Progres long Ol Niu Tempol I Stap Gohed

Taem ol lokol situesen blong wol sik ia i stap kam gud moa, ol tempol, wetem ol open haos mo dedikesen we oli stap go wetem, oli stat blong muv fored i go. Wok blong openem bakegen ol tempol folem ol step, i stap gohed, mo oli stap stretem, taem i gat nid, folem ol lokol situesen.

I gat ol open haos i stap gohed blong tempol long Winipeg, Manitoba, Kanada, we bae oli dediketem long 31 Oktoba 2021, mo blong tempol blong Pokatelo, Aedaho, YSA, we bae oli dediketem long 7 Novemba 2021.

Niufala Senta blong Ol Visita long Mesa Arisona Tempol, oli bin dediketem long Ogis 2021, mo i gat wan open haos blong tempol we bae i stat long 16 Oktoba kasem 20 Novemba, mo bae nambatu dedikesen bae i tekples long 12 Disemba.

Oli bin dediketem Nauvu Tempol, we oli mekem i niu bakegen, mo i stap long histri distrik long Ilinoa long YSA; bae oli ademap sam moa step afta.

I gat wan open haos we oli putum deit blong hem finis, blong tempol long Wasington D.K., YSA; hemia bae i hapen bifo oli dediketem bakegen long namba 19 Jun 2022.

Long Mei blong yia ia, oli bin anaonsem wan tempol blong Ifrem, Yuta, YSA, mo oli bin brekem graon blong ol tempol long Salvado, Brasil; Naerobi, Kenya; Pno Pen, Kambodia; Neiafu, Tonga; mo Taladasi, Florida; Tuele, Yuta; Saerakus, Yuta; Helena, Montana; mo Pitsbeg, Pensilvania, YSA.

Afta long jeneral konfrens, oli bin brekem graon long 9 Oktoba 2021, blong tempol long Kaspa, Waeoming, YSA, mo long 30 Oktoba 2021, blong tempol long Pago Pago, Ameriken Samoa.

Ol wok blong mekembak ol tempol long Hamilton, Niu Silan; Hong Kong, Jaena; Tokio, Japan; Kolombas, Ohaeo, YSA; mo Mantae, Sol Lek Siti, mo Sent Joj, Yuta, YSA, oli stap gohed yet.

Wok i stap gohed blong bildim 40 moa tempol raon long wol.