Dali, Sunod Kanako
Sakripisyo, usa ka Bunga sa Pagkamatarong
Ni Elder Adeyinka A. Ojediran
Sa Seventy
Ang ehemplo ni Abraham nagtudlo kanato nga kon atong unahon ang Ginoo, mosunod ang mga panalangin.
Abraham and Isaac [Abraham ug Isaac], ni Harold Copping, © Look and Learn / Bridgeman Images; bulawan nga utlanan gikan sa Getty Images
Sa dihang ako usa ka presidente sa branch sa Nigeria, usa ka batan-ong sister kinsa usa ka kinabig mipahayag sa iyang tinguha nga moserbisyo og misyon. Ang iyang amahan, dili miyembro sa Ang Simbahan ni Jesukristo sa mga Santos sa Ulahing mga Adlaw, kusganong misupak sa iyang plano. Gihisgotan sa among konseho sa branch ang sitwasyon. Nakahukom kami nga angay ra nga buhaton sa kapangulohan sa branch ang pagbisita sa iyang amahan.
Sa sinugdanan ang pagbisita dili malamposon hangtod nabati nako nga gidasig sa pagpaambit sa iyang amahan sa istorya sa kaandam ni Abraham sa pagsakripisyo sa iyang anak nga si Isaac, ingon nga gihulagway sa Genesis kapitulo 22. Si Abraham usa ka ehemplo sa pagsalig ug hugot nga pagtuo sa Dios. Bisan og si Isaac mao ang bugtong anak ni Abraham ug Sara, natawo sa dihang silang duha tigulang na, sa dihang ang Ginoo mihangyo og sakripisyo andam nga misunod si Abraham.
Sa dihang hapit na isakripisyo ni Abraham ang iyang anak, usa ka anghel ang nanginlabot. “Ayaw bakyawa ang imong kamot batok sa bata,” miingon siya, “o magbuhat kaniya sa bisan unsa kay karon akong naila nga ikaw nahadlok sa Dios, sa nakita nako nga walaikaw maghikaw sa imong bugtong nga anak ngari kanako”(Genesis 22:12). Ang pulong nga kahadlok niana nga bersikulo “mao ang pagbati og balaan nga pagtah[o]d ug kataha alang [sa Dios] ug sa pagsunod sa iyang mga sugo.”1
Usa ka Nahumok nga Kasingkasing
Natandog ang amahan pinaagi niini nga pahinumdom sa pagkamasulundon ni Abraham. Miingon siya nga wala gayod siya magdahom nga siya hangyoon sa pagbuhat og susama nga butang, bisan og dili susama og gidak-on. Misugot siya nga moserbisyo ang iyang anak nga babaye ug mosuporta kaniya sa pinansiyal nga paagi sulod sa 18 ka bulan.
Dungganon nga miserbisyo ang sister. Sa dihang mipauli siya, naminyo siya sa usa ka lalaki diha sa samang branch. Matinud-anon gihapon silang nagserbisyo sa Simbahan ug adunay tulo ka anak. Tanan sa iyang mga igsoon nahimong mga miyembro sa Simbahan. Ang iyang igsoon nga lalaki miserbisyo usab og misyon. Ug ang iyang kamanghoran nga babaye naminyo sa akong kamanghoran nga lalaki.
Kon maghandom ako mahitungod sa desisyon niini nga amahan, madasig ako. Gitugotan niya ang iyang kamagulangan nga anak, usa ka kinabig ngadto sa usa ka tinuohan nga lahi gikan sa iyaha, nga moserbisyo og misyon. Napahinumdoman usab ako sa mga panalangin nga nadawat sa iyang pamilya samtang dugang pa sa iyang mga anak ang nahimong mga miyembro sa Simbahan. Karon malipayon silang naminyo ngadto sa takos nga mga kapikas, nga matinud-anong nagsunod sa ebanghelyo ni Jesukristo. Ang amahan wala gayod mipasakop sa Simbahan, apan ang iyang sakripisyo seguradong, sama sa hugot nga pagtuo ni Abraham sa Dios, “giisip kaniya ingon nga pagkamatarong” (Genesis 15:6).
Usa ka Simbolo
Not My Will, but Thine, Be Done [Apan Dili ang Akong Pagbuot Maoy Matuman, kon Dili, ang Imo], ni Harry Anderson, sa maayong kabubut-on sa Pacific Press Publishing Association, Inc., dili mahimong kopyahan
Ang kaandam ni Abraham sa pagsakripisyo, sa pagkatinuod, “usa ka simbolo sa Dios ug sa iyang Bugtong Anak” (Jacob 4:5). Kini nga tsart nagpakita sa pipila ka pagkaparehas:
|
Jesukristo, Anak sa Dios |
Isaac, Anak ni Abraham |
|
Ang Dios naghulagway ni Jesukristo isip Iyang Hinigugmang Anak (tan-awa sa Mateo 3:17; Joseph Smith—Kasaysayan 1:17). |
Ang Dios naghulagway ni Isaac isip ang anak nga gihigugma ni Abraham (tan-awa sa Genesis 22:2). |
|
Ang Manluluwas mao ang Kordero sa Dios nga mokuha sa mga sala sa kalibotan (tan-awa sa Juan 1:29;1 Nephi 11:21, 33; Mosiah 14:7; Alma 7:14). |
Si Isaac usa ka karnero nga isakripisyo ni Abraham (tan-awa sa Genesis 22:7–8). |
|
Ang Dios mihatag sa Iyang Anak tungod sa Iyang gugma alang kanato (tan-awa sa Juan 3:16). |
Si Abraham andam nga mohatag sa iyang anak tungod sa iyang gugma sa Dios (tan-awa sa Genesis 22:12). |
|
Ang Manluluwas mao ang manununod sa trono sa Amahan (tan-awa sa Mga Taga-Roma 8:17; Mga Hebreo 1:2). |
Si Isaac mao ang manununod ni Abraham (tan-awa sa Genesis 15:4). |
|
Pinaagi ni Kristo, kita mga manununod sa gingharian (tan-awa sa Mga Taga-Roma 8:17; Mga Taga-Galacia 3:29). |
Pinaagi kang Isaac (o pinaagi sa mga pakigsaad), kita giisip nga binhi ni Abraham (tan-awa sa Genesis 21:12–13). |
|
Ang sakripisyo sa Ginoo gikinahanglan alang sa katubsanan. Pinaagi sa pagkamatinud-anon, mga ordinansa, ug mga pakigsaad, kita mamahimong sama Kaniya. |
Tungod sa mga saad nga gihimo ngadto kang Abraham ug Isaac, kita mamahimong mga anak sa pakigsaad, ang pinili sa Dios. |
Kon andam kita nga mosunod sa mga sugo sa Ginoo, mohimo kita og mga sakripisyo alang Kaniya. Kon atong buhaton, mas mobati kita sa Iyang makaabag nga gahom, nga motugot kanato nga makahupot sa kinabuhing dayon human nato mabuhat ang atong labing maayong mga paningkamot (tan-awa sa 2 Nephi 25:23; Moroni 7:25). Kon atong hangopon ang Pag-ula sa Manluluwas, molambo ang atong gugma alang Kaniya. Mobati kita og dugang nga kasuod ngadto Kaniya. Kini ang makapahimong posible alang kanato nga makabuhat sa tanan nga Iyang gikinahanglan kanato.
Usa ka Andam nga Sakripisyo
Ang mga kasulatan naghatag og daghang ehemplo niadtong kinsa andam nga misakripisyo ug dayon gihatagan og kusog sa Dios.
Si Amahan Lehi, sama pananglit, mibiya sa tanan aron moadto sa yutang saad. Dayon ang Dios mitabang sa mga anak nga lalaki ni Lehi sa pag-angkon sa mga palid nga tumbaga gikan kang Laban, mihatag sa Liahona aron sa paggiya kanila latas sa kamingawan, mipakita kang Nephi unsaon sa pagtukod og barko, ug mipanalipod sa iyang mga sakop sa pamilya samtang mitabok sila sa lawod (Tan-awa sa 1 Nephi 2–18.)
Si Alma ang Batan-on misakripisyo sa iyang posisyon isip labaw nga maghuhukom aron sa pagpahinungod sa iyang kaugalingon ngadto sa mas balaan nga calling sa halangdon nga pagkapari (tan-awa sa Alma 4:11–20). Siya dayon miestablisar “sa kapunongan sa simbahan” (Alma 6:4), naningkamot uban ni Amulek sa pagtudlo sa daghang kalag, ug mieskapo gikan sa bilanggoan pinaagi sa gahom sa Ginoo (tan-awa sa Alma 8–16).
Ang pagsakripisyo ni Alma sa usa ka posisyon aron motutok sa lain nagpahinumdom kanako sa akong kaugalingon nga kasinatian sa dihang gitawag ko isip usa ka Area Seventy. Wala madugay human ako gitawag, ang kompanya nga akong gitrabahoan gusto nga dawaton nako ang upat ka tuig nga buluhaton sa Europe. Ang buluhaton nagpasabot nga mobalhin, mao nga mibalibad ko. Ngadto niadtong nasorpresa sa akong desisyon, gipasabot nako nga wala ako tawaga sa Ginoo nga moserbisyo sa Africa West Area sa Abril unya moundang lamang ug moadto sa Europe inig ka Mayo. Nahinumdoman nako ang istorya sa Daang Tugon bahin ni Jonas (tan-awa sa Jonas 1–3). Nasayod ako nga gitawag ako sa Dios, ug dili nako biyaan ang akong calling.
Usa ka Mahinungdanon nga Butang sa Ebanghelyo
Ang sakripisyo usa ka bunga sa pagkamatarong. Nagkinahanglan kini sa pagbuntog sa kinaiyanhon nga tawo samtang motugyan kita ngadto sa mga pagdani sa Espiritu Santo (tan-awa sa Mosiah 3:19). Isip mga miyembro sa Simbahan, ania ang pipila ka sakripisyo nga makanunayon natong himoon.
Pagtuman sa balaod sa ikapulo. “Tan-awa, karon kini gitawag karong adlawa hangt[o]d sa pag-anhi sa Anak sa Tawo, ug sa pagkatinuod kini mao ang adlaw sa sakripisyo, ug ang adlaw alang sa ikapulo sa akong mga katawhan” (Doktrina ug mga Pakigsaad 64:23). Hunahunaa ang Ginoo nga nag-ingon kaninyo, “Karon Ako nasayod nga ikaw adunay balaan nga pagtahod sa Dios, tungod kay wala nimo gihikaw ang imong ikapulo.”
Pagtahod sa Igpapahulay. Isakripisyo nato ang atong kaugalingon nga mga gusto aron himoon ang Igpapahulay nga usa ka kalipay, ug Siya nagsaad og dagko nga mga panalangin ngadto niadtong kinsa motahod sa Igpapahulay (tan-awa sa Isaias 58:13–14). “Karon Ako nasayod nga ikaw adunay balaan nga pagtahod sa Dios, tungod kay gitahod nimo ang Igpapahulay.”
Misyonaryo nga pagserbisyo. Ang nagtubo nga henerasyon ba “dihadiha [makabiya sa] ilang mga pukot” (Mateo 4:20), o sa bisan unsang butang nga nagpugong kanila, ug mosunod sa Ginoo pinaagi sa pagserbisyo og misyon? “Karon Ako nasayod nga ikaw adunay balaan nga pagtahod sa Dios, tungod kay wala nimo gihikaw ang imong kaugalingon sa pagserbisyo og misyon.”
Pagdawat ug matinud-anong pagpalambo sa mga calling. Kon andam kita nga modawat og mga calling sa pagserbisyo sa Ginoo, magtinguha kita sa Iyang giya sa pagbuhat sa tanan kutob sa atong mahimo. “Karon Ako nasayod nga ikaw adunay balaan nga pagtahod sa Dios, tungod kay gibuhat nimo ang tanan nga gikinahanglan ug dugang pa.”
Pagserbisyo sa uban. Ang pagsakrispisyo sa atong panahon ug mga kapanguhaan sa pagpangalagad, pagbisita, pagsuporta, ug pagbayaw sa uban mohimo kanato nga tinuod nga mga disipulo ni Kristo. Ang paghimo sa buhat sa family history ug pagserbisyo sa templo maghatag og serbisyo ngadto niadtong anaa sa pikas nga bahin sa tabil. “Karon Ako nasayod nga ikaw adunay balaan nga pagtahod sa Dios, tungod kay nagserbisyo ka sa Iyang mga anak.”
Usa ka Pagpakita sa Gugma
Si Presidente M. Russell Ballard, Akting nga Presidente sa Korum sa Napulog Duha ka Apostoles, miingon: “Ang sakripisyo usa ka pagpakita sa tiunay nga gugma. Ang gidak-on sa atong gugma alang sa Ginoo, alang sa ebanghelyo, ug alang sa atong isigkatawo masukod pinaagi sa unsay atong andam nga isakripisyo alang kanila.”2
Kon kita walay ihikaw sa pagtuman sa mga mando sa Ginoo, molambo kita nga mahimong mas sama Kaniya, ug mahimo kitang Israel, sama sa gitudlo ni Presidente Russell M. Nelson. Nangutana siya: “Andam ba kamo nga ipatigbabaw ang Dios labaw sa tanan diha sa inyong kinabuhi. … Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo nga ipatuhop ang inyong kabubut-on ngadto sa Iyang kabubut-on?”3
Kon atong tugotan ang Dios nga mopatigbabaw sa atong mga kinabuhi, makita nato ang atong halad ngadto Kaniya isip usa ka pagpasalamat sa Iyang gugma. Makita nato ang pagserbisyo sa Iyang gingharian isip usa ka pribilehiyo, dili usa ka palas-anon. Ang sakripisyo mahimong sayon pinaagi sa hugot nga pagtuo sa Ginoo samtang maglipay kita sa Iyang matubsanong gugma.