Mga Young Adult
Kon Nagduhaduha, Ipabilin nga Abli ang Pultahan alang sa Hugot nga Pagtuo
Bisan og usahay kita tingali magduhaduha sa atong espirituhanong mga kasinatian, ang atong kasegurohan mahimong mobalik dayon.
Bisan kon kita nagtubo sa Simbahan o nakabig sa ulahing bahin sa kinabuhi, daghan kanato ang tingali nakasinati og mga higayon sa pagkuwestiyon o pagduhaduha. Tingali nakabaton kita og talagsaon nga espirituhanong mga kasinatian apan karon napalgan ang atong mga kaugalingon nga naghunahuna: Tinuod ba gayod kadtong espirituhanon nga mga kasinatian, o naghunahuna lang ko nga nabati ang Espiritu? Unsa kaha kon walay usa niini nga tinuod? Ug unsaon naman lang ang akong mga pangutana nga wala pay mga tubag? Unsaon man nako pagpabilin sa Simbahan kon dili ako sigurado nga tinuod pa ba kini?
Alang kanako, nasurprisa ko nga kini nga mga pangutana miabot human ako miserbisyo sa akong misyon! Nasayran nako ang kamatuoran uban sa hugot kaayo nga pagsalig nga gusto kong mosangyaw niini ngadto sa uban sulod sa usa ka tuig ug tunga—ug karon nagduhaduha na ako sa tanan nga akong nahibaloan ug gitudlo. Pagkasayang unta niadtong mga higayona kon walay usa niini nga tinuod. Mao nga tinuod ba kadto, ang tanan nga akong gipangtudlo? O gusto lang nako nga mahimong tinuod kini? Human makakita og mga higala nga mibiya sa Simbahan ug samtang nag-atubang sa akong kaugalingong panglimbasog sa pagtuo, naghunahuna ko kon ako bang gilingla ang akong kaugalingon.
Atol niining panahona, wala ko mohunong sa pagsimba o sa pagsunod sa mga sugo tungod kay ako adunay dagko nga mga pangutana. Hinoon, tungod kay ako adunay mga pangutana, naningkamot ako sa pagsunod sa tambag ni Presidente Russell M. Nelson sa “pagpalambo sa [akong] espirituhanong kapasidad sa pagdawat og pagpadayag.”1
Nasayod ako nga “walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong nangita, inadlaw nga pagbasa sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug family history.”2 Mibati ako nga mahinungdanon kaayo kini nga magpabiling duol sa Dios. Sa kataposan, Siya mao lamang ang adunay mga tubag sa akong mga pangutana.
Ang Istorya ni Eunice
Usa ka adlaw samtang nagbasa ko sa Mga Santos: Ang Istorya sa Simbahan ni Jesukristo sa Ulahing mga Adlaw, nakaagi ako og talagsaon nga istorya mahitungod sa usa ka babaye sa sayong bahin sa Pagpahiuli. Si Eunice Franklin ingon og adunay sama sa akong mga pangutana ug mga kabalaka.
Si Eunice nabunyagan sa New York pinaagi sa usa ka misyonaryo nga ginganlan og Elijah Able. Tinud-anay siyang nakabig ngadto sa ebanghelyo atol sa iyang bunyag. Apan dayon, pagkahuman mibiya si Elijah padulong sa Canada aron magsangyaw, si Eunice nagsugod sa pagduhaduha sa ebanghelyo ug sa unsay iyang nahibaloan nga tinuod kaniadto. Nagsugod siya sa paghunahuna kon si Joseph Smith usa ba gayod ka propeta ug kon ang Basahon ni Mormon tinuod nga kasulatan. Wala siya makatulog sa daghang gabii, nga naghunahuna nga tingali siya nalingla.
Ang Ginoo mipakita sa panglimbasog ni Eunice ngadto kang Elijah diha sa usa ka damgo, ug mibalik siya dihadiha dayon ngadto sa New York. Sa dihang nanuktok siya sa pultahan ni Eunice, nakugang si Eunice—nagplano na siya sa pagsulti kaniya nga wala na siya mituo sa higayon nga makita niya siya pag-usab. Hinoon, gipasulod niya si Elijah. Sa dihang gidapit siya ni Elijah sa iyang wali niana nga gabii, nagduhaduha siya ug dili gustong moadto. Apan sa kataposan misugot siya ug miadto aron maminaw sa unsay iyang isulti.
Sa iyang wali, si Elijah mikutlo sa 1 Pedro 4:12, nga nag-ingon “ayaw kamo kahibulong sa mga mapait nga pagsulay nga inyong giantos.” Ang mapait nga pagsulay nga nagtinguha sa paglaglag sa hugot nga pagtuo ni Eunice dili mahimong molampos—samtang si Eunice naminaw kang Elijah nga namulong, ang iyang mga pagduhaduha hinay-hinay nga nawala. Ang Mga Santos nag-asoy niini sa kini nga paagi: “Ang kasiguroan nga nabati niya kaniadto sa makausa pa mibalik dayon.”3
Ang Kasegurohan Mobalik Dayon
Dili gayod nako makalimtan ang kasinatian ni Eunice, ug balik-balik akong namalandong niini. Sama ni Eunice, nakakat-on ko gikan sa yano ug gamhanan nga mga pulong ni Elijah. Kinahanglan “ayaw kamo kahibulong” nga magkanaa kita og mga pangutana mahitungod sa atong pagtuo. OK ra gayod kana. Samtang ang kamatuoran tingali kaniadto ingon og gibubo gikan sa langit, mahimong adunay mga higayon unya diin mobati kita og espirituhanon nga hulaw. Tingali maghunahuna kita kon nabati ba gayod nato ang ulan sa espirituhanon nga mga pagmatuod. Samtang wala pay mga tubag o mga kumpirmasyon nga gihatag, makapadayon kita sa pag-ampo alang sa ulan sa pagpadayag. Mahimo kitang magtinguha og usa ka saksi aron mahibalo nga unsa ang tinuod kagahapon tinuod gihapon karon. Si Elder Jeffrey R. Holland sa Korum sa Napulog Duha ka mga Apostoles mitudlo: “Kon kini mao ang sakto sa dihang nag-ampo kamo mahitungod niini ug misalig niini ug nagpuyo alang niini, sakto kini karon. … Atubanga ang inyong mga pagduha-duha. Kontrolaha ang inyong mga kahadlok.”4
Pinaagi sa pag-abli og usab sa pultahan ngadto sa iyang misyonaryo nga higala, bisan kon naghunahuna siya kon nganong kinahanglan niyang buhaton, si Eunice miabli og balik sa iyang kasingkasing. Ang Ginoo makakab-ot pag-usab kang Eunice ug makatabang kaniya nga mobati og kumpirmasyon sa tanan nga iyang nasayran kaniadto. Sa samang paagi, ang matag usa kanato mahimong ipabilin nga abli ang pultahan alang sa hugot nga pagtuo bisan kon nanglimbasog sa mga pagduhaduha. Mahimo kitang magpadayon sa pagbuhat sa unsay husto ug magtinguha og pagpadayag—bisan kon dili kita segurado kon nganong gihimo gayod nato kini.
Ipabilin nato nga abli ang pultahan pinaagi sa pagpadayon sa pagbuhat sa gagmay nga mga butang nga ang Dios misulti kanato nga maayo alang sa atong mga kalag. Ibalaan nato ang adlawng Igpapahulay ug motambong sa atong mga miting. Mobasa kita sa mga kasulatan, bisan kon usa lang ka bersikulo usahay. Maminaw kita sa usa ka himno o pakigpulong sa komperensiya. Makig-istorya kita sa Langitnong Amahan mahitungod sa atong mga kabalaka ug mga panghinaot ug mohangyo Kaniya sa pagtabang kanato nga masayod sa kamatuoran. Motuman kita sa mga sugo, maghinulsol, ug motinguha sa pakig-uban sa Espiritu Santo.
Bisan kon kita kutob ra sa pagtinguha sa pagtuo, makapadayon gihapon kita sa pagbuhat sa gagmay nga mga butang ug motugot sa tinguha nga molihok dinhi kanato. Makagahin kita og gamayng luna sa atong mga kasingkasing aron motubo ang dugang pa nga pagtuo. (Tan-awa sa Alma 32:27.)
Unsay Akong Nahibaloan
Bisan og usahay ako naghunahuna, nahisalaag, ug nagduhaduha, ako nakakat-on ug nakakat-on pag-usab sa akong kaugalingon nga kini mao ang Simbahan ni Kristo. Bisan og tingali dili usa ka hingpit nga tawo si Joseph Smith, nasayod ko nga siya usa ka dinasig nga propeta sa Dios kinsa misakripisyo sa tanan ug mibuhat sa iyang labing maayo kutob sa iyang mahimo. Nasayod usab ako nga ang Basahon ni Mormon usa ka tinuod nga karaang rekord ug balaan nga kasulatan nga gitipigan alang lamang kanato sa atong panahon. Ang Langitnong Amahan nagpadayon sa pagmatuod niini nga mga kamatuoran ngari kanako kada adlaw. Ug malipayon ako nga Siya mimatuod usab niini nga mga kamatuoran ngadto kang Eunice Franklin.
Nasayod ako nga samtang ipabilin nato nga abli ang atong mga pultahan ug mga kasingkasing ngadto sa kamatuoran, ang Dios motabang kanato sa pagbati sa unsay tinuod ug unsay dili pinaagi sa Espiritu Santo. Ang atong espirituhanong mga kasinatian dili ikalimod nianang higayona. Ug sa matag gutlo human niana, kon mobati kita nga ang mga pagduhaduha hinay-hinay nga mibalik, mapahinumdoman nato ang atong mga kaugalingon sa unsay atong gibati. Sama sa nahitabo kang Eunice, ang atong kasegurohan mahitungod sa mga kamatuoran sa ebanghelyo mahimong mobalik dayon.
Dili kita kinahanglang magpuyo og dugay kaayo sa hulaw sa pagduhaduha kon mohupot lamang kita sa atong espirituhanong mga kasinatian. Si Elder Neil L. Andersen sa Korum sa Napulog Duha ka mga Apostoles nag-ingon “hangupa ang sagrado ninyong mga panumduman. … Saligi nga miabut kini kaninyo gikan sa inyong Langitnong Amahan ug sa Iyang Hinigugma nga Anak. Tuguti nga magdala kini og pailub sa inyong mga pagduhaduha ug panabut sa inyong mga kalisdanan. Mosaad ko ninyo nga samtang kamo andam nga moila ug mainampingon nga mobahandi sa espirituhanong mga hitabo nga angay hinumduman sa inyong kinabuhi, magkadaghan pa ang moabut kaninyo.”5
Nasayod ako nga alang niadtong kinsa naningkamot sa paghimo og bag-o nga espirituhanong mga kasinatian ug mopakita og hugot nga pagtuo diha kang Kristo, kini nga saad tinuod: “Ang motuo [kang Kristo] dili na gayod uhawon” (Juan 6:35). Ang mga tubag nga atong gikinahanglan moabot. Makalahutay kita sa mapait nga mga pagsulay nga ilabay ni Satanas kanato. Ug mahimo kitang magpabilin nga matinud-anon ngadto sa atong mahigugmaon nga Dios sa tanan natong mga adlaw.