ug Nabota naminaw samtang siya mihubad sa mga kasulatan, mitudlo sa mga konsepto sa ebanghelyo, ug mihatag og mga panalangin. Si Telii nakakita og pipila ka mga tawo nga naayo pinaagi sa mga panalangin sa pagkapari ug misugod sa pagdala ni bisan kinsa nga iyang nahibaloan kinsa nasakit ngadto ni Elder Pratt aron mapanalanginan.
Si Telii ug Nabota apil sa unang mga Tubuaian nga nagpasakop sa Simbahan. Nahimo silang labing suod nga higala ni Elder Pratt didto ug mitabang kaniya sa pagsangyaw sa ebanghelyo. Gihubad ni Telii ang mga himno sa Santos sa Ulahing mga Adlaw ug ang mga kasulatan ug mipahimutang kanila sa himene, usa ka lokal nga estilo sa pagkanta. Daghang mga gabii, gipundok niya ang mga tawo aron sa pagtudlo kanila sa iyang mga kanta. Atol kini niini nga mga miting, nga usahay milungtad hangtud sa tungang gabii, nga ang iyang mga paryente ug mga higala unang nakakat-on sa mga konsepto sa ebanghelyo ug sa mga kasulatan. Sa wala madugay pipila ang nabunyagan.
Sa wala madugay, sa dihang ang Protestante nga mga misyonaryo miabut sa Tubuai sa pagbadlong sa mga tawo kinsa mipasakop sa Simbahan, si Telii mibarug sa pagbatok kanila ug “gipasabut og maayo ang baruganan gikan sa kasulatan” nga sila wala makalalis niini.1
Si Telii ug Nabota mipasalig sa pagpakigbahin sa ebanghelyo ug sa pagsuporta sa mga misyonaryo. Mibiyahe sila kauban ni Elder Pratt ug sa uban pang mga misyonaryo samtang sila nagsangyaw sa tibuok mga isla. Sa matag dapit, gitudlo ni Telii sa uban ang iyang mga awit, mihatag og pagkaon ug suporta alang sa iyang mga silingan, ug midala sa masakiton ngadto sa mga misyonaryo aron mapanalanginan.
Paghulagway ni Toni Oka