Gihangup Ka Niini nga Isyu
Giunsa sa Ebanghelyo Paglig-on ang Among mga Pamilya
Photograph courtesy of the author
Pipila ka mga tuig ang milabay, ang among pamilya mihukom sa pag-empake sa among mga maleta, mobiya sa among panimalay, ug mosuroy sa gawas sa among nasud nga natawhan. Samtang kami nangandam alang niini nga panaw, kami kanunay nga magtinambagay sa pagsiguro nga kaming tanan nagkahiusa sa among desisyon tungod kay kini makaapekto sa matag usa kanamo sa lahi nga paagi.
Agig dugang sa pag-empake alang sa among pisikal nga mga panginahanglan, among gihisgutan kon unsaon namo “pag-empake” alang sa among espirituhanong mga panginahanglan pinaagi sa pagdala sa among mga kinaiya sa pag-ampo, pagtuon sa kasulatan, ug sa pagsimba. Samtang kami mipuyo sa lain-laing mga dapit, dako kaayo nga kaayohan ang among nakuha gikan sa pagsimba sa mga dapit nga lahi kaayo gikan sa unsay among naandan ug sa pakig-istoryahay ngadto sa mga Santos kinsa nagpuyo didto. Sa pahina 22, inyong mabasa ang mahitungod sa usa niadto nga mga dapit, ang Dubai, ug ang wala damha nga mga pagkasusama sa mga pamatasan nga among nakita sa atong Muslim nga mga silingan.
Ang atong pagkamiyembro sa Simbahan nagmugna og sistema sa gugma ug suporta, usa ka pamilya sa ebanghelyo nga kitang tanan kabahin niana. Ang akong silingan nga si Jamie usa ka talagsaong ehemplo sa pagpangalagad ngadto sa akong mga anak. Sama pananglit, sa dihang ang akong anak nga babaye naghulat nga mosulod sa missionary training center ug ako nagtrabaho sa panahon sa adlaw, si Jamie midala kaniya ngadto sa templo sa pipila ka mga higayon sa panahon nga ako dili makahimo.
-
Sa pahina 16, inyong mabasa ang mahitungod sa ubang mga paagi sa pagsuporta sa mga ginikanan pinaagi sa pagpangalagad.
-
Sa pahina 8, inyong mabasa ang tambag ni Elder Jeffrey R. Holland mahitungod sa paghupot sa atong mga anak nga duol kanato.
-
Sa pahina 12, inyong mabasa ang mahitungod sa mga paagi sa pagpalambo sa inyong mga pagtambag sa pamilya.
Kalingawi kini nga isyu samtang imong hunahunaon kon unsaon nimo paggamit ang mga baruganan sa ebanghelyo aron sa pagtabang sa inyong mga anak ug sa uban kinsa gibutang diha sa inyong kinabuhi.
Matinuoron,
Carol Chomjak