Mga Istorya gikan sa Mga Santos, Volume 3
Paghupot sa Hugot nga Pagtuo sa panahon sa Gubat
Mga paghulagway pinaagi ni Greg Newbold
Si Nellie Middleton, usa ka singkwentay singko nga Santos sa Ulahing mga Adlaw, mipuyo sa Cheltenham uban ang iyang sayis anyos nga anak nga babaye, si Jennifer. Aron maandam ang iyang panimalay batok sa pagpamomba, migamit siya sa iyang igo-igong sweldo sa pagkamananahi aron masangkapan ang dapit sa iyang silong isip katagoan, hitsas sa pagkaon, tubig, lana sa mga lampara, ug usa ka gamayng puthaw nga higdaanan alang ni Jennifer. Nagsunod sa mga instruksiyon gikan sa gobyerno, gitaptapan usab ni Nellie ang iyang mga bintana gamit ang net aron pagsanta sa nanglupad nga mga tipaka sa bildo atol sa pag-atake.1
Karon, sa tibuok Cheltenham, nanagpanaghoy ang mga bomba diha sa kahanginan ug mopusgay ngadto sa yuta uban sa lanog kaayo nga dahunog. Ang makalilisang nga kabanha nag-anam og kaduol ngadto sa panimalay ni Nellie hangtod nga ang usa ka hilabihan ka sipa nga pagbuto sa duol nga karsada miuyog sa mga bongbong, mipusgay sa mga bintana ug napuno ang net sa mahait nga mga bildo.
Sa buntag, ang kadalanan sa siyudad nalukop sa ginuba. Ang mga bomba mihunos og baynte tres ka tawo ug nagbilin og kapin sa unom ka gatos nga walay kapuy-an.2
Si Nellie ug ang ubang Santos sa Cheltenham mibuhat sa ilang labing maayo sa paglahutay human sa pag-atake. Sa dihang ang presidente sa British Mission nga si Hugh B. Brown ug ang uban nga Amerikanong mga misyonaryo sa Amihanan mibiya hapit usa ka tuig nga mas sayo, ang gamay nga branch ug ubang sama niini nanglimbasog sa pagpuno sa mga calling ug sa pagpadagan sa mga programa sa Simbahan. Dayon ang lokal nga mga kalalakin-an migikan aron sa pagkiggubat, walay gibilin nga tighupot sa pagkapari nga mopanalangin sa sakramento o pormal nga mopahigayon sa buluhaton sa branch. Sa wala madugay, ang branch napugos sa pagbulag-bulag.
Usa ka mas tigulang nga lalaki nga ginganlan og Arthur Fletcher, kinsa naghupot sa Melchizedek nga Pagkapari, nagpuyo sa mga baynte ka milya ang gilay-on, ug siya misakay sa iyang tayaon nga bisikleta aron mobisita sa Cheltenhem nga mga Santos kon siya makahigayon. Apan sa kasagaran si Nellie, ang kanhi presidente sa Relief Society diha sa Branch sa Cheltenham, mao ang miako sa responsibilidad alang sa espirituwal ug temporal nga kaayohan sa mga Santos sa iyang dapit. Kay sirado man ang branch, ang mga miyembro sa Simbahan dili na makapundok diha sa giabangan nga hawanan nga ilang gigamit Madominggo, busa ang sala ni Nellie ang nahimong sala diin ang Relief Society nag-ampo, nanganta, ug nagtuon.3
Sa usa ka hilom nga gabii sa Nobyembre niadtong 1943, si Nellie Middleton nakadungog sa iyang doorbell nga mibagting. Mangitngit sa gawas, apan nasayod siya dili kinahanglan magpasiga og suga kon siya moabli sa pultahan. Dul-an sa tulo ka tuig ang milabay sukad ang mga bomba sa German unang nangahagbong duol sa iyang panimalay, ug si Nellie mipadayon sa pagpangitngit sa iyang mga bintana sa gabii aron mapabilin ang iyang kaugalingon ug ang iyang anak nga babaye nga luwas gikan sa mga pagpamomba.
Kay palong ang iyang mga suga, giablihan ni Nellie ang pultahan. Usa ka batan-ong lalaki nagbarog sa iyang bakanan [front step], ang iyang nawong nangitngitan. Siya mitunol sa iyang kamot ug sa hinay nga paagi mipaila sa iyang kaugalingon isip si Brother Ray Mermansen. Ang iyang tuno sa sinultihan [accent] dili ikalimod nga Amerikano.4
Kahilakon si Nellie tungod sa kalipay. Human nagkabulag ang branch, siya ug ang ubang kababayen-an sa Cheltenham nangandoy nga makaambit sa sakramento sa kanunay. Ang Estados Unidos bag-ohay lang nga mipadala og mga tropa ngadto sa England sa pagpangandam alang sa usa ka kaalyadong opensiba batok sa Nazi Germany. Sa higayon nga nakaamgo si Nellie nga pipila sa Amerikanong sundalo nga gidistino sa iyang lungsod lagmit mga Santos sa Ulahing mga Adlaw kinsa makapanalangin sa sakramento, gihangyo niya ang iyang hablos [stepsister], si Margaret, sa pagdibuho og usa ka hulagway sa Salt Lake Temple ug gibutang kini sa lungsod. Sa ubos sa hulagway mao ang usa ka mensahe: “Kon adunay sundalo nga interesado sa ibabaw, siya makakaplag og mainiton nga paghangop dihasa 13 Saint Paul’s Road.”5
Kini nga Amerikano nakakita sa iyang poster? Aduna ba kaha siyay awtoridad sa pagpanalangin sa sakramento? Si Nellie milamanokaniya ug maabi-abihon ngamipadayon kaniya.
Si Ray bayente anyos nga sundalo nga Santos sa Ulahing mga Adlaw gikan sa Utah ug usa ka priest sa Aaronic nga Pagkapari. Bisan og siya nakadestino mga 15 ka kilometro ang gilay-on, iyang nadunggan ang mahitungod sa deboho sa Salt Lake Temple gikan sa laing miyembro sa Simbahan ug nakapananghid sa pagbiya aronmobisita sa maong address. Naglakaw siya paingon sa panimalay ni Nellie, mao nga miabot siya nga ngitngit na. Sa dihang si Nellie misulti kaniya mahitungod sa iyang tinguha sa pag-ambit sa sakramento, nangutana siya kon kanus-a siya moanhi aron sa pagpahigayon sa ordinansa ngadto kaniya.
Pagka Nobyembre 21, si Nellie, iyang anak nga babaye, ug tulo pa ka babaye ang miabi-abi kang Ray ngadto sa ilang miting sa Dominggo. Si Nellie mibukas sa miting uban sa pag-ampo sa wala pa manganta ang pundok og “Unsa ka Dako sa Kaalam ug sa Gugma [How Great the Wisdom and the Love].” Dayon si Ray mipanalangin ug mipaambit sa sakramento, ug ang upat ka kababayen-an mipamatuod sa ebanghelyo.
Wala madugay ang ubang mga Santos sa Ulahing mga Adlaw nga mga sundalo nakadungog mahitungod sa mga miting didto sa Saint Paul’s Road. Sa ubang mga Dominggo, ang sala ni Nellie puno kaayo nga ang mga tawo manglingkod na sa hagdanan.6
Kung ang volume 3 imantala, usa ka kompleto nga lista sa mga buhat nga gikutlo mahimong maanaa diha sa saints.ChurchofJesusChrist.org.