Ol Haelaet blong Namba 191 Medel Yia Jeneral Konfrens

Samting i jenis insaed long yumi taem yumi praktisim ol trutok blong gospel we yumi lanem. Presiden Russell M. Nelson i serem mesej ia, we i simpol be i gat mining, blong openem mo klosem jeneral konfrens.

“Doktrin blong Kraes we i stret gud, i gat paoa,” hem i talem long fas toktok blong hem blong openem jeneral konfrens. “Hem i jenisim laef blong evriwan we i andastanem doktrin ia mo i lukaotem blong praktisim insaed long laef blong hem.” Long nekis dei, long toktok blong hem blong klosem konfrens, hem i talem: “Oli bin tijim gud yumi. … Naoia, kwestin hem i, ?Hao bae yumi kam defren man from ol samting we yumi bin harem mo filim?”

Long medel blong plante impoten lesen we oli bin tijim long jeneral konfrens ia:

Yumi bin lanem se hem i taem nao blong mekem ol bigfala jenis blong mekem fandesen blong yumi long saed blong spirit i kam strong moa (luk long Presiden Nelson long pej 93).
Yumi bin lanem abaot hamas i impoten blong stap olsem wan disaepol, mo tu, olsem wanem wok ia i simpol (luk long Presiden M. Russell Ballard long pej 51, Elda Dieter F. Uchtdorf long pej 77, mo Elda Gary E. Stevenson long pej 47).
Yumi bin lanem from wanem yumi nidim Jos, mo we yumi save mekem plante blong blesem ol narawan taem we yumi wok tugeta (luk long Presiden Dallin H. Oaks long pej 24, Bisop L. Todd Budge long pej 100, Bonnie H. Cordon long pej 10, mo Sharon Eubank long pej 53).
Yumi bin lanem se, taem yumi lavem God, hem i save helpem yumi blong winim fasin blong serseraot we i stap stopem yumi blong kam wan (luk long Jeffrey R. Holland long pej 8, Elda D. Todd Christofferson long pej 16, mo Elda Dale G. Renlund long pej 83).
Yumi bin lanem se yumi save invaetem revelesen i kam insaed long laef blong yumi taem yumi putum tingting blong yumi i folem tingting blong Lod, mo blong gat mo askem ol kwestin we yumi no gat wan ansa long olgeta, i oraet (luk long Presiden Henry B. Eyring long pej 74, Camille N. Johnson long pej 80, mo Susan H. Porter long pej 33).

?Wanem nao yu bin harem? ?Wanem nao yu bin filim? ?Olsem wanem nao bae yu yusum mo praktisim, insaed long laef blong yu, trutok we i stret gud, doktrin we i stret gud, mo revelesen we i stret gud we bae yu faenem taem yu stap gohed blong stadi long ol mesej ia blong jeneral konfrens?