Digital Lamang: Mga Young Adult
Sa Unsang Paagi ang Templo Mahimong usa ka “Balay sa Pagkat-on” alang Kaninyo
Kita kanunayng gitambagan sa pagkat-on diha sa templo, apan unsaon man nato kana sa pagbuhat?
“Ikaw dili pa makasabot sa tanang butang sa unang higayon, apan balik kanunay sa templo ug padayon sa pagkat-on og dugang sa tibuok nimong kinabuhi.”
Ang akong bishop mihatag kanako niining tambag sa wala pa ako makadawat sa akong pagtuga [endowment], ug husto siya! Dili gayod nako makalimtan ang Espiritu ug ang gugma nga akong nabati sulod sa templo, apan pagkahuman niana, dali ra nakong nakalimtan ang dakong bahin niini, ug dili ko sigurado unsaon sa paggamit ang tanang butang nga akong nakat-onan.
Nga mao ang nakapahimo kanako nga gustong magpadayon og balik aron magkat-on pa og dugang.
Si Elder Robert D. Hales (1932–2017) sa Korum sa Napulog Duha ka Apostoles nagtudlo, “Ang [mga] templo mao ang labing dako nga unibersidad nga nahibaloan sa tawo.”1
Apan sa unsang paagi nga kita makakat-on diha sa templo?
Kitang tanan makakat-on sa nagkalain-laing paagi, busa samtang magtinguha kita og pagpadayag, ang Espiritu Santo makatudlo kanato sa indibiduwal nga paagi ug mohimo sa templo nga usa ka “balay sa pagkat-on” alang sa matag usa kanato (Doktrina ug mga Pakigsaad 109:8).
Ania ang pipila ka mga kasinatian nga nakapakita kanako kon unsa ka personal nga pamaagi ang pagkat-on diha sa balay sa Ginoo.
Kita Makapangandam Daan sa Pagkat-on
Ang klase sa pagpangandam para sa templo dili lang basta klase nga atong tambongan sa dili pa madawat ang atong pagtuga. Kita kanunayng makapangandam sa atong kaugalingon sa pagkat-on sa dili pa ang matag pagbisita.
Ang Langitnong Amahan gusto nga kita makakat-on ug magtinguha og mga tubag. Kita mahimong mag-ampo alang sa tabang, mosiksik kita sa mga kasulatan, ug makapuasa gani kita o maghimo sa family history nga buhat sa dili pa ang atong pagbisita sa templo aron mas maabli ang atong mga kasingkasing sa mga kahibalo nga atong makita didto. Si Presidente Russell M. Nelson miingon: “Ang usa ka tawo mahimong … mobasa sa Daang tugon ug sa mga basahon ni Moises ug Abraham sa Perlas nga Labing Bililhon. Ang maong pagrebyo sa karaang kasulatan mas makahatag pa og kahayag human ang usa ka tawo mapamilyar na sa tuga sa templo.”2
Sa dili pa ang matag pagbisita sa templo, maningkamot ko nga maghunahuna og usa ka pangutana mahitungod sa ebanghelyo, mahitungod sa akong kinabuhi, o mahitungod sa mga ordinansa, ug mangayo sa Langitnong Amahan sa pagtabang kanako nga makaila sa tingog sa Espiritu aron makasabot unsay Iyang gustong itudlo kanako. Ang pagpangandam daan kanunayng makatabang kanako sa pagdapit og diwa sa pagkat-on diha sa templo. Ug kon atong buhian ang mga butang sa kalibotan sa sulod sa templo ug magtinguha sa pagpaminaw Kaniya, atong mabuksan ang atong mga kasingkasing ngadto sa Espiritu ug magkat-on sa bisan unsang paagi nga gusto Niya nga motudlo kanato.
Kita Makakita og Personal nga mga Tubag
Sa dihang naminyo ko, mibati ko og kabalaka. Ang akong pamilya magkatawa gihapon kon giunsa nako sa pagtapik-tapik ang akong mga tudlo diha sa akong mga tuhod (tungod sa kakulba nako) samtang ang tigsilyo sa templo namulong kanamo. Wala ako mahadlok sa pagminyo nako sa akong bana—Ako nahigugma kaniya! Apan nabalaka ko mahitungod sa umaabot tungod kay naghimo ako og ingon ka importanting pakigsaad. Sa hilom nga paagi ako nag-ampo dihang misulod ko sa templo aron masayod unsa ang akong buhaton aron mapabilin ang among kaminyoon nga lig-on diha sa kalibotan nga nag-anam ka gubot.
Pipila ka gutlo ang milabay, ang tigsilyo sa templo misulti sa akong bana ug nako sa paghinumdom nga ang matag ordinansa sa templo nagtudlo kanato ngadto ni Jesus. Ang Espiritu mitabang kanako sa pag-ila niining mensahe isip usa ka tubag gikan sa Langitnong Amahan, ug ang mga pulong sa tigsilyo sa templo mipalawom sa akong pagpamatuod nga kon ang akong bana ug ako makanunayong modangop ngadto sa Manluluwas, kami makapalig-on sa among kaminyoon latas sa kahangtoran.
Kini nga kasinatian mipahinumdom kanako nga ang Langitnong Amahan nagpakabana mahitungod sa mga pangutana sa atong mga kasingkasing ug makahatag og makahupay nga kaalam ngari kanato diha sa templo sa personal nga mga paagi. Sama sa gitudlo ni President Ezra Taft Benson (1899–1994): “Dihang ako nabug-atan sa usa ka problema o usa ka kalisdanan, ako miadto sa Balay sa Ginoo uban sa usa ka pag-ampo diha sa akong kasingkasing alang sa mga tubag. Kini nga mga tubag miabot sa klaro ug dili masayop nga mga paagi.”3
Kita Makakat-on sa Daghang Paagi
Atol sa usa ka pagbisita sa templo ilabina sa panahon sa kinabuhi nga daghan ang buluhaton, ang akong hunahuna anaa sa laing dapit, ug nagdali-dali ako sa pagbuhat sa mga ordinansa ug molakaw dayon. Apan usa ka mabination nga trabahante sa templo hinayng misugyot nga kon maghinay-hinay mi ug hunahunaon ang sagradong buhat nga among gihimo, kami makabati sa talagsaong Espiritu nga nagpuyo lang diha sa balay sa Ginoo. Ako nagtuo nga kadtong trabahante sa templo giaghat sa pagtabang kanako nga makasabot sa usa ka kamatuoran. Ug napahinumdoman ako kon sa unsang paagi nga kami makadawat og kahibalo gikan sa daghan kaayong nagkalain-lain nga mga kapanguhaan diha sa templo. Nakadawat ako og pagpadayag diha sa templo pinaagi sa hilom nga pag-ampo, pagsiksik sa mga kasulatan diha sa mga hulatanan nga dapit, pagpamalandong sa mga pulong sa mga ordinansa, ug, oo, gani sa pagpakig-istorya sa dinasig nga mga trabahante sa templo.
Samtang kita magkat-on diha sa templo, kita lagmit makadawat og usa ka dugang nga salabotan sa mga ordinansa ug mga pakigsaad, usa ka gipaladman nga pagpamatuod, mga pag-aghat, mga pagbati sa kahupay, ug dugang pa. Ang Langitnong Amahan gusto nga kita makabaton og personal nga mga kasinatian sa pagkat-on diha sa templo ug mahimong bukas ngadto sa daghang paagi nga kita makadawat og kahibalo diha sa Iyang panimalay.
Kita Mapanalanginan samtang Atong Unahon ang Templo
Daghan pa kaayo pa kaayo ko og angayng makat-onan mahitungod sa mga ordinansa sa templo ug sa gahom nga moabot gikan sa pagtuman sa akong mga pakigsaad. Apan mapasalamaton kaayo ko nga makapadayon ko sa pagkat-on sa tibuok nakong kinabuhi.
Kon atong gamiton sa labing maayo ang atong panahon sulod sa templo ug mogahin og mga gutlo sa pagpamalandong sa atong mga pakigsaad, atong maablihan ang mga ganghaan sa kahibalo nga makatabang kanato nga magpabilin diha sa dalan ngadto ni Kristo. Kana natinuod ngari kanako samtang ako mibalik-balik aron makat-on sa pamaagi sa Ginoo diha sa Iyang Balaan nga balay.