Mataupu Faavae o le Auaunaga

Fesoasoani i Isi ia Saunia mo Manaoga e Lei Faamoemoeina

I le avea ai ma uso ma tuafafine o auaunaga, e mafai ona tatou fesoasoani i o tatou uso ma tuafafine ia saunia mo se lalolagi le mautonu.

Ata

a mother and her toddler son planting an indoor garden

Atapue mai le Getty Images

O faamaʻi, mala faalenatura, faaletonu o le tamaoaiga, vevesi faapolokiki, ma feteʻenaʻiga matuia—ua vaaia e le lalolagi le tele o ia mea i le tausaga ua tuanaʻi. E faaopoopo atu i nei mea e tutupu i vaega tetele, tatou te feagai foi ma luitau e lei faamoemoeina i o tatou olaga patino, e pei o le gasegase, tatalaina o faaipoipoga, le toe i ai o se tupe maua, ma isi mea faapena.

O a tatou taumafaiga e saunia mo le mea e lei faamoemoeina e mafai ona maua ai le saogalemu ma le puipuiga mo i tatou lava ma isi. O le a se mea e mafai ona tatou faia o ni uso ma ni tuafafine o auaunaga e fesoasoani ai ia i latou tatou te alolofa i ai ia onosaia ma faatoilalo luitau e lei faamoemoeina i o latou olaga?

Ua tuuina mai e Carlomagno Aguilar mai Angeles, Filipaina, na o le tasi lava le faataitaiga. Ina ua ia iloa o le a tapuiina le latou eria ona o le faamai oti o le KOVITI-19, sa ia faanatinati atu e faatau ni sapalai—e ui ina sa ese lana lisi mai ia i latou na siomia o ia. Sa i ai sana fuafuaga e saunia, faatau fatu ma faalelei eleele mo lana togalaau i le fale.

Na amata e Carlomagno Aguilar se alaata i le initoneti e aoao atu ai e uiga i le faia o ni faatoaga i le taulaga.

I na ia sili atu ona faalagolago ia te ia lava, sa avea Carlomagno o se faifaatoaga i le taulaga mo le tele o tausaga. E auauna atu foi o ia i ona tuaoi, e ala i le tuuina atu ia i latou o fua o lana faatoaga ma le aoaoina o i latou e toto a latou lava meaai. Na ia fatuina foi se auala i luga o le initoneti lea e maua ai ona motugaafa ma aoaoga e tagata uma, e fesoasoani ai i ona uso ma tuafafine ia sili atu le ola tutoatasi ma saunia mo le lumanai.

Na aoao mai Epikopo W. Christopher Waddell, Fesoasoani Muamua i le Au Epikopo Pulefaamalumalu: “A tatou taliaina mataupu faavae faaleagaga ma sailia musumusuga mai le Alii, pe o le a le ala sili e faaaoga ai mataupu faavae o le saunia faaletino i o tatou tulaga taitoatasi ma faaleaiga, o le a taialaina i tatou ia iloa le mea o faamoemoeina e le Alii ma le ala e fai ai. O le laasaga aupito sili ona taua o mea uma o le amata” (“Sa I Ai le Areto,” Liahona, Nov. 2020, 44–45).

O le fesoasoani o le tasi i le isi ia saunia i se lalolagi le mautinoa o se auala masani lea e faaali ai le alofa faʻaKeriso. Sei o tatou fesoasoani le tasi i le isi ia faia lena “laasaga sili ona taua” e amata ai.

Fautuaga mo le Fesoasoani Atu i Isi

E pei lava ona masani ai, o le auauna atu e amata i le iloiloina ma le agaga tatalo ma fefautuaai faatasi. O fautuaga nei e mafai ona fesoasoani ia te oe e mafaufau ai pe faapefea e oe po o i latou e te auauna atu i ai, ona amata sauniuni e fetaiai ma luitau e lei mafaufauina.

Mafaufau i le tulaga atoatoa. E mafai ona tatou saunia i ni auala eseese mo vaega eseese o o tatou olaga. E taua le teuina ma le gaosia o meaai e pei ona e mafaia ai, saunia i tulaga tautupe, atiina ae ni malosiaga faalelagona, ma faia ni fuafuaga mo tulaga e tutupu faafuasei.
Talanoa i luitau e ono tulai mai i le mea o loo e nofo ai ma pe faapefea ona talanoa i ai. O vaega eseese i le lalolagi atoa o loo i ai ni luitau tulaga ese. Afai e te nofo i se mea e oso soo ai mafuie, ia talanoa pe faapefea ona e saunia lou fale e fesoasoani tou te saogalemu ai, e pei o le faamau o meafale mamafa i le puipui o le fale. Pe afai foi e te nofo i se mea e masani ona oso soo ai afā, talanoa pe faapefea ona e tali atu i lena tulaga, e pei o le kiina o se leitio mo talafou po o le o ese mai nofoaga lamatia agai atu i nofoaga maualuluga.
Talanoa pe faapefea ona fatufatuai se teugatupe mo tulaga e tutupu faafuasei. O le sefeina o tupe e mafai ona fesoasoani ia te oe pe a le toe i ai sau galuega po o le i ai foi o ni tupe faaalu faaopoopo e lei mafaufauina. Talanoa e uiga i le auala e sefe ai tupe, e pei o le amata ma teu sina mea itiiti i taimi taitasi e maua ai lau totogi, seia oo ina e ausia lau sini.
Ao mai ni sapalai mo se ato mo faalavelave faafuasei. O le i ai o se ato mo faalavelave faafuasei e mafai ona fesoasoani e te saunia ai pe afai e tatau ona e tuua lou fale mo se taimi puupuu. Galulue faatasi e mafaufau i ai ma ao mai mea e manaomia. E mafai ona faia lenei mea i se vaitaimi umi. Mafaufau i le malutaga, moli, tupe, meaai ma vai, sapalai faafomai, fesootaiga, faamatalaga taua, lavalava e sui ai, mea faafiafia ma aitema e maua ai le toamalie (taaloga, tusi, meataalo mo tamaiti), ma soo se mea lava e manaomia.
Ia fausia se faauoga ma le tagata o loo e auauna atu i ai. E taua le i ai o ni tomai malolosi e taulima ai lagona e oo mai ma faigata. O se tasi o nei tomai o le i ai o ni sootaga maloloina. A o e faamalosia lau faauoga ma le tagata, o le a e fesoasoani ia i latou e fatu se faiga o le felagolagoma’i.
Talanoa e uiga i le teuina o meaai. E mafai ona fesoasoani le i ai o ni meaai faaopoopo mo tulaga e tutupu faafuasei. Ia faamalosiau atu i le tasi ma le isi e amata faaputu se sapalai mo se taimi puupuu e te faaaogaaga ma toe faatumu i au kuka fai soo. Ona amata lea ona galue e faaputu meaai e mafai ona lelei mo se taimi umi. Afai e le tele se avanoa mo le teuina o meaai pe afai foi ua faasaina oe e le tulafono mai le teuina o ni meaai se tele, ia teu lava nao le tele e talafeagai mo ou tulaga.