Matou Te Le o Toe Fefefe

I se tasi taeao, sa sau ai le ma atalii e fitu tausaga o Jesse, i lo ma potumoe ma se Tusi Paia o ata a tamaiti.

“Tina, vaai i le ata lenei o Iesu,” na ia fai mai ai. “O le a papatisoina o ia. “Aisea e le papatisoina ai au?”

Sa faitau ma fiafia tamaiti uma i lena Tusi Paia, ma sa amata ona latou faia uma ni fesili talitutusa: “Aisea e leai ai se tatou lotu? O afea tatou te papatiso ai?”

Pe tusa o lea lava taimi sa amata ai ona matou faia karamelo mai le susu o le oti ma faatau atu i maketi a faifaatoaga i le lotoifale. Sa fiafia iai tagata, ma sa faamanuiaina la matou pisinisi karamelo. E oo atu i lena tautoulu, ua matou faatauina atu a matou karamilo pe tusa ma le 30 faleoloa. E oo atu ia Iuni 2015, ua matou o i se maketi tele faavaomalo i Atelani ma faaopoopo i ai pe tusa ma le selau faleoloa. E lei umi, ae matou i ai i luga o le televise ma ni nai mekasini.

Sa matou faia ni karamelo i le taimi atoa e tau atu i lena tautoulu. O le taimi lena na suia ai mea i o matou olaga.

Sa ou maua le mea sa ou manatu sa ou manao ai i taimi uma i le olaga—o se pisinisi faa-faatoaga e galulue faatasi ma lou aiga ma aoao lau fanau e uiga i le olaga e ala i se faatoaga. Sa i ai i tagata lenei ata matagofie o lo matou aiga o galulue faatasi, ae sa matou iai i se tauiviga tele.

Sa ma le amanaiaina tamaiti ina ia mafai ona tino mai le pisinisi. Sa le‘i gauai atu i le ma faaipoipoga. Sa ma taumafai e fai ni mea se tele. Sa lei sa‘o la ma faamuamua. Na leai so matou faavae faaleagaga. Na le ia i matou le Tama Faalelagi e taialaina o matou olaga. Sa na o lo ma taumafai lava e faia mea uma na o i ma‘ua.

O lena tautoulu na mama’i uma ai tamaiti i le tiga o faaī. Sa ma tuuina atu ia i latou ni fualaau tui, ma e lei umi ae manuia uma i latou vagana ai Iese. Sa le mafai ona alu ese lona tale, ma sa fula lona ua. Sa ave e Pat o ia i le fomai ma sa ma manatu o le a aumai ni fualaau tui mo le taimi lona lua.

I le mavae o le lua itula ae valaau mai Pat mai le falemai. Na auina atu e le fomai Jesse iina mo se faata e siaki ai se siama i ona mama. Nai lo lena, na maua e fomai se fula e 11-inisi i lona fatafata.

“Alu i le fale, tapena lou aiga, o atu i Birmingham, ma saunia mo se nonofo umi ai,” o le tala lea a le fomai.

I ni nai aso talu ona matou taunuu i le falemai o tamaiti i Birmingham, sa matou iloa ai le ma’i o Jesse. Sa maua o ia i le lukimia (acute lymphoblastic lymphoblastic), o se ituaiga o lukimia malosi.

Mo le isi tolu vaiaso na sosoo ai, sa ma nonofo ai ma Pat i le falemai. A o ou vaavaai ma le totoa ia Iese, sa femalagai Pat i le taavale i le 90 minute le alu atu ma le toe sau mai lo matou fale i le falemai. Sa ia taumafai e vaai la matou pisinisi ma tausi a matou ‘oti. Sa sau lo‘u tina faaletulafono mai Kalefonia ma nonofo ai ma isi a ma fanau.

O le tuma o Iese na amata ona vaiti ai lona ala ea, ae na faaitiitia i le mavae ai o le ono vaiaso o togafitiga o le kimo. Sa matou manatu o le taimi lava na manuia ai le kanesa, o le a avea o se auala faigofie i luma atu, ae na maua se ‘alu toto i le faiai o Iese. Ina ua uma ona taulimaina e fomai lena mea, na maua o ia i siama o le nimonia. E faafitu ona avatu ma aumai i le falemai i nai masina na sosoo ai.

Ia Tesema 2015, a o toe iai Iese i le falemai, sa amata ona ou faitauina le Tusi a Mamona. Sa ou mafaufau, “Sa ou tuua le Ekalesia, ma ou te manao e tuuese e pei ona ou tuuesea isi lotu uma.” Ae i le taimi lava lena, sa taia ai au e pei o se faaputuga o piliki—o le filemu atoatoa. Sa talanoa mai le Tusi ia te au. Ou te lei tau tatalo ina ia iloa ai le moni. Sa ou iloaina i lo‘u loto e moni mai lava i le amataga. Ou te faitau mo ni itula ao nofo ai i lena potu o le falemai.

I se tasi taimi, na maualuga ai le fiva o Iese, lea sa iai mo le 10 aso. E le pa’ū lava, ma sa tonu i fomai e tatau ona latou faia se suesuega i le su ponaivi e iloa ai pe ua toe foi mai le lukimia. Ou te manatua lo‘u taoto i luga o le fola o le falemai. Sa ou lagona le vaivai tele. O le taimi lena na ou filifili ai e valaau ia Elaine Oborn, o se tagata o le matou uarota a o ou tuputupu ae i Alapama.

Sa avea au ma se uo mamae ma le tama teine a Sister Oborn. E ui ou te lei talanoa i le aiga o Oborn mo le 20 tausaga, ae sa le mafai ona ou aveesea foliga o Elaine mai lo‘u mafaufau. Sa ou sailia o ia i luga o le Facebook, ma o iina i le fola o le falemai, sa ou valaau atu ai ia te ia.

“O e manatuaina foi au?” Sa ou fesili atu ai.

Ina ua uma ona faamalamalama atu le mea ua oo i ai lo matou aiga, sa ou tau atu ia Sister Oborn: “Ou te le iloa tonu le mea ou te manaomia, ae o loo iai se mea o loo ou moomia. Ou te le o toaga i le Lotu. E leai foi se matou lotu, ae ou te mafaufau pea ia te oe. Faamolemole, e mafai ona e fesoasoani mai ia te au?”

“E mafai ona tatou amata i le tuuina atu o se faamanuiaga mo oe ma Iese,” o lana tala lea. Sa ia fai mai o lona toalua, o Lynn, o le a sau i le falemai i lena afiafi.

Ina ua uma le valaau i le telefoni, sa ou fai atu ia Pat, “Ou te iloa e le o oe o se tagata o le Ekalesia, ae pe mafai ona o mai ni alii e tuuina atu se faamanuiaga ia Iese?”

“Po o le a lava le mea e manaomia mo ia e maua ai se lagona lelei,” o lana tala lea.

I lena afiafi, na o mai ai Brother Oborn ma faifeautalai faamisiona e toalua, sa laei uma i laei papae o puipuiga faafomai ona sa ma‘i tigaina Iese.

“Ua o mai agelu mo i tatou,” ou te manatua ou mafaufauga a o ou tatalaina le faitotoa.

Sa latou tuuina atu ia Iese se faamanuiaga. Ona faalaina lea e Brother Oborn tamaiti uma ma tuu atu ia i latou taitoatasi se faamanuiaga. Ona ia tuuina mai lea ia te au se faamanuiaga. Ona ia tuuina atu lea ia Pat se faamanuiaga. O se tasi lena o aafiaga muamua na matou lagonaina uma ai le Agaga. Na mamana lava. O le aso na sosoo ai, na pa’ū ai le fiva o Iese. O le taimi lava na te’a mai ai o ia mai le falemai, sa amata loa ona matou auai i le lotu.

Ia Fepuari 2016, na amata ai ona asiasi mai faifeautalai faamisiona ia i matou. I le taimi muamua sa manatu Pat ua latou o mai e fesoasoani i le faatoaga. Ina ua matou taliaina se valaaulia mo i latou e aoao i matou, sa ia manatu o lesona sa mo na o tamaiti lava.

A o sauniuni faifeautalai e aoao i matou i la latou lesona muamua, sa alu atu Pat e galue i le palau. Ina ua mavae le 20 minute, sa mafai ona ou iloa atu o i laua—o ni uso se toalua ma ni alii faifeautalai se toalua—sa le fiafia. I lena taimi, sa ou lagonaina e tatau ona alu ia Pat ma fai atu ia te ia e sau e faalogologo mo ni nai minute.

Mulimuli ane sa tau mai e faifeautalai ia te au sa la tatalo o le mea lena o le a ou faia. Sa latou iloa na manaomia e Pat ona faalogo i mea sa latou aoaoina atu.

Ina ua uma ona aoaoina i matou e faifeautalai mo ni nai vaiaso, sa mananao Iese, Bo, ma Frank e papatiso. Sa manatu Pat o se mea lelei tele lena, ae sa ia lagonaina o ia na “sili atu nai lo le faaolataga.” O le taimi lena a o lei feiloai atu ia Von ma Glenda Memory ma faalogo ia Elder Dieter F. Uchtdorf o le Korama a Aposetolo e Toasefululua o saunoa i le taimi o le konafesi aoao.

Ina ua matou vaai ia Uso Memory i le lotu, sa ou iloaina o ia a o ou laitiiti. Ua auauna atu nei o ia o se taitai misiona a le uarota. Sa faailoa atu e Pat o ia lava, ma ta‘u atu ia Uso Memory sa ia manao moni lava i le Ekalesia mo le ma fanau.

“Manaia tele lena,” o le tala lea a Brother Memory ma se susulu i ona mata. “O le a matou faia mo tamaiti.”

I ni nai vaiaso mulimuli ane, i le maea ai o se lesona mai faifeautalai i le ata o le faaolataga, sa faapea mai Uso Memory, “Tama, o le a tatou talanoa e uiga i o outou papatisoga.” Ona ia faaopoopo mai lea, “Ona tatou talanoa lea e uiga i le papatisoga o le tou tama .”

Sa fai mai Pat ua lelei, ae o ona masalosaloga e uiga i lona saunia ma le agavaa na faaauau pea seia oo i le konafesi aoao ia Aperila.

“Atonu e te fefe, ita, faavauvau, pe o faapologaina e masalosaloga,” na saunoa ai Elder Uchtdorf i lana lauga. Ae e pei lava ona maua e le Leoleo Mamoe Lelei o Lana mamoe na leiloa, afai o le a e liliu atu lou loto i le Faaola o le lalolagi, o le a Ia maua foi oe.”¹

Fai mai Pat: “A o lei oo i lena taimi, ou te lei manatu e mafai moni lava ona avea au ma se vaega o lenei mea, ou te agavaa mo le faaolataga. Ae ina ua uma ona faalogo atu ia Elder Uchtdorf, na ou iloa ai e le o tuai tele mo au. E i ai moni lava so’u avanoa e oo atu ai i le lagi. Ou te lei lagonaina lava se mea faapena. Mai lena taimi sa ou iloa ai. O le Ekalesia lenei a le Faaola. Ua matou mauaina. Sa ou papatiso ma maua le perisitua. I se vaiaso mulimuli ane, sa ou papatisoina ai la‘u fanau tama. Ina ua lava le matutua o le ma fanau teine, sa ou papatisoina i latou.”

O se tausaga mulimuli ane, na faamauina ai i matou i le Malumalu o Birmingham Alapama.

O le ola ai i le talalelei a Iesu Keriso o ni tagata o Lana Ekalesia ua faamalosia ai la ma faaipoipoga. Ua avea ai a‘u ma se tina sili atu. Ua tuuina mai ai i la ma fanau se faavae semanu latou te le mauaina lava. Ua ma talitonu i o latou lumanai, o lea ua i ai le Ekalesia i o latou olaga.

Ou te matua faafetai lava mo mea uma na tutupu ma mo lesona uma ua ou aoaoina. Ou te manatu sa taua mo au le oo atu i le tele o mea, le tele o le tiga o le mafaufau. Sa manaomia ona ou lotomaualalo, lagona le faatauanau atu mo le fesoasoani ma le alofa ma le faamagaloga a le Atua, ma faamagalo au lava i mea sese i le amataga o lo‘u olaga.

Sa faamaeaina togafitiga o le kimo a Iese ma lana taamilosaga mulimuli o vailaau ia Mati 2019. O le a matou faanoanoa pe a toe foi mai lona kanesa, ae o lenei ua i ai sa matou vaaiga e faavavau. O lea ua faamauina i matou o se aiga. E le mafai ona ou vaai faalemafaufau i le leai o se Ekalesia ou te sulu iai mo mea uma. Ua suia e le talalelei i matou e faavavau.

Po o le a lava le mea e tupu, O le a lelei mea uma. Matou te le o toe fefefe. Na avea le ma’i o Iese na taitaiina ai i matou i le mea sili ona lelei na tupu ia i matou. Na aumaia ai i matou i le Ekalesia a le Faaola.