Mga Young Adult
3 ka Pangutana sa Kasaysayan sa Simbahan nga Gitubag ni Elder ug Sister Rasband
Gikan sa usa ka Face to Face nga kalihokan uban ni Elder Ronald A. Rasband sa Korum sa Napulog Duha ka mga Apostoles ug sa iyang asawa, si Sister Melanie Rasband, niadtong Septyembre 13, 2020. Aron sa pagtan-aw sa tibuok nga kalihokan, adto sa facetoface.ChurchofJesusChrist.org.
Usahay kitang tanan adunay mga pangutana. Apan maayo gani, kita adunay mahigugmaon nga mga Apostoles nga makatabang kanato sa pagpangita og mga tubag.
Giunsa nimo pagkahibalo nga si Joseph Smith tinuoray nga gitawag sa Dios nga mahimong propeta sa Pagpahiuli sa ebanghelyo ni Jesukristo?
Elder Rasband: Nasayod kami nga ang paagi nga kamo makabaton og kahibalo sa inyong pagpamatuod mahimong lahi kaysa amoa. Natawo ako sa usa ka mapahinungoron nga pamilya ug nakaangkon sa akong pagpamatuod isip usa ka batan-ong lalaki nga milungtad uban kanako hangtod gayod niini nga adlaw.
Gusto kong mopaambit kaninyo og usa ka kasulatan bahin sa [pag-angkon og pagpamatuod sa gipahiuli nga ebanghelyo], nga makita sa ika-46 nga seksyon sa Doktrina ug mga Pakigsaad, diin naghisgot kini mahitungod sa mga gasa sa Espiritu nga mahimong ihatag kanato.
Ganahan ko nga moadto sa mga bersikulo 13 ug 14, nga mao ang duha ka bersikulo nga namulong mahitungod sa gasa sa pagpamatuod. Bersikulo 13: “Ngadto sa uban kini gihatag pinaagi sa Espiritu Santo aron masayud nga si Jesukristo mao ang Anak sa Dios, ug nga siya gilansang sa krus alang sa mga sala sa kalibutan.” Gusto ko nga masayod kamo nga ako ug ang akong hinigugma nakaangkon sa among pagpamatuod niini nga paagi. Kami adunay mga saksi ni Ginoong Jesukristo nga mipainit sa sulod sa among dughan, ug nasayod kami nga Siya ang atong Manluluwas.
Ang bersikulo 14 nagsugyot og lain nga gasa, ug hatagan nako og gibug-aton nga kini usa usab ka gasa: “Ngadto sa uban kini gihatag sa pagtuo sa ilang mga pulong, nga sila unta makabaton og kinabuhi nga dayon kon sila magpadayon nga matinud-anon.” Busa, among batan-ong mga higala, kitang tanan anaa sa managlahi nga dalan niana nga pagpamatuod [sa gipahiuli nga ebanghelyo]. Pipila kanato aduna niadtong mainiton nga mga pagpamatuod. Ang uban kanato nagtuo sa pagpamatuod sa uban, ug OK ra kana. Mahimo kamong motuo sa amoa, o mahimo kamong motuo sa inyong mga higala, sa inyong mga ginikanan, sa inyong mga lider, sa inyong mga magtutudlo. OK ra nga modawat sa pagpamatuod sa uban. Sa pagkatinuod, usa kini ka gasa nga makahimo niana. Busa alang kaninyo nga nagpalambo sa inyong kaugalingon nga mga pagpamatuod, hinumdomi nga kini usa ka panaw ug usa ka proseso.
Diha sa pamahayag sa Pagpahiuli,1 kini nag-ingon, “Kami isip Iyang mga Apostoles modapit sa tanan nga masayud—sama kanamo—nga ang kalangitan bukas.” Unsay buot ipasabot niini nga pagdapit diha kaninyo? Kon buot sa Dios nga makigsulti kanato, nganong lisod man kaayo nga makadungog Kaniya?
Sister Rasband: Bahin niana, nagtuo ako nga kasagaran sa unsay mahinungdanon nga kab-oton niini nga kinabuhi dili sayon, ug nagtuo ako nga ang mapainubsanon nga pagtinguha ug pag-ampo aron makakat-on kon unsaon sa pagpaminaw sa Espiritu Santo usa ka importante nga butang sa pagkat-on unsaon sa pagpaminaw Kaniya. Kasagaran kita adunay maayo nga pagbati lamang. Usahay kita makakita og usa ka butang. Usahay kita makadungog gayod og mga pulong, ug masipyat kita sa paghunahuna nga kini mao ang atong kaugalingon nga mga hunahuna ug mga pagbati nga atong nadungog. Nagtuo ako nga importante kini nga butang nga makakat-on unsaon sa pagpaminaw sa Espiritu Santo sa inyong kaugalingon.
Dapiton nako ang matag usa kaninyo nga mohangad sa langit, sa kanunay, uban sa andam nga kasingkasing ug bukas nga mga dunggan nga maminaw Kaniya (tan-awa sa 3 Nephi 11:5).
Elder Rasband: Nakaplagan nako ang pulong sa Ginoo pinaagi sa pagbasa sa mga kasulatan. Kon ako adunay mga isyu nga akong giproblema, o gikabalak-an, sa among pamilya, sa akong trabaho, sa akong tahas ug calling, maningkamot akong magtuon pinasikad sa hilisgotan ug mangita og usa ka butang nga magamit, ug dayon adunay usa ka butang nga makapadani gayod kanako, ug kini ingon og ang Ginoo naghatag kanako og piho kaayo nga panudlo pinaagi sa Iyang balaan nga pulong diha sa mga kasulatan.
Nan kini mahitabo sa daghang paagi. Kamong tanan makabaton og inyong kaugalingong mga paagi. Ang Langitnong Amahan nakaila kaninyo. Siya nahigugma kaninyo. Kamo ang Iyang mga anak, ug Siya motubag kaninyo sa mga paagi nga pamilyar ug tukma alang kaninyo.
Unsa ang inyong paborito nga bahin sa Pagpahiuli o sa Unang Panan-awon? Unsa nga mga kamatuoran ang inyong labing gimahal nga miabot isip resulta niana nga hitabo?
Sister Rasband: Alang kanako, yano kini. Sa dihang ang Dios Amahan misulti ug mitawag ni Joseph Smith pinaagi sa ngalan, nag-ingon, “Joseph, kini mao ang Akong Hinigugmang Anak. Paminaw Kaniya!” ang akong pagpamatuod milambo gayod nga ang Dios Amahan ug ang Anak nakaila sa matag usa kanato. Nahigugma Sila kanato. Ug kon maminaw kita sa Anak, makakat-on kita sa mga paagi [sa Amahan] ug matudloan kon unsaon sa pag-angkon og kinabuhing dayon.
Elder Rasband: Ang piho nga bahin sa Pagpahiuli nga akong gimahal mao nga si Joseph Smith usa ka 14 anyos nga batang lalaki sa dihang miadto siya sa kakahoyan agig tubag sa pagbasa sa mga kasulatan aron mangutana sa iyang Langitnong Amahan diha sa mapainubsanong pag-ampo. Si Joseph Smith usa gayod ka sumbanan alang kanato bahin niini: siya adunay usa ka pangutana nga gipanglimbasogan niya sulod sa dugay nga panahon, ug gipadangat niya ang iyang pangutana ngadto sa Langitnong Amahan, nagdahom nga makakuha unta siya og tubag, ug nakakuha gayod siya.