“Konafesi Aoao: O Se Sauniga a le Ekalesia i le Lalolagi Atoa,” Liahona, Setema 2021
Aoaoga Autu o le Talalelei
Konafesi Aoao: O Se Sauniga a le Ekalesia i le Lalolagi Atoa
Tatou te faalogo i perofeta ma isi taitai o le Ekalesia i le taimi o le konafesi aoao. Latou te aoao mai ia i tatou mea e finagalo le Atua tatou te faalogo i ai.
O Aperila ma Oketopa taitasi, e faia ai e le Ekalesia se faasologa o sauniga e ta’ua o le konafesi aoao. E aoao atu ma molimau atu taitai e uiga ia Iesu Keriso ma Lana talalelei. E faia le konafesi aoao i le aai o Sate Leki, Iuta, ISA, ma o loo faasalalauina i le lalolagi atoa i le silia ma le 80 gagana. E valaauliaina ai tagata uma o le Ekalesia ma soo se tagata lava e fia faafofogai lauga.
O Uluai Konafesi a le Ekalesia
Sa faatulagaina aloaia le Ekalesia i se sauniga i le aso 6 o Aperila, 1830 (tagai i le Mataupu Faavae ma Feagaiga 20). O le uluai konafesi aoao na faia i le aso 9 o Iuni, 1830. Talu mai lena taimi, o konafesi aoao na faia i lalo o le taitaiga a le Peresitene o le Ekalesia i soo se mea lava e mafai ona faapotopoto i ai tagata o le ekalesia. I le vaitau o le 1840, na amata ai e taitai ona faia le konafesi e faalua i le tausaga.
Auala e Faatulaga ai Konafesi i Aso Nei
O le Au Peresitene Sili, o le Korama a Aposetolo e Toasefululua, ma isi taitai o le Ekalesia e saunoa i le taimi o le konafesi aoao. O le Aufaipese a le Tapeneko i le Lotoa o le Malumalu ma isi aufaipese a le Ekalesia e saunia musika. O konafesi taitasi e lima sauniga: tolu i le Aso Toonai ma le lua i le Aso Sa.
O Aoaoga a Taitai
I masina a o lumanai le konafesi, e tatalo taitai o le Ekalesia e uiga i mea e aoao atu. Ua musuia i latou e le Alii ia iloa le mea e tatau ona latou fai atu ai. Latou te aoao atu upumoni o le talalelei ma valaaulia i tatou e tausi poloaiga a le Atua. Latou te molimau atu foi e uiga ia Iesu Keriso ma uunaia i tatou e mulimuli ia te Ia.
Aoao mai le Konafesi
A o lei oo i le konafesi aoao, e mafai ona tatou tatalo e faalogo i mea e finagalo le Alii tatou te aoaoina. A o tatou faalogologo i lauga, o le a aoao mai e le Agaga ia i tatou mea e tatau ona tatou iloa. A maea le konafesi, e maua lauga i le ChurchofJesusChrist.org, i le polokalama feaveai o le Gospel Library, ma i le Liahona. E mafai ona tatou suesue ma le agaga tatalo ia lauga ina ia aoao atili ai e uiga ia Iesu Keriso ma Lana talalelei.
Mai i Tusitusiga Paia
Na aoao mai Iesu Keriso e tatau ona tatou potopoto soo faatasi (tagai i le 3 Nifae 18:22).
A tapuai faatasi tagata o le Ekalesia, o le a faatasi le Alii ma i latou (tagai i le Mataio 18:20).
Sa poloaiina e le Alii ia tagata o le Ekalesia e “aoao atu ma faagaeetia e le tasi le isi” (Mataupu Faavae ma Feagaiga 43:8).
A o faaalia e tagata o le Ekalesia le faatuatua ia Keriso, o le a faatasi Lona Agaga ma i latou a o latou feiloai (tagai i le Mataupu Faavae ma Feagaiga 44:2).