Ako Padayon nga Maningkamot

Imahe

man in a navy uniform

Litrato gihatag sa maayong kabubut-on sa tagsulat; ubang mga hulagway gikan sa Getty Images

Niadtong 1972, didto ko sa US Navy Boot camp sa San Diego, California, USA. Ako “nahagbong,” nga pasabot napakyas ko sa akong pagbansay—sa personal ug sa publiko. Sa pagkatinuod, nahagbong ko og kaduha. Karon nagsugod ko og bag-ong kompanya.

Nag-antos ko og attention deficit/hyperactivity disorder (ADHD) ug usa ka matang sa high-functioning autism [pagkawalay pagtagad sa ubang tawo]. Ang pagbasa lisod alang nako, nga nakaapikto sa akong mga grado. Dugang pa gayod sa kalisod, ang akong amahan namatay samtang didto ako sa boot camp.

Ang bugtong butang nga nakapahimo nako nga mobati og maayo mao ang pagtambong sa simbahan. Usa ka Dominggo, sa tunga-tunga sa akong pagpamatuod, mibati ko nga naaghat sa Espiritu Santo. Ang mga pulong nga akong gilitok dili akoa. Ang hinagawhaw, gamay nga tingog miabot kanako sa usa ka paghunghong, naggiya kanako sa unsay isulti.

“Nagtan-aw kamo sa usa ka recruit kinsa nahagbong og kaduha,” miingon ko. “Walay tawo nga gustong mapakyas, ug walay tawo nga gustong mapakyas og sunod-sunod sa duha ka higayon. Apan ang pagkahagbong dili ingon ka ngil-ad. Ang Navy wala mosulay sa pagdisiplina o pagsilot kanato. Ang pagkahagbong nakatabang sa usa ka recruit nga makat-on unsa ang wala pa niya nakat-oni o mahimong nakalimtan. Walay mahimong gradwasyon kon walay pag-usab o paglambo. Ako mopamatuod nga kitang tanan kinahanglan gayod mahagbong sa dili pa kita moabot sa atong labing dako nga kalamposan ug mga kalamposan sa kinabuhi.”

Ako wala maghunahuna og daghan mahitungod sa unsay akong isulti hangtod usa ka bulan ang milabay. Atol sa among sunod nga puasa ug miting sa pagpamatuod, usa ka buwagaw (blond hair) og buhok nga recruit miadto sa pulpito.

“Sa miagi nga bulan wala nakapasar ang akong grado. Mahagbong na ko,” miingon siya. “Ang akong komander sa pundok miingon nga ang labing maayo para nako mao ang hagbungon. Sa akong bag-o nga pundok, naghunahuna ko sa akong kaugalingon nga usa ka pakyas. Andam na ko nga moundang. Apan ako dayon nga nahinumdoman ang lalaki nga nahagbong og kaduha ug unsay iyang gisulti. Busa nagpadayon ko sa pagpaningkamot.”

Dayon ang recruit misubli sa samang mga pulong sa Espiritu Santo ug mibutang niini sa akong hunahuna. Adunay tawo nga akong gidasig ug gipalig-on nga karon nagdasig ug nagpalig-on kanako.

Niadtong Oktubre sa 1972, nagmaya ko sa dihang migradwar gikan sa US Naval boot camp mapasalamaton alang sa nakat-onan ug sa pagdasig gikan sa Espiritu Santo ug gikan sa isig ka recruit.