Digital Lamang
Ang mga Milagro Nga Nakatabang Kanako nga Makit-an ang mga Rekord sa Akong Pamilya sa Swiss Alps
Ang among pamilya hapit walay nahibaloan kabahin sa mga katigulangan sa akong amahan didto sa Switzerland. Apan pinaagi sa naggiya nga kamot sa Langitnong Amahan, amoa ra gyod nasangkapan ang kulang.
Sa tin-edyer pa, nakahinumdom ko nga nagtan-aw sa akong family tree ug naghunahuna kon sa unsa kaha nga paagi nga masulatan ang habig sa akong amahan diha sa family tree. Ang akong amahan, si Joseph Terribilini, mao ang usa ka unang henerasyon nga Amerikano. Ang iyang amahan, si Giuseppe, milalin gikan sa usa ka gamay nga balangay sa Swiss alps nga wala kaayo mi nasayran mahitungod niini. Sa kanunay gusto kong mouswag diha sa akong family history, mao nga nag-ampo ko kanunay alang sa tabang sa pagkahibalo unsaon sa pagbuntog sa babag nga atong giatubang.
Apan ang Langitnong Amahan nahibalo niining mga babag. Ug sa sinugdanan sa akong call sa misyon, nabati nako Siya nga naggiya kanako samtang ang nagsunod-sunod nga unom ka milagro gikan sa Italy ngadto sa Alabama nakatabang kanamo nga masangkapan ang kulang diha sa akong family tree nga habig sa akong amahan.
Milagro #1
Kanunay kong nakabaton og pagbati nga magserbisyo ko sa akong misyon didto sa Switzerland diin nagpuyo ang akong katigulangan sa makausa. Busa sa dihang nadawat nako ang call ngadto sa Italy niadtong 1970, natingala ko apan mahinamon. Sa language training mission (karon gitawag na og mga missionary training center), akong nahibaloan nga ang habagatang Switzerland, diin naggikan ang akong mga katigulangan, kabahin gayod sa akong misyon. Nasayod ko nga ang Langitnong Amahan mitawag kanako ngadto sa piho nga dapit alang sa usa ka rason.
Milagro #2
Sa tunga-tungang bahin sa akong misyon, ang akong kompanyon ug ako nadistino nga mahimong mga zone leader sa area nga naglakip sa habagatang Switzerland—ug kami adunay sakyanan.
Miadto kami sa balangay, sa Vergeletto, ug gipangita ang usa sa akong mga ig-agaw. Iya kaming gilibot ug mipaila-ila kanamo ngadto sa kura paroko, kinsa, sumala sa hangyo, mipakita kanamo sa mga libro sa mahinungdanong mga talaan alang sa dapit. Dayon namalik kami sa panimalay, apan usa ka binhi natisok diha kanako nga motubo sa tibuok nakong misyon.
Milagro #3
Usa nalang ka bulan ang nahabilin sa akong misyon, mibati ko nga kinahanglan ko nga molihok ug pangitaon ang mga rekord sa akong pamilya sa dili pa ko mopauli. Nag-ampo ko nga masayod kon aduna pa bay dugang nakong mabuhat, ug mibati ko og usa ka lahi nga pag-aghat gikan sa Espiritu nga nagsulti kanako nga kinahanglan ko makakuha og kopya niadtong mahinungdanon nga mga rekord nga akong nakita pila ka bulan ang milabay. Giingnan nako ang akong presidente sa misyon nga gibati nako nga kinahanglan ko nga mobalik sa balangay sa akong pamilya didto sa Switzerland ug mipasabot kon ngano. Ang balangay 87 ka milya (140 km) ang gilay-on, apan ang akong presidente sa misyon mitugot kanako sa pag-adto bisan pa niana.
Milagro #4
Kilumkilom pa kadto sa dihang ang pig-ot nga nagliko-liko nga dalan midala kanamo hangtod sa bukid ngadto sa gamay nga balangay sa Vergeletto. Mihunong kami sa sentro sa lungsod, ang simbahan nga Katoliko. Ang akong kompanyon ug ako nadani ngadto sa menteryo atbang sa karsada gikan sa simbahan nga mihayag sa gidagkotan nga mga kandila.
Samtang misulod kami sa menteryo, klaro ug kusog kaayo nakong nabati ang Espiritu nga migiya kanako nga wala pa nako sukad mabati sa una. Kana nga pagbati ug preskong hangin nga alpine nakamugna og nindot nga pagbati nga dili gayod nako makalimtan. Didto sa menteryo, ingon og ang kada lapida adunay mga kaapilido nako. Nakit-an pa gani namo ang lubong sa akong apohan sa tuhod; giingon didto nga ang mga tawo moadto kaniya aron magpaayo sa ilang nabali nga bukog.
Mibalik kami ngadto sa simbahan aron susihon kon makit-an ba namo ang pari. Didto nahimamat namo ang tigulang nga lalaki, kinsa misulti kanamo nga mao kadto ang Il Giorno dei Morti, o usa ka holiday nga giila isip ang Adlaw sa mga Patay (nga maoy gipasabot sa tanang kandila diha sa menteryo). Ang tawo misulti kanamo nga ang pari adunay gihimong mga serbisyo diha sa kasikbit nga mga balangay ug mobalik sa duha ka oras.
Ang akong kompanyon ug ako naghulat, ug sa dihang mibalik ang pari, ako mipahinumdom kaniya sa among paghimamat sa pipila ka bulan ang milabay ug dayon mihangyo kon mahimo ba ko nga makakita pag-usab sa importante nga mga rekord sa parokya.
Miuyon siya.
Milagro #5
Ang pari mipagawas og usa ka kahon sa mga libro nga gatusan na ka tuig ang gidugayon. Gisultihan nako ang pari nga ang atong Simbahan nag-microfilm sa mga rekord sa parokya didto sa Parma, Italy, 170 ka milya (274 km) ang gilay-on. Nangutana ko kon motugot ba siya kanamo sa pagdala sa mga rekord sulod sa pipila ka semana ug pakopyahan kini.
Miuyon ra siya pag-usab. Nakalitan ko.
Sa among pagbiya sa lungsod, nahibulong ko sa unsay nahitabo ug gani among gitan-aw ang salamin basin makita namo ang pari nga naggukod namo kay nausab ang iyang hunahuna. Duha ka semana ang milabay, kami miuli sa mga rekord ngadto kaniya, sumala sa gisaad.
Milagro #6
Tungod sa sinulatan, sa paggamit sa Latin, ug sa pagkadunot, ang mga rekord lisod nga mabasa. Apan dayon, sa pipila ka tuig nga milabay, nakabantay ko nga gatusan ka rekord nga gikan sa Vergeletto ang gi-link ngadto sa akong mga katigulangan diha sa FamilySearch. Linya sa pamilya nga makita lamang sa tulo o upat ka henerasyon karon nasumpayan ngadto sa pito ngadto sa siyam ka henerasyon!
Resulta kini sa usa ka propesyonal nga genealogist sa Alabama, USA, kinsa dili miyembro sa Simbahan nga mipakigbahin og usa ka sanga sa tibuok kalibotan nga family tree nako. Siya mi-access ug gibasa ang mga rekord gikan sa mga libro nga akong gipakopyahan didto sa Italy ug gisukip [attached] diha sa FamilySearch. Kini nga tawo makapahingangha; nakigtambayayong kami sa makadaghang higayon. Mipasabot siya nga ang pag-upload niadtong mga ngalan ug mga kapanguhaan mao ang iyang paagi sa pagbayad og kabubut-on sa Simbahan alang sa tanan nilang buhat sa paghimo og mga rekord nga maanaa sa FamilySearch.
Karon ang habig sa akong papa diha sa lista sa akong kaliwatan nga fan chart napuno na sa mga ngalan. Ug ako napanalanginan sa paghimo sa mga buhat sa templo alang kanila.
Kasagaran mohandom ko og balik natingala ngano kaha nga ang usa ka pari sa Katoliko nagtugot og usa ka batan-ong Amerikano—kinsa usa usab ka misyonaryo sa laing tinuohan—sa pagdala sa iyang koleksyon sa importante nga mga rekord nga mogawas sa nasod aron kopyahon. Nag-ampo ba ang akong mga katigulangan alang kanako? Nag-ampo ba sila aron ang kasingkasing sa pari malukmay?
Wala ko kahibalo—basin kanang duha gibuhat nila. Apan ako gayod nasayod nga ang Langitnong Amahan makatabang sa pagpahinabo sa mga milagro kon kita magtinguha sa Iyang tabang. Ug sama sa gisaad ni Elder Dale G. Renlund, ang buhat sa family history naghupot og daghan kaayong mga panalangin alang niadtong anaa sa duha ka habig sa tabil: “Ang Dios molig-on, motabang, ug mobulig kanato; ug Iyang ibalaan ngari kanato ang dako kaayo natong kasakit. Kon tigumon nato ang atong mga family history ug moadto sa templo para sa atong katigulangan, tumanon sa Dios ang daghan niining gisaad nga panalangin sa mga buhi ug patay na.”1 Ang Ginoo naggiya niini nga buhat, ug kon kamo mosalig Kaniya, Siya makahimo og mga milagro alang kaninyo ug sa inyong pamilya samtang kamo maningkamot sa pagpundok sa Israel.