Lod I Blesem Mi Bigwan Oltaem long Ol Dei blong Mi
?Olsem wanem nao yumi stap fesem ol hadtaem blong yumi? ?Yumi talem tangkyu from yumi stap lukluk moa long ol blesing bitim ol problem blong yumi?
Wol sik ia KOVID 19 i bin wan long olgeta fulap tes mo jalenj we ol pikinini blong God i fesem truaot long histri blong wol. Long stat blong yia ia, ol famli blong mi we mi lavem tumas mo mi, i laef tru long sam dak dei. Wol sik Ia mo narafala samting oli karem ded mo sore i kam long famli blong mi taem sam long ol lav wan blong mi oli bin lego laef ia. I nomata long meresin, fasin blong livim kakae, mo prea, blong faef wik, brata blong mi, Charly, sista blong mi, Susy, mo tawi blong mi, Jimmy, oli kros i go long narasaed blong vel.
I gat sam taem we mi stap askem miwan se from wanem nao Sevya i krae taem Hem i luk Meri i stap harem nogud from ded blong brata blong hem Lasaros, we nomata Hem i bin save se Hem i gat paoa ia blong karem Lasaros i kambak long laef, mo tetaem ia, kolosap nao bae Hem i yusum paoa blong Hem blong karembak fren blong Hem long ded.1 Mi mi sek bigwan long Sevya we i gat lav mo sore mo i filim save wanem we Meri i stap fesem; Hem i bin andastanem soa ia we i no gat man i save tokbaot we Meri i bin stap filim long ded blong brata blong hem, Lasaros.
Yumi filim semmak soa ia taem yumi eksperiensem wan sot taem we olgeta we yumi lavem tumas oli lego yumi. Sevya i gat stret sore ia long yumi. Hem i no talem se yumi rong from yumi no luk longwe, o from yumi no save luk longwe long wokbaot blong yumi we i no save finis. Be, Hem i gat lav mo sore from ol harem nogud mo safaring blong yumi.
Papa long Heven mo pikinini blong Hem, Jisas Kraes, I wantem yumi blong gat glad.2 Presiden Russell M. Nelson i tijim: “Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi. Taem we long laef blong yumi, yumi stap lukluk nomo long plan blong Papa long Heven long saed blong fasin blong sevem man, … yumi save filim glad nomata wanem i stap hapen—o no hapen—long laef blong yumi.”3
Taem mi stap olsem wan yang misinari, mi bin tingbaot wan gudfala misinari we mi kam blong respektem hem we i bin kasem sam nius we i prapa spolem hem. Mama blong Hem mo yangfala brata blong hem oli ded long wan bigfala aksiden. Misin presiden i letem elda ia blong jusum blong gobak hom long fenerol seves. Be, afta we hem i bin toktok wetem papa blong hem lon fon, misinari ia i jusum blong stap mo finisim misin blong hem.
Long wan sot taem afta, taem mifala i stap givim seves long semmak ples, kompanion blong mi mo mi i kasem wan imejensi kol; sam stilman oli stilim baeskel we i blong semmak misinari mo oli katem hem long naef. Hem mo kompanion blong hem i mas wokbaot i go long wan hospital we i kolosap, long ples ia mi mo kompanion blong mi i bin mitim tufala. Long rod blong go long hospital, mi stap harem mi sore from misinari ia. Mi stap tingbaot finis se spirit blong hem bae i daon, mo afta long nogud eksperiens ia, naoia bae hem i wantem blong gobak hom.
Be taem we mitufala i kamaot long hospital, mi luk misinari ia i stap ledaon long bed, rere blong oli tekem hem i go long operesen—mo hem i stap smael. Mi stap tingting se, “?Hao nao hem i save stap smael long wan taem olsem?” Taem hem i stap kam gud sloslo long hospital, hem i gohed blong serem ol smol buk mo kopi blong Buk blong Momon long ol dokta, nes mo ol narafala sikman. Iven wetem ol tes ia, hem i no wantem gobak hom. Be bae hem i wok kasem las dei blong misin blong hem wetem fet, evri strong tingting, ful paoa mo intres blong hem.
Long stat blong Buk blong Momon, Nifae i talem:“Mi bin luk plante hadtaem long ol dei blong mi, be, Lod i bin blesem mi bigwan oltaem long ol dei blong mi.”4
Mi stap tingbaot plante tes we Nifae i go tru long hem, plante long olgeta we oli stap long ol raeting ia. Ol tes blong Hem oli helpem yumi blong andastanem se yumi evriwan i gat ol dak dei blong yumiwan. Wan long ol tes ia i hapen taem we Lod i givim oda long Nifae blong gobak long Jerusalem blong karem bras buk we Leban i kipim wetem hem. Sam long ol brata blong Nifae oli ol man we oli gat smol fet, mo oli iven wipim Nifae wetem wan stik. Nifae i eksperiensem wan narafala tes taem hem i brekem bonara blong hem mo i no save kasem kakae blong hem mo famli blong hem. Afta long hemia, taem Lod i givim oda long Nifae blong bildim wan sip, ol brata blong hem oli jikim hem mo no wantem helpem hem. I nomata long ol samting ia mo fulap tes long wokbaot long laef blong hem, Nifae i oltaem luksave gudfala fasin blong God.
Taem ol famli blong hem oli stap krosem bigfala wota ia blong go long promes graon, sam long ol famli blong Nifae i “stat blong mekem lafet,” toktok nogud, mo oli fogetem se paoa blong Lod nao i sevem olgeta. Taem Nifae i stat blong stretem olgeta, oli kros long hem mo fasem hem wetem rop mekem se hem i no save muv. Buk blong Momon i tokbaot se ol brata blong hem “oli mekem nogud tumas long [hem],” ol han mo ol leg blong hem “oli solap plante, mo ol soa blong olgeta oli bigwan.”5 Nifae i krae sore from hat blong ol brata blong hem i strong, mo samtaem, hem i filim se bigfala harem nogud i winim hem.6 “Be,” Nifae i talem: “Mi bin lukluk long God blong mi, mo mi bin presem hem blong fuldei; mo mi no komplen agensem Lod from ol hadtaem blong mi.”7
Ol dia brata mo sista blong mi. ?Hao nao yumi fesem ol hadtaem? ?Yumi stap komplen agensem Lod from ol hadtaem ia? ?O, olsem Nifae mo foma misinari fren blong mi, yumi talem tangkyu tru ol toktok, tingting, mo wok from yumi stap lukluk moa long ol blesing bitim ol problem blong yumi?
Sevya blong yumi, Jisas Kraes, i givim eksampol ia long yumi long taem blong seves blong Hem long wol ia. Tru ol taem we oli had mo ol tes, i gat samfala samting we i karem moa pis mo glad filing bitim taem we yumi stap givim seves long ol nara man. Buk blong Matiu i tokbaot wanem i hapen taem Sevya i harem se kasen brata blong Hem, Jon Baptaes, King Herod i katemaot hed blong hem blong mekem gel blong Herodias i glad:
“Nao ol man blong Jon oli go karem bodi blong hem, oli go berem. Nao biaen, oli go talemaot long Jisas.
“Nao taem Jisas i harem nius ya, … i aot long ples ya, i klaem long wan bot, i go long wan [waelples]. Be taem ol man oli save ples ya … oli aot …, oli wokbaotso, oli biaen long hem.
“Taem Jisas i goso, hem i luk we plante man oli stap finis, mo hem i sore tumas long olgeta. Nao hem i [hilim] ol sikman blong olgeta.
“Nao long sapa, ol man blong Jisas oli kam …, oli talem se, ‘Ples ya i wan trabol ples, mo i no longtaem bambae i tudak. I gud yu sanemaot ol man ya, blong oli save go … pem kakae blong olgeta.’
“Be Jisas i talem se, ‘No, oli save stap nomo. I gud yufala nomo i givim kakae long olgeta.’”8
Jisas Kraes i soem long yumi se long ol taem blong tes mo agens yumi save luksave hadtaem blong ol narawan. Wetem lav mo sore long hat, yumi save go aot mo leftemap olgeta. Mo taem yumi mekem olsem, yumi kam strong moa tru long seves olsem hemia blong Kraes. Presiden Gordon B. Hinckley i talem: “Gudfala tritmen blong wari we mi save, i wok. Gudfala meresin blong no lusum hop, hem i seves. Gudfala meresin blong no taed, i wan jalenj blong helpem wan man we i moa taed.”9
Long hemia, Jos Ia blong Jisas Kraes, Mi gat plante janis blong mekem givhan wok mo givim seves long ol narafala man raon long mi. Hem i long ol taem ia we mi filim se Papa long Heven i mekem ol hevi samting blong mi i kam laet. Presiden Russell M. Nelson i profet blong God long wol ia, hem i wan gudfala eksampol long olsem wanem yumi sud givhan long ol narafala man long ol hadtaem mo tes. Mi joenem testemoni blong mi wetem olgeta blong plante sent, se God i Papa blong yumi long Heven we i gat lav long yumi. Mi bin filim lav blong Hem we i no gat en long taem blong ol dak dei blong mi. Sevya blong yumi, Jisas Kraes, i andastanem ol harem nogud mo hadtaem blong yumi. Hem i wantem blong karem aot ol hevi samting long yumi, mo givim kamfot. Yumi stap folem eksampol blong Hem taem yumi wok mo givhan long ol olgeta, we oli gat moa trabol bitim yumi. Long nem blong Jisas Kraes, amen.