Dali, Sunod Kanako
Pagkadungog mahitungod sa Tulo ka Ang-ang sa Himaya sa Unang Higayon
Hulyo 5–11
Buhat sa art ni Annie Henrie Nader
Ang seksyon 76 sa Doktrina ug mga Pakigsaad nagklaro sa importanteng mga aspeto sa plano sa kaluwasan nga nawala gikan sa yuta atol sa Apostasiya. Alang sa daghang tawo, ang pagkat-on niining gipahiuli nga mga kamatuoran sa unang higayon usa ka dili malimtan nga kasinatian. Kini mao ang nahitabo kang Connie, usa ka kinabig gikan sa Richmond, Virginia, USA.
Nahinumdom siya: “Kanunay nakong nakita ang gugma sa Dios kon magbasa sa Biblia, apan wala gayod ako makakita og bisan unsang simbahan nga nagtudlo niini sa paagi nga ako kining nasabtan. Sa dihang ako adunay leksyon sa misyonaryo bahin sa plano sa kaluwasan, mibati gayod ako nga gihatagan og katarongan ug mibati ako og kalinaw nga wala gayod nako mabati kaniadto. Naghunahuna ako sa akong kaugalingon, ‘Kana mao ang Langitnong Amahan nga akong nailhan.’ Ang pagkat-on mahitungod sa mga ang-ang sa himaya mipalapad gayod sa akong kahibalo nga naglisod ko sa pagpugong sa akong kadasig sa pagkat-on og dugang.”
Si Delphine, usa ka kinabig gikan sa Paris, France, adunay malisod nga sitwasyon sa pamilya, mao nga sa dihang ang mga misyonaryo mitudlo kaniya nga ang mga pamilya mahimong magkauban nga magpuyo sa celestial nga gingharian, dili siya segurado kon gusto ba niya kana. Samtang ang mga misyonaryo mipadayon sa pagtudlo kaniya mahitungod sa tulo ka ang-ang sa himaya, hinoon, nahupay siya. Nakat-onan niya nga makauban niya kadtong iyang mga gihigugma kinsa mipili sa pagsunod sa ebanghelyo. Uban sa mas maayong pagsabot sa plano sa kaluwasan, miingon siya, “Nakita nako kini nga mas makiangayon, ug kana mipasalig pag-usab kanako.”