“Ako Mogiya Kaninyo”

Nakahinumdom ko sa usa ka higayon sa dihang ang Ginoo migiya sa pipila ka mga tawo. Nagserbisyo ko isip presidente sa misyon sa Brazil Porto Alegre South Mission. Usa sa among mga misyonaryo adunay usa ka medikal nga kahimtang gitawag og bungi [cleft palate], nga wala gayod matambali. Kon mosulti siya, ang hangin moagi sa ibabaw sa iyang ba-ba ug mohungaw sa iyang ilong. Lisod para sa uban nga makasabot kaniya.

Kining batan-ong elder misulti nako nga nag-ampo siya mahitungod sa iyang problema. Miingon siya nga ang Espiritu mihunghong nga ako makatabang kaniya nga makakita og tubag. Ang Iyang yano, determinadong hugot nga pagtuo nakadasig kanako. Midangop ko sa Dios alang sa tabang sa pagpangita og solusyon.

Usa ka yanong operasyon makorihian ang problema, apan ang pagpaopera dili usa ka yano nga proseso. Kon amo kining buhaton sa pribado nga paagi, mahal kini kaayo para sa pamilya niining misyonaryo. Sa laing bahin, ang paggamit sa pampublikong sistema sa kahimsog [public health system] magkinahanglan og pipila ka mga appointment ug labing siguro magamit ang nahabilin nga mga bulan sa iyang misyon.

Sa matag higayon nga ako adunay malisod nga buluhaton nga angay tumanon sa misyon, makasalig ko sa hugot nga pagtuo ug tabang sa akong asawa. Akong gipasabot ang problema sa misyonaryo ngadto kaniya ug mihangyo niya nga makig-istorya ngadto sa lokal nga pampublikong ospital. Adunay bay bisan unsang paagi nga ang pag-opera mahimo nga walay bayad ug masulod lang sa gitakda nga panahon?

Human sa pag-ampo alang sa tabang, ang akong asawa miadto sa ospital. Milinya siya sa taas nga linya sa mga tawo nga nagpaabot nga makaistorya sa usa ka tig-atender. Samtang nag-irog ang linya, ang akong asawa nakadungog sa tawo diha sa iyang atubangan kon sa unsang paagi giatiman ang iyang sitwasyon. Kasagaran, ang mga tawo gisultihan nga pabalikon alang sa pakig-appointment sa unom ka bulan, usahay mosobra pa.

Nasayod akong asawa nga dugay ra kaayo kini alang sa among misyonaryo. Naaghat siya sa pagbiya sa linya ug moagi sa laing pultahan. Didto nakakita siya og laing empleyado sa ospital. Ang akong asawa mipaila sa iyang kaugalingon ug mipasabot sa panginahanglan sa among misyonaryo.

Imahe

a woman talking to a surgeon

Ang empleyado mitudlo kaniya nga makig-istorya direkta sa surgeon, kinsa anaa sa ospital nianang adlawa nga nagpahigayon og operasyon didto sa laing andana. Mipasabot siya sa surgeon kon unsa ang buhaton sa misyonaryo ug kon sa unsang paagi kini nga misyonaryo mapanalanginan kon siya maoperahan aron mamaayo ang iyang bungi.

Ang surgeon adunay pipila ka mga pangutana. Dayon miingon siya, “Mahimo ba natong i-iskedyul ang operasyon sa duha ka semana?” Gikompleto sa doktor ang porma sa ospital nga mipasabot nga kini nga pag-opera usa ka kaayohan sa kumunidad ug nga siya personal nga nainteresado niini. Gihatag niya ang porma ngadto sa iyang kaabag ug mihangyo kaniya sa pag-iskedyul sa petsa.

Human sa napulo ka adlaw, ang surgeon miopera sa among misyonaryo. Sa wala madugay kini nga elder nabalik sa natad, malipayon ug klaro na ang iyang tingog. Uban sa nabag-o nga kadasig, siya miila nga ang Ginoo migiya kaniya.

Kining kasinatian sa misyonaryo usa ka pagpamatuod nga ang atong Amahan modungog sa atong mga pag-ampo ug mogiya kanato pinaagi sa pag-agak sa atong kamot.

Sa espiritwal nga pagkasulti, kita sama sa gagmay nga mga bata. Kita wala makasabot sa talagsaong mga panalangin nga giandam sa Langitnong Amahan alang kanato. Samtang kita molambo sa pisikal nga paagi, kita mosugod sa pagsabot og dugang mahitungod sa yutan-ong mga balaod nga modumala sa atong mga kinabuhi. Apan kinahanglang dili gayod nato itugot nga ang yutan-ong mga kahibalo mahimong mas importante kay sa pagsabot sa talagsaong mga panalangin nga giandam sa Amahan sa Langit alang kanato.

Si Moises, usa ka bantogan nga propeta sa Daang Tugon, adunay kasinatian nga nagpakita kaniya kon unsa gayod kagamay ang iyang kahibalo. Human iyang “nakita ang kalibutan diha diin siya gilalang; ug si Moises nakakita sa kalibutan ug ang mga kinatumyan niini, ug ang tanan nga mga katawhan kinsa mao, ug kinsa gilalang; ug sa mao siya sa hilabihan natingala ug nahibulong.” Dayon mipahawa ang Dios. Si Moises nagpabilin nga nag-inusara, ug siya natumba ngadto sa yuta.

“Ug nahinabo nga kini sulod sa daghan nga mga takna sa wala pa si Moises makadawat pag-usab sa iyang kinaiyanhon nga kusog sama sa tawo; ug siya miingon ngadto sa iyang kaugalingon: Karon, tungod niini nga katuyoan ako nasayud nga ang tawo walay bili, diin nga butang ako wala gayud makahunahuna” (Moises 1:8–10).

Kon ang Ginoo mipakita kanato sa tanang mga butang nga mahimo natong buhaton uban sa Iyang gahom, tingali mobati kita nga nabug-atan. Sama ni Moises, atong makita nga kon wala ang Dios, kita walay pulos.

Apan imbis mopabog-at kanato, ang Ginoo mogiya kanato sa matag lakang. Kini makapahimo kanato sa pagtuman og mas daghan kaysa atong mahimo sa atong kaugalingon.

“Kay ang akong hunahuna dili sama sa inyong hunahuna, ug ang akong mga laraw dili sama sa inyong mga laraw, nag-ingon ang Ginoo.

“Kay sama nga ang kalangitan habog kay sa yuta, ang akong mga laraw habog kay sa inyong mga laraw, ug ang akong hunahuna kay sa inyong hunahuna” (Isaias 55:8–9).

Sama sa gisulti sa Ginoo diha sa Doktrina ug mga Pakigsaad 78:18, kita “dili makaantus sa tanan nga mga butang karon.” Dili pa nato masabtan ang tanan nga Iyang nasabtan. Nan, unsa, ang kinahanglan natong buhaton? Ang Ginoo mitubag: “Paglipay kamo!”

Ang maglakaw sa dalan sa pakigsaad inubanan sa paglipay naglakip sa mapainubsanon, sama sa usa ka gamay nga bata. Kita kinahanglan gayod nga andam nga matudloan ug maagak pinaagi sa Amahan (tan-awa sa Doktrina ug mga Pakigsaad 112:10). Ang kinabuhi komplikado kaayo nga kita tingali dili makapugong sa tanang detalye sa atong panaw. Ug kita dili makasabot sa matag butang nga kita, o ang atong mga minahal, makasinati dinhi sa yuta.

Apan samtang kita mosalig sa Ginoo ug motugot Kaniya nga mogiya kanato pinaagi sa kamot, kita makahimo og mas daghan pa diha sa Iyang gingharian nga wala nato damha nga posible diay. Mas makapanalangin kita sa mga kinabuhi sa mga anak sa atong Langitnong Amahan. Kita mas makahimo sa pag-ila sa kamot sa Manluluwas diha sa atong mga kinabuhi. Mas mobati kita nga mapasalamaton alang sa Iyang walay kinutoban nga kalooy ug gugma.

Sa kataposan, ang Ginoo mogiya kanato pinaagi sa pagpahinumdom kanato nga “ang gingharian mainyo ug ang mga panalangin niana mainyo, ug ang mga katigayunan sa kahangturan mainyo” (Doktrina ug mga Pakigsaad 78:18).

Mobalik ko sa ehemplo sa akong misyonaryo. Siya nagiyahan sa pagpangayo og tabang ug napanalanginan sa usa ka pag-opera nga karon nakapahimo kaniya sa pagpakigsulti og klaro. Dayon nagiyahan siya ngadto niadtong kinsa andam na nga modawat sa ebanghelyo ug sa mga panalangin niini, lakip sa bunyag. Gitan-aw usab nako ang ehemplo sa akong asawa. Ang iyang pagpamatuod mas milig-on pa samtang ang Ginoo migiya kaniya. Unya Siya miabli sa tamboanan sa langit ug mibo-bo og panalangin.

Mapasalamaton ko nga akong gikatrabaho kining batan-ong misyonaryo, kinsa puno sa yano, gamhanang hugot nga pagtuo. Ug mapasalamaton ko nga ako mabuhi sa kahangturan uban sa akong asawa, kinsa nagpakita og ehemplo nga nakatugot sa Ginoo sa paggiya kaniya.

Tinuod gayod nga ang gingharian ug mga panalangin atoa.