Digital Lamang: Mga Young Adult
Abi Nako Wala Ko Magkinahanglan sa Institute, apan Miusab Kini sa Tanan alang Kanako
Sa dihang naglisod ko sa pagpangita sa kamatuoran, ang pagtambong sa institute mao ang lakang nga gikinahanglan nakong himoon aron mobati nga mas duol ngadto sa akong Langitnong Amahan.
Samtang nagdako ko, ang pagtambong sa institute dili importante nga tumong para nako. Bisan og si Elder L. Tom Perry (1922–2015) sa Korum sa Napulog Duha ka Apostoles mikomparar sa institute ngadto sa “usa ka nga taming sa proteksiyon palibot kanimo nga mopabilin kanimo nga gawasnon gikan sa mga tintasyon ug mga pagsulay sa kalibotan,”1 abi nako nga kon nakatambong na ako sa seminary, mao na kadto! Abi nako nga nakat-onan na nako ang tanan. Natanom na ang binhi sa akong hugot nga pagtuo, ug andam na ako nga motubo. Abi nako nga naa nako ang tanang kahibalo sa ebanghelyo nga akong gikinahanglan aron mosagubang sa bisang unsang hagit.
Apan sa wala madugay akong nahibaloan nga mas dako pa ang mga hagit nga akong giatubang kay sa akong gihunahuna. Para nako, ang pagkahimong young adult dili sayon. Ang seminary mihatag kanako sa espirituhanon nga mga himan nga akong gikinahanglan, apan wala ako masayod kon unsaon sa paggamit niini.
Ang akong una nga pipila ka tuig isip usa ka young adult gigahin tali sa akong panimalay sa New Zealand ug sa Estados Unidos. Aduna akoy scholarship sa usa ka kolehiyo sa Massachusetts ug, isip usa ka atleta nga estudyante, nakaplagan nako nga ang akong panahon ug tumong wala gayod nakapunting sa simbahan. Duol sa kataposan sa akong pag-eskwela, wala ko nakasimba o nakabuhat og bisan unsa nga may kalabotan sa ebanghelyo sobra sa duha ka tuig.
Wala ako mahibalo nga gihimo nako ang akong kaugalingon nga huyang sa akong espirituhanon nga pakigbisog batok sa kalibotan.
Ug dumadaog ang kalibotan.
Apan nausab ang mga butang sa dihang miuli ko sa New Zealand aron sa pagtapos sa akong kataposang pipila ka tuig sa pag-eskwela. Nagsugod ko sa pagpunting sa akong atensiyon sa akong pagbati nga sad-an ug kaulaw mahitungod sa pagbaliwala sa akong pagkaespirituhanon. Ug human sa dugay kaayo nga pagkahilayo gikan sa ebanghelyo, aduna akoy mga pangutana ug mga pangagpas mahitungod sa Simbahan nga mibuntog sa akong gamay nga binhi sa hugot nga pagtuo.
Samtang naglakaw-lakaw ko palibot sa akong unibersidad nga nagduko, nakita nako ang gambalay sa institute. Uban sa usa ka nabug-atan nga kasingkasing ug puno sa mga pangutana ug sa usa ka mumho sa hugot nga pagtuo nga nahabilin, gikombinser nako ang akong kaugalingon nga mosulod. Maduhaduhaon ako sa ebanghelyo ug nagpanuko sa pag-apil sa bisan unsang may kalabotan sa Simbahan, apan nagpalista ako sa usa ka klase nga naghunahuna nga makatabang kini kanako nga makakaplag og gamayng paggiya.
Kana nga usa ka klase midasig kanako sa pagsugod diha sa usa ka agianan nga miusab sa akong kinabuhi. Ug gikan niini, nakakat-on ako ug upat ka bililhon nga mga leksiyon.
1. Hingpit Kitang Gihigugma
Usa sa labing dako nga mga pangutana nga aduna ako sa dihang nagsugod ako sa klase mao ang “Gihigugma pa ba ako sa Dios?” Naglibog gayod ako mahitungod sa mga pagpili nga akong gihimo sa dihang mibiya ako aron moeskwela. Gibati nako nga daw naabot ako sa punto nga dili na ako makahimo og kausaban. Apan samtang nagpadayon ako sa pagtambong sa institute matag semana, kanunay nga adunay mensahe sa matag leksiyon nga magpabilin sa akong hunahuna: “Ang gugma sa Dios walay mga utlanan.”
Tingali makahimo kita og mga kasaypanan, apan ang malumo nga pahinumdom gikan sa akong magtutudlo nga ang atong Langitnong Amahan hingpit nga nahigugma kanato mao ang usa sa akong kinadak-an nga mga nasabtan gikan sa matag klase sa institute sa akong unang semestre. Nakaamgo ako nga bisan unsa pa ka sukwahi ang atong gihunahuna, Siya nahigugma kanato ug gusto nga mogiya kanato.
2. Gusto sa Langitnong Amahan nga Kita Mangutana ug Motinguha sa Kamatuoran
Daghan kaayo ko og mga pangutana mahitungod sa Simbahan samtang nagdako, apan wala gayod ako mibati nga ingon og ako makapadayag niini tungod sa kahadlok nga husgahan. Ug isip usa ka young adult, mas daghan pa gayod ako og mga pangutana.
Sa dihang misugod ako sa pagtambong sa institute, mas nakatutok ako sa akong wala matubag nga mga pangutana kay sa akong hugot nga pagtuo ug sa mga kamatuoran nga akong nahibaloan. Ug sa dihang miigo ang COVID-19 nga pandemya ug ang kaugtas ug ang kabalaka mibuntog kanako, naglisod ko sa pagbati sa Espiritu. Naglaom nga mobati og usa ka butang, mihukom ako nga moluhod ug mag-ampo sa unang higayon sulod sa pipila ka bulan. Sa wala pa ko makasulti og usa ka pulong, napuno og luha ang akong mga mata ug gilukop ko sa usa ka lig-on nga pagbati sa gugma. Nangamuyo ako sa Ginoo sa pagtubag sa tanan nakong mga pangutana, sa pagpagaan sa akong palas-anon, ug sa paghatag kanako og kalinaw.
Wala madugay human niana nga pag-ampo, ang akong magtutudlo sa institute mitupad og lingkod sa usa ka kauban sa klase ug kanako ug nangutana kanamo kon unsay gikinahanglan sa mga young adult, tungod kay naglaom siya sa pagmugna og mga klase nga motubag sa labing komon nga mga panglimbasog ug mga pangutana. Makapahupay kadto nga mahibalo kon unsa siya ka ganahan nga motabang, ug mipadayag ako kon unsay akong gibati. Samtang nag-istorya kami sa tibuok hapon mahitungod sa among mga panginahanglan isip mga young adult sa Simbahan, nakakaplag ako og tubag sa akong pag-ampo diha sa mga pulong sa akong kauban sa klase.
Nakaamgo ako nga dili lang ako ang nag-inusara nga adunay mga pangutana ug nga kini dili angay ikaulaw, sama sa akong gihunahuna sa una.
Mibati ako nga nabayaw sa espirituhanon nga paagi human niadto nga pagsultihanay, ug masaligon ako sa unang higayon nga ang Langitnong Amahan nagpakabana mahitungod sa akong mga pangutana ug nga Siya motabang kanako nga makakaplag og mga tubag sa paglabay sa panahon.
3. Makakat-on Kita gikan sa Adunay Susama nga Paghunahuna nga mga Young Adult
Ang mga young adult sa Simbahan anaa sa nagkalainlaing dalan ug adunay lainlaing panglantaw, ug mahimong lisod alang kanato nga makakapalg og komon nga mga opinyon o interes sa usag usa. Apan ang usa ka butang nga komon kanato mao ang ebanghelyo.
Uban sa akong nagkadako nga pag-apil sa institute, nindot kaayo nga makadungog gikan sa mga young adult nga adunay daghan kaayong talagsaon nga mga kasinatian sa pagkaplag sa ilang espirituhanon nga pundasyon sa ilang pakigbisog batok sa kaaway.
Ang pag-inusara nga akong gibati hinay-hinay nga nawala dihang anaa ako sa institute. Pinaagi sa makanunayon nga pakigdait ug mga pagsultihanay mahitungod sa ebanghelyo, nakapalambo ako og mga panaghigalaay, ug ang impluwensiya niini nga mga panaghigalaay mipanalangin ug midasig kanako nga magpadayon sa paglig-on sa akong hugot nga pagtuo.
4. Kinahanglan nga Mag-ugmad Kita og Atong Kaugalingon nga Pagpamatuod
Isip usa ka batan-on, misimba ako tungod kay gusto sa akong mga ginikanan. Ang akong pagpamatuod sa ebanghelyo nagsalig lang sa ilang pagpamatuod. Apan samtang nagpadayon ako sa paglambo ug pagtinguha sa kamatuoran diha sa institute, nakakat-on ako sa pagbarog sa akong kaugalingon nga pagpamatuod imbes nga magsalig lamang sa mga pagpamatuod sa akong mga ginikanan. Ang binhi sa hugot nga pagtuo nga akong gitanom pipila ka tuig ang milabay misugod sa pagturok og paspas tungod kay ang mga klase sa institute mihatag niini sa yuta ug mga sustansya nga gikinahanglan niini aron motubo.
Sa kataposan, ang institute adunay dako nga papel sa akong pagkakabig ngadto sa ebanghelyo ni Jesukristo. Ang institute nagpadayon sa pagtabang kanako sa pagpalambo sa akong hugot nga pagtuo ug mihatag og luwas nga dapit alang kanako aron makapadangat og lisod nga mga pangutana. Bisan og miyembro ako sa akong tibuok nga kinabuhi, ang akong pagpamatuod wala mahimong sinsero ug, ilabi na gayod, akoa na hangtod nga ako mitambong sa institute ug nakakat-on sa paggamit sa mga baroganan sa ebanghelyo sa akong kinabuhi.
Ang pag-apil sa institute maghatag og mga oportunidad alang daghang panalangin para sa mga young adult. Si Presidente Thomas S. Monson (1927–2018) misaad, “Samtang moapil mo sa institute ug makugihong magtuon sa kasulatan, molambo ang inyong gah[o]m sa paglikay sa tintasyon ug sa pagdawat og direks[i]yon sa Espiritu Santo sa tanan ninyong gibuhat.”2
Akong isubli pagsulti ug hatagan og gibug-aton kini nga gisaad nga mga panalangin sa institute gikan sa atong anhing minahal nga propeta. Ang akong makanunayon nga pakigbisog sa pagpaningkamot sa pagsagubang sa mga kausaban sa pagkahimong young adult nahimong mas sayon sa dihang ang akong pagpamatuod sa ebanghelyo nahimong mas lig-on. Ang pag-apil sa institute nakatabang kanako sa pagpalambo sa akong pagpamatuod, nga tinuoray nga nahimong akong taming sa paglikay sa mga tintasyon sa kalibotan, ug pinaagi sa makanunayon nga pagtuon sa kasulatan uban sa akong kauban nga mga young single adult, akong nakita kon sa unsang paagi ang institute usa gayod ka diosnon nga dinasig nga programa gikan sa atong Langitnong Amahan.