“?Yu Yu Lavem Mi Moa, I Winim Ol Nara Samting Ia?”

Long Novemba 2019, fren blong mi mo mi i visitim Holi Graon. Taem mitufala i stap longwe, mitufala i luklukbak mo stadi long ol skripja abaot laef blong Jisas Kraes. Wan moning, mitufala i stanap long Not Wes saed blong Solwota blong Galili, long wan ples we maet Jisas i mitim ol disaepol blong Hem afta long Laef Bakegen long Ded blong Hem.

Afta we Jisas i laef bakegen long ded, taem we yumi ridim long Jon japta 21, Pita mo ol nara disaepol oli bin go huk ful naet, be oli no kasem fis.¹ Long moning, oli bin luk wan man i stanap long so, i talem olgeta blong sakem net blong olgeta long narasaed blong bot. Oli sapraes tumas, mo net i fulap olsem wan merikel.²

Kwiktaem oli luksave man ia, se i Lod, mo oli hariap blong go mitim Hem.

Taem oli pulum net i go long so, we i fulap long fis, Jisas i se: “Yufala i kam kakae.”³ Jon i ripotem se: “Taem we olgeta oli kakae finis, Jisas i askem long Saemon Pita se, ‘Saemon, pikinini blong Jon. ?Yu yu lavem mi moa, i winim [ol nara samting ia]?’”⁴

Taem mi bin stap stanap long so blong solwota ia, mi luksave se kwestin blong Sevya, i wan long ol moa impoten kwestin we Hem i save askem mi samtaem. Kolosap mi harem voes blong Hem i askem: “Russell, ?yu yu lavem mi moa i winim ol nara samting ia?”

?Yu yu stap askem yuwan se Jisas i stap tokbaot wanem samting ia taem Hem i bin askem Pita: “?Yu yu lavem mi moa, i winim ol nara samting ia?”

Spos yumi putumbak kwestin ia i kambak long yumi tedei, Lod i save askem yumi se hamas yumi bisi, mo abaot ol gud mo nogud paoa we oli stap pulum tingting blong yumi mo taem blong yumi. Maet bae Hem i askem wanwan long yumi sapos yumi lavem Hem i moa i winim ol samting blong wol ia. Maet hemia i wan kwestin abaot wanem yumi rili tekem impoten long laef, huia yumi stap folem, mo olsem wanem yumi luk rilesensip blong yumi wetem ol memba blong famli mo ol neba. O mebi, Hem i stap askem abaot wanem i filim givim glad mo hapines long yumi.

?Weswe long ol samting blong wol ia? ?Oli givim yumi glad, hapines mo pis we Sevya i bin givim long ol disaepol blong Hem mo i stap givim long yumi tedei? Hem nomo i save tekem tru glad, hapines mo pis i kam taem yumi lavem Hem mo stap folem ol tijing blong Hem.

?Hao nao bae yumi ansarem kwestin ia: “Yu yu lavem mi moa i winim ol nara samting ia?”

Taem yumi faenemaot wan moa ful mining long kwestin ia, bae yumi save kam ol moa gud memba blong famli, neba, sitisen, memba blong Jos, mo ol boe mo gel blong God.

Naoia we mi olfala, mi bin go long plante fenerol. Mi sua se yufala i bin luk wanem we mi bin luk. Taem oli stap selebretem laef blong wan memba blong famli o wan fren we i ded, plante taem, man we i givim toktok, i no tokbaot hamas haos blong hem i bigwan, namba blong trak we hem i gat, o hamas mane hem i gat long bank. Oli no tokbaot ol post we hem i putum long sosol media. Long plante fenerol we mi bin go long olgeta, oli lukluk long rilesensip we dedman i bin gat, ol seves blong hem long ol narawan, ol lesen mo eksperiens blong laef, mo lav we hem i gat long Jisas Kraes.

Yufala i no tekem mi rong. Mi no stap talem se blong gat wan naes hom o wan naes trak, i wan rong samting, o se i nogud blong yusum sosol media. Wanem we mi stap talem, i we, long en, ol samting ia oli no impoten komperem wetem fasin blong lavem Sevya.

Taem yumi lavem mo folem Hem, yumi gat fet long Hem. Yumi sakem sin. Yumi folem eksampol blong Hem mo kasem baptaes mo kasem Tabu Spirit. Yumi stap strong kasem en mo stap long kavenan rod. Yumi fogivim ol memba blong famli mo ol neba taem yumi lego biaen ol nogud filing we yumi stap holemtaet. Yumi traehad wetem evri hat blong obei long ol komanmen blong God. Yumi traehad blong stap obei. Yumi mekem mo kipim ol kavenan. Yumi givim ona long papa mo mama. Yumi lego ol nogud paoa blong wol ia. Yumi mekem yumi rere from Seken Kaming blong Hem.

Insaed long “Kraes we I Laef: Testemoni blong Olgeta Aposol,” yumi stap ridim: “[Jisas] bae i kambak long wol ia samtaem. … Bambae Hem i rul olsem King blong Ol King, mo bae i rul olsem Lod blong Ol Lod, mo evri ni bae oli bodaon, mo evri tang bae oli toktok blong wosipim Hem. Wanwan long yumi bae oli jajem hem folem ol wok blong hem, mo folem ol samting we hat blong hem i wantem.”⁵

Olsem wan long ol Aposol we i saenem pepa ia blong “Kraes we I Laef”, mi save talem se Jisas “i laet ia, mo i laef ia, mo i hop ia blong wol,”⁶ mo i givim mi wan moa strong filing long hat we i wantem lavem Hem moa evri dei.

Mi testifae se Papa long Heven mo Jisas Kraes, Tufala i stap laef. Mi testifae we Tufala i lavem yumi. Ol skripja oli tijim se “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”⁷ Ol skripja oli tijim tu se Jisas “i lavem wol ia tumas mekem se hem i givim laef blong hemwan bakegen, blong mekem se hamas bae oli bilif bae oli kam ol boe mo gel blong God.”⁸

Papa long Heven i lavem yumi tumas mekem se Hem i rere long plan blong Hem blong fasin blong sevem man, wetem wan Sevya i stap long medel. Mo Jisas i lavem yumi tumas, mekem se long bigfala Kaonsel long Heven, taem Papa long Heven i askem : “?Bambae mi sendem huia?” Jisas, we i fasbon blong evri spirit pikinini blong Papa, i ansa: “Mi hemia. Yu sendem mi.”⁹ Hem i talem long Papa blong Hem: “Papa, bae mi mekem folem tingting blong yu, mo glori bae i blong yu blong oltaem.”¹⁰ Jisas i volontia blong i Sevya mo Ridima blong yumi blong yumi save kam olsem Tufala mo gobak stap wetem Tufala.

Tufala skripja ia oli stap tijim tu se, blong gobak stap long ples we Tufala i stap long hem, yumi nid blong biliv. Yumi nid blong biliv long Jisas mo long plan blong God blong stap hapi. Blong biliv, hem i blong lavem mo folem Sevya blong yumi mo obei ol komanmen, iven long medel blong ol tes mo ol traehad.

Wol blong tedei i no stap gud. I gat ol taem we hat i soa, o samting we yumi no agri wetem, ol hadtaem, mo ol samting we oli pulum tingting.

Presiden Dallin H. Oaks, we i toktok long 2017, i talem samting ia: “i gat ol taem blong jalenj, we oli fulap long ol bigfala wari: ol wo mo toktok abaot wo, maet ol bigfala sik we i spolem man, ol draetaem, ol bigfala wota, mo planet we i kam hot.”¹¹

Yumi no save lusum lav mo hop we yumi gat long Jisas, iven sapos yumi fesem ol jalenj we yumi luk oli bigwan tumas. Papa long Heven mo Jisas, bambae oli neva fogetem yumi. !Tufala i lavem yumi!

Las Oktoba, Presiden Russell M. Nelson i tijim yumi hamas i impoten blong putum Papa long Heven mo Jisas Kraes i kam faswan long laef blong yumi. Presiden Nelson i tijim se wan mining blong toktok ia, Isrel, hem i “Letem God i win.”¹²

Hem i askem ol kwestin ia long wanwan long yumi: “ Yu yu wantem letem God i stap win insaed long laef blong yu? ?Yu yu wantem letem God i paoa ia we i moa strong insaed long laef blong yu? ?Bae yu yu letem ol toktok blong Hem, ol komanmen blong Hem, mo ol kavenan blong Hem oli lidim tingting blong yu long wanem yu stap mekem evri dei? ?Bae yu yu letem voes blong Hem i kam faswan ova long eni nara samting? ?Yu yu wantem letem wanem Hem i nidim yu blong mekem i kam faswan long evri nara bigfala tingting we yu yu gat? ?Yu yu wantem se tingting blong yu i draon insaed long tingting blong Hem?”¹³

Yumi mas oltaem tingbaot se tru hapines blong yumi i dipen long rilesensip blong yumi wetem God, wetem Jisas Kraes, mo wetem wanwan long yumi.

Wan wei blong soemaot lav blong yumi, i blong joenem famli, fren, mo neba blong mekem ol smol samting blong givim moa gud seves long wanwan long yumi. Mekem ol samting we i mekem wol ia i wan moa gud ples.

?Wanem samting we yu save mekem insaed long laef blong yu stret, blong soem se yu lavem Lod faswan?

Taem yumi lukluk nomo blong stap lavem ol neba blong yumi olsem we Hem i stap lavem yumi, yumi stat blong rili lavem olgeta raon long yumi.¹⁴

Mi askem bakegen, ?hao nao bae yu ansa long kwestin blong Sevya ia: “Yu yu lavem mi moa i winim ol nara samting ia?”

Taem yu stap tingting long kwestin ia olsem we mi mi bin mekem, mi prea se bae yu ansa olsem we Pita i bin mekem longtaem finis i pas: “Yes Lod, yu yu save se mi mi lavem yu,”¹⁵ mo afta, soem hemia taem yu lavem mo wok blong God mo olgeta evriwan raon long yu.

Mi testifae se yumi gat blesing blong gat gospel blong Jisas Kraes blong lidim yumi long wei we yumi stap laef mo tritim wanwan long yumi. Tru long Hem, yumi faenemaot se evri gel mo boe blong God i impoten tumas long Hem.

Mi testifae se Jisas Kraes i Sevya blong yumi we yumi lavem. Hem i Wan Stret Pikinini Ia Nomo blong God. Mo mi talem testemoni ia, wetem tingting i stap daon, long nem blong Jisas Kraes, amen.