Unsa ang Diosnong Kapangulohan?

Ang Dios adunay nabanhaw nga lawas sa unod ug mga bukog. Siya mao ang Amahan sa atong mga espiritu. Siya hingpit nga nahigugma sa Iyang tanan nga mga anak. Ang Dios hingpit, aduna sa tanang gahum, ug nahibalo sa tanang mga butang. Siya makiangayon, maloloy-on, ug mabination. Nagpuyo kita isip mga espiritu uban sa Dios sa wala pa kita matawo. Siya mipadala kanato dinhi sa yuta aron sa pagkat-on ug paglambo. Ang labing dako nga tinguha sa Dios mao nga ang matag usa sa Iyang mga anak mobalik sa pagpuyo uban Kaniya pag-usab human kita mamatay. Ang Dios nagtudlo kanato nga kita kinahanglan gayud nga mosunod ni Jesukristo aron sa pagbalik ngadto sa presensya sa Dios.

Imahe

the Savior kneeling in prayer

Wala ngadto sa tuo: Joseph Smith Nagsulat, ni Dale Kilbourn; detalye gikan sa Unang Panan-awon, ni Jon McNaughton; Kristo Nagsangyaw didto sa Kalibutan sa Espiritu, ni Robert T. Barrett; litrato sa kawanangan gikan sa Getty Images; Unang Panan-awon, ni Walter Rane; litrato sa babaye nga nagbasa ni Tyler Lewis; Pagpaminaw, ni Michael Jarvis Nelson

Si Jesukristo usab adunay nabanhaw nga lawas sa unod ug mga bukog. Siya ang unang Anak sa Dios. Sa wala pa kita matawo, ang Dios mipili Kaniya nga mahimo nga atong Manluluwas. Kini nagpasabut nga si Jesus mianhi sa yuta nga mahimong ehemplo alang kanato, motudlo sa Iyang ebanghelyo, moula sa atong mga sala, ug moluwas kanato gikan sa kamatayon. Tungod ni Jesukristo, kita mapasaylo sa atong mga sala kon kita maghinulsol. Si Jesukristo usab nag-antus sa daghan nga mga butang aron Siya makasabut ug makatabang kanato. Si Jesukristo namatay ug unya nabuhi pag-usab, naghimo niini nga posible alang sa tanan nga mabuhi pag-usab.

Ang Espiritu Santo mao ang usa ka sakop sa Diosnong Kapangulohan nga walay pisikal nga lawas. Siya usa ka espiritu. Ang Espiritu Santo makahimo sa pagpakigsulti direkta ngadto sa atong mga espiritu. Siya nagpamatuod ngari kanato nga ang Dios tinuod ug nga si Jesukristo mao ang atong Manluluwas. Ang Espiritu Santo naglihok isip mensahero sa Dios sa paghatag kanato og mga pagbati sa gugma, paggiya, o kahupayan. Kon kita bunyagan ug kumpirmahan, madawat nato ang gasa sa Espiritu Santo. Human sa atong bunyag, ang Espiritu Santo makahimo sa pagpabilin kanunay uban kanato samtang kita nagsunod sa mga sugo sa Dios.

Paglabay sa panahon ang mga tawo naglibug mahitungod sa Diosnong Kapangulohan. Nagkasumpaki ang mga tawo mahitungod kon sama sa unsa ang Dios, si Jesukristo, ug ang Espiritu Santo. Kini mao ang usa ka rason kon ngano nga ang Unang Panan-awon ni Joseph Smith importante kaayo. Iyang nakita nga ang Langitnong Amahan ug si Jesukristo adunay mga lawas ug duha ka nagkalain-laing mga binuhat.

Imahe

woman reading

Wala ngadto sa tuo: Joseph Smith Nagsulat, ni Dale Kilbourn; detalye gikan sa Unang Panan-awon, ni Jon McNaughton; Kristo Nagsangyaw didto sa Kalibutan sa Espiritu, ni Robert T. Barrett; litrato sa kawanangan gikan sa Getty Images; Unang Panan-awon, ni Walter Rane; litrato sa babaye nga nagbasa ni Tyler Lewis; Pagpaminaw, ni Michael Jarvis Nelson

Ang mga kasulatan ug ang bag-ong mga propeta nagtudlo kanato nga ang Dios, si Jesukristo, ug ang Espiritu Santo nagkalain-laing mga binuhat nga may usa ka katuyoan: ang atong pagka-imortal ug kinabuhing dayon (tan-awa sa Moises 1:39). Sama sa mga miyembro sa samang grupo, nagtambayayong Sila sa pagtabang kanato matag adlaw. Mobati kita nga mas maduol ngadto Kanila kon kita maghinulsol sa atong mga sala ug mopili sa matarung.

• Ang Langitnong Amahan ug si Jesukristo usa sa katuyoan (tan-awa sa Juan 10:30).

• Ang Langitnong Amahan misulti ngadto sa Iyang Anak (tan-awa sa Mateo 3:16–17).

• Si Jesukristo misulti ngadto sa Iyang Amahan (tan-awa sa Juan 11:41).

• Si Jesukristo nag-ampo alang kanato nga mahimong “usa” sa umaabut nga adlaw (tan-awa sa Juan 17:11).

• Si Joseph Smith nakakita sa Langitnong Amahan ug ni Jesukristo (tan-awa sa Joseph Smith—Kasaysayan 1:17).

• Ang Espiritu Santo nagpamatuod nga si Jesukristo mao ang atong Manluluwas (tan-awa sa Juan 15:26).