Sa Unsang Paagi ang Pagkaila ni Propeta Joseph Nakapalig-on sa Akong Hugot nga Pagtuo
Ang kinabuhi ni Joseph Smith ug sa ubang mga nahaunang mga Santos dili kaayo lahi sa atong kaugalingon. Ang ilang mga kasinatian makapalig-on sa atong hugot nga pagtuo.
Joseph and Emma with Baby Alvin [Si Joseph ug si Emma uban sa Batang Gamay nga si Alvin], ni Liz Lemon Swindle, dili mahimong pakopyahan
Sa dihang una nakong gisugdan ang pagtrabaho sa Proyekto nga Joseph Smith Papers 11 na katuig ang milabay, aduna koy lig-on nga pagpamatuod kabahin ni Joseph Smith isip ang Propeta sa Pagpahiuli. Hinoon, si Joseph ingon og hapit nahisama na sa usa ka mugna sa hunahuna para nako—usa ka tawo kinsa hilabihan ka nag-una sa pagkaespirituhanon nga naglisod ko sa pagtugkad kaniya. Nakadawat siya og kahibulongan nga mga pagbisita gikan sa langitnong mga binuhat, lakip sa atong Langitnong Amahan ug sa atong Manluluwas, si Jesukristo. Ako, sa laing bahin, usahay naglisod sa pagbati sa gugma sa Dios.
Tungod kay gigahin nako ang milabayng 11 ka tuig sa pagpanukiduki kabahin sa kinabuhi ni Joseph Smith—nagbasa sa iyang mga journal, sa iyang mga sulat, sa iyang mga pakigpulong—mas nailhan pa nako siya og maayo sa personal nga lebel. Ug akong naamgohan nga siya usa ka tawo sama nako. Oo, siya usa ka propeta sa Dios ug nakadawat og talagsaong mga pagpadayag, mga panan-awon, ug mga pagbisita. Apan siya kinahanglan gihapon nga mobuntog sa mga hagit sama natong tanan.
Kita karon nga nabuhi niining mga higayona nagpuyo sa kalibotan nga lahi ra kaayo kay sa kang Joseph Smith ug sa nahaunang mga Santos. Ug gahi ang atong mga problema dili gayod managlahi. Kitang tanan adunay mga kalisdanan tungod sa tawhanong kasinatian: sakit, kamatayon, pagbudhi, pagkawalay kadasig, ug basta malisod lang gyod nga mga panahon. Si Joseph usab adunay mga kahigayonan nga daw ang Dios layo kaniya ug dihay naghunahuna siya kon ang Ginoo nakahibalo ba gayod sa mga kahimtang niya ug sa mga Santos. Siya misagubang sa pagkamatay sa mga minahal ug nag-antos gikan sa mga sakit-sakit ug mga pagsulay, apan siya misugat niini uban sa ligdong nga pagtuo nga ang Dios anaa kaniya ug nga adunay mga “maayong mga butang nga moabut.”1
Ang mosunod nga duha ka ehemplo gikan sa kinabuhi ni Joseph Smith naghatag og gibug-aton kon giunsa niya pagdala ang tawhanong kahimtang ug sa unsang paagi ang pagtuon sa iyang kinabuhi ug sa mga kasinatian sa nahaunang mga Santos nakatabang nako sa pag-atubang sa akong kaugalingong mga pagsulay.
“Tingali kita sa bisan unsang paagi makasimpatiya kaniya”
Kitang tanan adunay higayon nga magsagubang og kagul-anan tungod sa kamatayon ug sakit. Si Joseph ug Emma Smith dili lahi. Ang ilang unang anak namatay sa wala madugay human sa pagkatawo, ug sa sunod nga pagmabdos ni Emma (kaluha) mitapos usab sa pagkamatay sa mga bata. Unya si Joseph ug Emma misagop sa bag-ong natawo nga kaluha kansang inahan, si Julia Clapp Murdock, namatay diha sa pagpanganak. Paglabay sa napulog usa ka bulan, niadtong Marso 1832, ang bata nga si Joseph—usa sa mga kaluha—namatay human gisulong sa manggugubot nga panon si Propeta Joseph naekspos ang bata, kinsa nag-antus sa tipdas, sa bugnaw nga hangin sa kagabhion.2
Ang mga kamatayon sa iyang mga anak nakahatag ni Joseph og pagsabot alang sa uban kinsa nakasinati sa pagkawala sa mga minahal. Pipila ka adlaw human sa kamatayon sa iyang anak nga lalaki, ang Propeta mibiyahe ngadto sa Missouri aron sa pagtuman sa usa ka sugo nga gihatag sa Ginoo ngadto kaniya sa pagtambag sa mga Santos didto. Sa iyang pagbalik gikan sa biyahe, si Joseph nalangay human nga si Newel K. Whitney, ang iyang kompanyon sa pagbiyahe, miantos sa pagkabali sa bitiis tungod sa aksidente. Ang duha kinahanglang magpabilin sa gamayng lungsod sa Greenville, Indiana, sulod sa pipila ka semana hangtod nga si Newel igo nang makabiyahe.3
Samtang si Joseph natanggong sa Greenville, nakadungog siya nga ang iyang pag-umangkon nga si Mary—ang duha ka tuig nga anak nga babaye ni Hyrum Smith—bag-o lang namatay. Ang kamatayon nakapahugno ngadto ni Hyrum ug sa iyang asawa nga si Jerusha.4
Sa pagkadungog ni Joseph sa balita, siya misulat ngadto ni Emma—kinsa nagbangutan pa gihapon sa pagkawala sa batang si Joseph. “Akong gikaguol sa pagkadungog nga si Hyrum nawad-an sa iyang gamay nga bata,” misulat si Joseph. “Tingali kita sa bisan unsang paagi makasimpatiya kaniya.” Dayag lang nga si Joseph ug Emma makasimpatiya, sa ngan nga nawad-an og upat sa ilang kaugalingong mga anak. Dayon mipadayon si Joseph, “Apan kitang tanan kinahanglang modawat sa kahimtang sa atong kinabuhi ug moingon nga ang kabubut-on sa Ginoo ang matuman.”5 Sa paghatag og pagsabot sa kamatayon, gibutang ni Joseph ang iyang pagsalig diha sa Ginoo.
Akong mahunahunaan kining kasinatian sa higayon nga nagsagubang ko sa mga pagkamatay sa mga sakop sa pamilya, mga miyembro sa ward, ug mga higala. Bisan si Propeta Joseph, kinsa nakasinati sa mahimayaon nga panan-awon sa celestial, terrestrial, ug telestial nga gingharian sa mga unom ka semana sa wala pa ang kamatayon sa bata nga si Joseph (tan-awa sa Doktrina ug mga Pakigsaad 76), gikasubo ang pagkamatay sa iyang anak. Nasayod siya nga makita pa niya pag-usab ang batang si Joseph ug ang uban pa niyang tulo ka anak, apan ang ilang mga kamatayon sakit gihapon. Isip usa ka propeta wala matangtang ang kasakit o malikay si Joseph gikan sa pagsinati sa mga kalisdanan sa mortalidad. Apan ang pagsalig sa Dios ug sa Iyang plano nakapakunhod sa uban nga kasakit.
“Pagmalinawon ug hibaloi nga Ako mao ang Dios.”
Niadtong 1833, si Joseph Smith ug ang tibuok Simbahan nakasinati og tumang kalisdanan sa dihang ang manggugubot nga panon miabog sa mga Santos gikan sa siyudad sa Zion sa Jackson County, Missouri. Uban sa daghang mga Santos nga gitugnaw, gigutom, ug walay panimalay, ang mga lider sa Simbahan nagkinahanglan kaayo og balaan nga tabang labaw sa tanan. Apan samtang namalandong si Joseph sa sitwasyon, namatikdan niya ang iyang kaugalingon nga wala makabaton og direksyon. Human sa pasiunang kabayolente niadtong Hulyo 1833, si Joseph misulat ngadto sa mga Santos sa Missouri: “Sa walay pagduhaduha ako nasayod nga siya [ang Ginoo] diha-diha moluwas sa Zion, naangkon nako ang Iyang hingpit nga pakigsaad nga mao kini ang mahitabo. Apan mahimuot ang Dios nga itago sa akong mga mata ang pamaagi kon unsaon gayod nga mahimo sa tukmang paagi ang usa ka butang.”6
The Saints Driven from Jackson County, Missouri [Ang mga Santos Gipapahawa gikan sa Distrito sa Jackson], ni C. C. A. Christensen, sa maayong kabubut-on sa Brigham Young University Museum of Art
Human ang mga Santos giabog gikan sa distrito sa bulan sa Nobyembre, mihangyo si Joseph sa Ginoo pag-usab alang sa mga tubag sa duha ka piho nga mga pangutana: “nganong gitugot sa Dios ang hilabihan ka dako nga kalamidad nga mahitabo sa Zion” ug “sa unsa nga paagi siya mopabalik og usab niini sa iyang kabilin.” Apan si Joseph wala gihapon makakuha og direksyon. “Ang Ginoo wala gihapon mipadayag [sa mga tubag] ngari kanako,” misulti siya ni Edward Partridge, ang bishop sa Missouri. “Wala kini gipakita ngari kanako.” Hinoon, ang Dios mihatag ni Joseph og usa ka makahupay nga pag-aghat: “Pagmalinawon ug hibaloi nga Ako mao ang Dios.”7
Niadtong Disyembre 16, 1833, si Joseph sa kataposan nakadawat sa iyang mga tubag pinaagi sa pagpadayag (tan-awa sa Doktrina ug mga Pakigsaad 101). Ang unang bahin niana nga pagpadayag mipasabot nganong ang Ginoo mitugot sa mga Santos nga gipugos sa pagpahawa gikan sa Distrito sa Jackson—ang unang pangutana ni Joseph sa Dios. Ang ikaduha nga bahin mao ang usa ka sambingay mahitungod sa usa ka halangdon nga tawo kinsa nawad-an sa iyang yuta tungod sa iyang mga kaaway ug mihangyo sa kusgan nga mga tawo sa iyang panimalay aron sa pagbawi og balik sa yuta. Mao kadto ang tubag sa ikaduhang pangutana ni Joseph. Gibalik usab sa Ginoo ang Iyang nag-una nga mga pulong sa paghupay: “Pagmalinawon ug hibaloi nga ako mao ang Dios” (Doktrina ug mga Pakigsaad 101:16).
Ang matag usa kanato adunay mga higayon sa atong mga kinabuhi nga kita mobati nga daw ang Dios dili motubag sa atong mga pag-ampo. Siguro ingon og layo ra Siya, ug mahimong kita makapangutana kon nakahibalo ba gyod Siya sa unsay panghitabo. Aduna ko niana nga mga higayon ug naghunahuna kon kanus-a moabot ang tubag. Nahimo kining makahupay alang kanako sa pagbasa nga bisan si Joseph Smith, ang bantogang Propeta sa Pagpahiuli, adunay mga higayon diin siya usab nanglimbasog alang sa mga tubag—diin wala gipakita sa Dios kaniya ang tanan sa usa ka higayon. Kana naghatag kanako og kaisog sa pagpadayon sa hugot nga pagtuo, sa pagkasayod nga kon anaa sa hustong panahon, ako makadawat sa akong tubag.
Si Propeta Joseph Smith usa ka dalaygon nga tawo. Nagpabilin siya nga usa sa akong mga bayani. Kinahanglan niyang agian ang mga pagsulay sa kinabuhi, sama nako. Kinahanglan niyang atubangon ang kamatayon, sakit, ug ang mawad-an og kadasig. Apan siya mipadayon nga may pagtuo sa Dios ug ni Jesukristo nga nakapahimo kaniya sa pagbuntog sa iyang mga kalisdanan.
Ang kaisog nga akong gibati sa dihang nagbasa ko sa iyang kalig-on, sa kalig-on ni Emma, ug sa kalig-on sa nahaunang mga miyembro sa Simbahan naghatag kanako og paglaom nga akong mabuntog usab ang akong mga hagit. Alang kanako, kana ang usa sa labing mahinungdanong mga rason sa pagtuon sa kasaysayan sa Simbahan: aron ang akong pagtuo mapalig-on pinaagi sa pagtan-aw sa mga ehemplo niadtong kinsa nag-una.