Feagaiga, Sauniga, ma Faamanuiaga
Saunia e Elder Randy D. Funk
O Le Fitugafulu
Mai se saunoaga i le faigalotu, “Covenants—Accepting God’s Offered Blessings,” na tuuina atu i le Iunivesite o Polika Iaga–Idaho i le aso 22 o Setema, 2020.
Tatou te filifili e talia faamanuiaga ua ofoina mai e le Atua pe a tatou faaaogaina lo tatou faitalia e maua ai sauniga ma tausia feagaiga e o faatasi ai.
I le taimi o la’u semesa muamua o le aoga faaloia, na aoaoina ai la’u vasega o le au fai konekarate e se polofesa iloga o se sa agalelei tele ma agaalofa—pe a le i ai o ia i le potuaoga. I le vasega, o ia o se matai i le aoao atu e faaaoga ai le metotia o le Socratic—o se auala e aoao atu ai lea e aofia ai le fai atu o fesili patino i se auala ua faamoemoe e atiina ae ai mafaufauga loloto.
Mo le tele o piriota o le vasega sa atofaina ai i matou e faitau ni faaiuga po o ni mataupu faaletulafono se tolu. I le taimi o le vasega, sa valaauina ai se tagata aoga e aotele mea moni o le mataupu ona faamatala lea o mataupu faavae faaletulafono o le tulafono o le maliega lea na faatuina i mataupu. Ona avea lea o isi tagata aoga ma tagata autu mo fesili faigata ma femilosai a le polofesa e sosoo mai ai. Sa toetoe lava o taimi uma o se aafiaga faamaualalo.
O le taimi muamua na valaauina ai au, o mataupu na taulima ai se mataupu faavae o le tulafono o le maliega na lauiloa o le maliega pitotasi. O le taunuuga, e lei galo lava ia te au lena mataupu faavae.
Feutanaiga ma le Taliaina
Faatasi ai ma isi mea, o le faia o se feagaiga mausali i lalo o tulafono a tagata, e tatau ona i ai se ofo ma le taliaina. O le mea masani lava, o se maliega e faia pe a fai e se tasi o itu se ofo ae o le isi itu e taliaina le ofo.
Mo nisi maliega, e pei o se konekarate e faatau mai ai fanua, e manaomia e le tulafono le tusitusia o le ofo ma le taliaina. I isi tulaga, e manaomia ona faaleo e itu lo latou malilie i ai. Ae mo nisi o maliega, o le taliaina o se ofo e faia i le na o le faatinoga. Ua taua lenei mea o le maliega pitotasi.
Mo se faataitaiga, atonu e mafai ona ou fai atu ia te oe, “Afai e te aumaia ia te au se taseni fa’i, o le a ou totogia atu ia te oe le $100.” Ina ia talia la’u ofo agalelei , e te le tau sainia se maliega pe fai atu foi o le a e aumaia ia te au ni fa’i. E tatau ona e alu i le faleoloa po o le maketi, faatau mai se taseni fa’i, ma aumai ia te au. Po o le, i nisi o vaega o le lalolagi, atonu e mafai ona e tago lava oe e ilo ni fa’i. Po o le a lava le itu, afai e te aumaia ia te au se taseni fa’i, i lalo o le tulafono e tatau ona totogi atu ia te oe le $100. Aisea? Aua na e taliaina la’u ofo e ala i lau faatinoga.
E Tatau Ona Tatou Faatino
O feagaiga ma lo tatou Tama Faalelagi e galue i le ala lava e tasi. Ina ia maua faamanuiaga agalelei ua Ia ofoina mai, e tatau ona tatou galulue e talia i latou. E le o i ai se feutagaiga e sosoo ma le taliaina o se pepa ua sainia. Nai lo lena, e ala i a tatou faailoaga o le ioega ma e ala i le galue e tusa ai ma Lona finagalo, e aofia ai le mauaina o sauniga taua, tatou te faaali atu ai lo tatou mananao ma le naunautai e osia feagaiga ma Ia. A tatou tausia la a tatou feagaiga e ala i mea tatou te faia, ua tatou agavaa mo faamanuiaga e tele ua Ia folafolaina mai.
I le Mataupu Faavae ma Feagaiga tatou te aoao ai:
“E i ai se tulafono, na folafola lē maaveesea i le lagi i luma atu o le faavaega o le lalolagi lenei ua faavae ai i luga faamanuiaga uma—
“Ma a tatou maua se faamanuaiga mai le Atua, e maua i le usiusitai i lena tulafono ua faavae ai i luga” (Mataupu Faavae ma Feagaiga 130:20–21).
Na aoao mai Iesu, “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo’u Tama o i le lagi” (Mataio 7:21).
I se isi faaupuga, tatou te taliaina le faamanuiaga na tuuina mai e lo tatou Tama Faalelagi o le ola e faavavau i le malo o le lagi e le na o mea tatou te fai atu ai ae faapea foi i mea tatou te faia. Ma pe a tatou osifeagaiga ma Ia, ua Ia faamautinoa mai ia i tatou, “o A’u, o le Alii, e noatia au pe a outou faia mea ou te fai atu ai.” Sa ia faamanino mai foi e faapea, afai tatou te le faia Lona finagalo—afai tatou te le taliaina Lana ofo—ona leai lea o se tatou maliega: “Ae a outou lē faia mea Ou te fai atu ai, e leai se folafolaga mo outou” (Mataupu Faavae ma Feagaiga 82:10; ua faaopoopo le faamamafa).
Sauniga o le Faaolataga ma le Faaeaga
Tatou te ulu atu i na feagaiga e tatau ai mo le faaolataga ma le faaeaga e ala i le mauaina o sauniga paia. E pei ona taua i le Tusitaulima Aoao: “E osia e tagata o le Ekalesia ia feagaiga ma le Atua pe a latou mauaina sauniga o le faaolataga ma le faaeaga. … O i latou uma o e tumau e oo i le iuga i le tausia o a latou feagaiga o le a maua le ola e faavavau.”1
O sauniga o le faaolataga ma le faaeaga o le papatisoga, faamauga ma le meaalofa o le Agaga Paia, faauuga i le Perisitua Mekisateko mo alii, ma sauniga o le faaeega paia ma le faamauga o le malumalu.2 O nei sauniga taitasi e lima e faatinoina i le malumalu mo tuaa ua maliliu aua o nei sauniga e taua mo fanau uma a le Atua.
O le faamaumauga o le aoao atu o Alema i le Vai o Mamona o loo faapupula mai ai le faia o feagaiga, sauniga, ma faamanuiaga. Ia matau le ala e faatulaga ai e le Atua, e ala i Lana perofeta, ia tuutuuga, faamatala mai faamanuiaga folafolaina, ma folafola mai le ala e mafai ai ona tatou maua na faamanuiaga.
Ia i latou na faapotopoto i le Vai o Mamona o e sa faaalia se manao e o mai i le lafu a le Atua—o le naunau e avea ma se laasaga taua muamua (tagai Alema 32:27)—sa aoao atu e Alema le mea sa faamoemoeina mai ia i latou. A uma ona tatou papatiso, ua tatou folafola atu e “loto ina faanoanoa faatasi ma e faanoanoa; … ma faamafanafana i e ua tatau i ai le faamafanafanaga,” ma “laulaututu e fai ma molimau a le Atua i aso uma, ma mea uma, atoa ma nuu uma …seia oo lava i le oti ” (Mosaea 18:8, 9).
Ona faamatala atu lea e Alema o o latou faamanuiaga folafolaina: “E mafai ona togiolaina outou e le Atua, ma faitauina faatasi ma i latou o le uluai toetutu, ina ia outou maua le ola e faavavau” ma “o le Alii … e mafai ona liligi tele mai lona agaga i o outou luga” (Mosaea 18:9, 10).
O le a le mea na manaʻomia e tagata e fai e talia ai na faʻamanuiaga ofoofogia? I upu a Alema: “O outou … [e tatau ona] papatisoina i le suafa o le Alii, o se molimau i ona luma ua outou ulu atu ai i se feagaiga faatasi ma ia, o le a outou auauna atu ia te ia ma tausi i Ana poloaiga” (Mosaea 18:10; ua faaopoopo le faamamafa). Ia matau o le sauniga o le papatisoga, o se faatinoga paia o le toatele o i tatou e manatuaina lelei, e avea o se molimau po o se faamaoniga ua tatou ulu atu i se feagaiga ma le Atua.
Sa matuai naunau lava tagata e fai lenei mea, “sa pati o latou lima i le olioli, ma alalaga mai: o le manao lea o o matou loto” (Mosaea 18:11). Sa latou mananao ma le saoloto e ulu atu i se feagaiga a o latou ui ifo i le vai o le papatisoga.
E faapena foi, a o tatou mauaina isi sauniga taitasi o le faaolataga ma le faaeaga, tatou te maua ai folafolaga faaopoopo o faamanuiaga silisili. O feagaiga tatou te osia e paia ma noatia ai i tatou ma le Atua. Tatou te filifili e talia Ana faamanuiaga na ofoina mai pe a tatou faaaogaina lo tatou faitalia e maua ai sauniga ma tausia feagaiga e o faatasi ai.
O Le Faamanatuga
O le sauniga o le faamanatuga e valaaulia ai i tatou e manatua le Faaola ma a tatou feagaiga. Ina ua faatuina e Iesu Keriso le faamanatuga i totonu o sa Nifae, sa ia tuuina atu le mana o le perisitua i ona soo ma faatonuina i latou e “tofitofi le areto ma faamanuia ma avatu i tagata o lau Ekalesia, mo i latou uma o e e talitonu ma papatiso i lou igoa” (3 Nifae 18:5).
E tele taimi tatou te mafaufau ai i le aai ma feinu i le faamanatuga e faafou ai a tatou feagaiga o le papatisoga. E ui e sao lena mea, ia matau le gagana o loo faaaogaina e le Faaola. Ina ua Ia faatonuina Ona soo e aai ma feinu i le areto, sa Ia fetalai, “O le mea lenei ia outou faia e faamanatu ai lou tino, lea ua ou faaali atu ia te outou. Ma o le a avea lea o se molimau i le Tama ua outou manatua pea au” (3 Nifae 18:7; ua faaopoopo le faamamafa).
Ina ua latou feinu i le uaina, sa Ia fetalai atu, “O le faataunuuina lea o au poloaiga, ma o lenei mea ua molimau atu ai i le Tama ua outou loto e fai le mea ua ou poloaiina ai outou” (3 Nifae 18:10; ua faaopoopo le faamamafa).
I se isi faaupuga, a tatou aai ma feinu i le faamanatuga i vaiaso taitasi, tatou te tautino atu ma toe molimau atu o le a tatou manatua pea Iesu Keriso ma ua tatou naunau e tausi Ana poloaiga. Afai tatou te manatua pea o Ia ma tausi Ana poloaiga, o le a faatasi Lona agaga ma i tatou (tagai i le 3 Nifae 18:7, 11).
Faamanuiaga Tatou te Maua
O le mafaufau i faamanuiaga e oo mai ia i tatou a o tatou aai ma feinu i le faamanatuga, na saunoa ai Peresitene Dallin H. Oaks, Fesoasoani Muamua i le Au Peresitene Sili: “Ona ua tofitofi ma vaevae, ua tulagaese ai vaega taitasi o le areto, e pei lava o tagata taitoatasi o e aai i ai e tulaga ese. E ia tei tatou uma ni agasala eseese e salamo ai. E ia tei tatou uma ni manaoga eseese ina ia faamalolosia e ala i le Togiola a le Alii o Iesu Keriso, o lē tatou te manatuaina i lenei sauniga.”3
Ua ou iloa le aoga o le mafaufau loloto i fuaiupu 10, 12, ma le 14 o le 3 Nifae 18. I fuaiupu taitasi nei o loo fetalai mai ai le Faaola ia i latou o e aai ma feinu i le faamanatuga, “Amuia outou,” ae le o faailoa mai e Ia po o le a le faamanuiaga o le a i ai. Atonu ona o tagata taitoatasi e auai i lenei sauniga paia e pei lava le eseese o foliga o fasi falaoa taitasi, tatou te manaomia uma lava ni faamanuiaga eseese. E ui ina eseese o tatou luitau, tulaga, ma manaoga, ae ua folafola mai e le Faaola ia i tatou taitoatasi o e tausia le feagaiga o le faamanatuga, “Amuia outou.”
Alofa ma le Alofa Mutimutivale
O lenei ou te faamamafaina se eseesega taua i le va o tulafono a le Atua ma tulafono a tagata: o le matafaioi o le alofa ma le alofa mutimutivale i le fuafuaga o le faaolataga a le Atua mo Lana fanau. E pei ona taua, i le tele o tulaga tatou te valaaulia ai Ana faamanuiaga ua ofoina mai e ala i a tatou faatinoga. I le avea ai ma ni matua alolofa, e silasila mai ma le alofa mutimutivale le Tama Faalelagi i manaoga o o tatou loto faapea foi ma a tatou galuega (tagai i le Mataupu Faavae ma Feagaiga 137:9). Sa Ia iloaina o nisi taimi o le avanoa e faatino ai atonu e tapulaa i tulaga e le oo i ai lo tatou malosi. O se vave oti, o se le atoatoa ogaoga o le mafaufau, o le leai o se malamalama po o se avanoa, po o soo se isi lava le fea e tupu i se lalolagi pā’u, atonu e foliga mai e poloka ai lo tatou alualu i luma ma le mauaina o faamanuiaga folafolaina tatou te mananao ai.
Keriso i Ketesemane, saunia e Dan Burr
O le mea lea, o le totonugalemu o le fuafuaga sili o le fiafia o se Faaola, o Iesu Keriso, o le Na te faaatoa le aofaiga, e faatoilaloina le faaituau, ma faataga tagata uma—i latou uma o e mananao moni ma faia mea uma latou te mafaia—e iu ina taliaina ma maua ai faamanuiaga folafolaina a se Tama Faalelagi alofa.
E finagalo le Tama Faalelagi ia tatou toe foi atu i Lona afioaga, ae e finagalo o Ia ia tatou toe foi atu ona tatou te mananao e fai lena mea. Na aoao mai Elder Dale G. Renlund o le Korama a Aposetolo e Toasefululua, “O le sini a lo tatou Tama Faalelagi i tulaga faamatua, e le o le tatau lea i Lana fanau ona fai le mea sao; o le tuu atu i Lana fanau e filifili e fai le mea sao ma mulimuli ane avea e faapei o Ia. Afai e na’o Lona finagalo lava ia tatou usiusitai atu, o le a Ia faaaogaina taui ma faasalaga vave e uunaia ai a tatou amioga.”4
E manaomia e le Tama Faalelagi se loto naunautai faapea foi ma se taumafaiga i la tatou vaega. O le tele o taui mo le filifilia o le mea sao e oo mai i le lumanai, ma e sili atu nai lo mea e tatau ona tatou maua—o le mafuaaga lea ua taua ai nisi o taui o se meaalofa (tagai i le 1 Nifae 10:17; Mataupu Faavae ma Feagaiga 14:7). E pei o le matua agalelei ma alofa mutimutivale o le Tama Faalelagi, Na te tuuina mai ia i tatou le tele o mea—e sili atu i lo se isi lava mea tatou te faatauaina. O le mea lea, e le o le maua o le faaeaga, ae e tatau ona filifilia, taliaina, ma ia talia ma le agaga faafetai.
I vaitau uma ma tulaga uma, tau ina ia taitasi i tatou ma faatino le faatuatua, usiusitai, maelega, ma le lotofaafetai e saunia ai e maua “mea uma ua i ai i [lo tatou] Tama” (Mataupu Faavae ma Feagaiga 84:38; tagai foi Alema 34:32).
O se Nuu Amiotonu, Osifeagaiga
Ua tatou ola i se taimi matagofie o le a maua ai faamanuiaga o le talalelei mo i latou o e taliaina i latou. Na aoao mai Peresitene Russell M. Nelson:
“Ua tatou vaai tino lava ma molimau moni i mea sa na o le faaaliga na vaai i ai le perofeta o Nifae e faapea o le a-afio ifo ‘le mana o le Tamai Mamoe a le Atua’ i luga o tagata o le feagaiga a le Alii o e sa faataapeapeina i luga o le lalolagi; ma sa faaauupegaina i latou i le amiotonu ma le mana o le Atua i le mamalu tele’ [1 Nifae 14:14].
“O outou, o’u uso e ma tuafafine, ua i ai faatasi ma na alii, tamaitai, ma fanau ia na vaai i ai Nifae. Mafaufau i lena mea!”5
E alofa le Tama Faalelagi ia i tatou ma e naunau ma le faamaoni e faamanuia mai i tatou. E ala i le Togiola e le iu a lona Alo, o Iesu Keriso, e mafai ai ona faaatoatoaina tagata uma. A tatou faalagolago i le Atua ma galulue i le faatuatua e osia ma tausia feagaiga paia ma Ia, o le a matua tele lava lo tatou olioli i le taimi nei ma le faavavau atoa.