E mata nō te hi’o

E mea au roa nā’u te ’ā’amu o te Faufa’a Tahito nō te hō’ē taure’are’a tei tāvini i te peropheta Elisaia. I te hō’ē po’ipo’i roa, ’ua ti’a mai ra te taure’are’a i ni’a, haere atura i rāpae, ’e ’ite atura i te ’oire tei hā’atihia e te hō’ē nu’u rahi nō te ha’amou ia rātou. Horo atura ’oia ia Elisaia ra : « ’Auē, e tā’u fatu ē, e aha tātou nei ? »

Pāhono a’era Elisaia, « ’eiaha e mataʻu, e rahi tō tātou e iti tō rātou ».

’Ua ’ite Elisaia ē, e’ita e nava’i ’ia tāmarū noa i te taure’are’a ; hina’aro ’oia i te hō’ē ’ōrama. Nō reira, « ’ua pure atura Elisaia… e Iehova… e fa’a’ara’ara ’oe i tōna mata ’ia ’ite ’oia. ’E ’ua fa’a’ara’ara a’era Iehova i te mata o taua taure’are’a ra, ’ite atu ra ’oia : ’E inaha, ’ua ’ī te mou’a i te pua’ahorofenua, ’e te pere’o’o auahi, i te hā’atira’a ia Elisaia ». ¹

E nehenehe ato’a ’outou i te tahi taime, mai te tāvini, e fifi ’ia ’ite ē, e mea nāhea te Atua i te ’ohipara’a i roto i tō ’outou orara’a—i te mau taime e mana’o ’outou ē, ’ua tāhiti roa ’outou—’ia fa’atūturi ana’e te mau tāmatara’a o te tāhuti nei ia ’outou. ’A tīa’i ’e ’a ti’aturi i te Atua ’e i tāna tārena taime, nō te mea, e nehenehe ’outou e ti’aturi i tōna ’ā’au ma tō ’outou ’ā’au ato’a. Tē vai ra rā te piti o te ha’api’ira’a i’ō nei. E au mau tuahine ’e te mau taea’e here, ’outou ato’a, e nehenehe ato’a ’outou e pure i te Fatu ’ia fa’a’ara’ara i tō ’outou mata ’ia ’ite ’outou i te mau mea ’o tē ’ore e ’itehia e ’outou.

Penei a’e, te mau mea faufa’a roa a’e nō tātou ’ia ’ite pāpū ’oia ho’i, ’o vai te Atua, ’e ’o vai mau tātou—e mau tamaiti ’e e mau tamāhine nā te mau metua mure ’ore, ma te « nātura hanahana ’e te haere’a mure ’ore ». ² ’A ani i te Atua ’ia heheu mai i teie mau parau mau ia ’outou, ’e tae noa atu i tōna mana’o nō ni’a ia ’outou. Rahi noa atu tō ’outou ’itera’a i tō ’outou ihota’ata mau ’e tā ’outou ’ōpuara’a mau, te hōhonura’a o tō ’outou vārua, rahi noa atu ’oia i te fa’auru i te mau mea ato’a i roto i tō ’outou orara’a.

Te hāro’aro’ara’a e mea nāhea te Atua ’ia hi’o ia tātou, e fa’aineine te reira i te rāve’a nō te tauturu ia tātou ’ia hi’o ia vetahi ’ē mai tāna e hi’o nei. ’Ua parau te ta’ata pāpa’i parau ’o David Brooks : « Rave rahi te mau fifi rarahi o tō tātou tōtaiete, tē tupu nei ïa nā roto mai i te mau ta’ata ’o tē feruri nei ē, ’aita rātou e hi’ohia nei ’e e ’itehia nei. Tē vai ra hō’ē mea faufa’a roa tei tītauhia ia tātou pā’āto’a ’ia ha’amaita’i, ’oia ho’i, te hi’o-māite-ra’a te tahi ’e te tahi, ’e te ’ite-rahi-ra’a-hia ». ³

Tē hi’o nei Iesu Mesia i te ta’ata ma te hōhonu. Tē hi’o nei ’oia i te ta’ata, tō rātou mau hina’aro, ’e ’o vai tā rātou e riro mai. ’Ua hi’o vetahi i te feiā tāi’a, te feiā rave hara, ’aore rā, te mau telona, ’ua hi’o Iesu i te mau pipi; ’ua hi’o vetahi i te hō’ē ta’ata tei uruhia i te demoni, ’ua hi’o Iesu i ’ō atu i te hepohepo, ’ua ’ite i te ta’ata, ’e ’ua fa’aora iāna. ⁴

Noa atu i roto i tō tātou orara’a ’ohipa roa, e nehenehe tātou e pe’e i te hi’ora’a ’o Iesu ’e ’ia hi’o i te ta’ata—tō rātou mau hina’aro, tō rātou fa’aro’o, tā rātou tauto’ora’a, ’e ’o vai tā rātou e riro mai. ⁵

’A pure ai au i te Fatu nō te fa’a’ara’ara i tō’u mata ’ia ’ite i te mau mea ’aita tā’u e nehenehe e ’ite mau, pinepine au i te ui iā’u iho e piti uira’a ’e ’ia ha’apa’o maita’i i te mau mana’o e tae mai : « E aha ta’u e rave nei ’o tā’u e ti’a ’ia fa’aea i te rave ? » ’e « E aha tā’u e ’ore nei e rave ’o tē ti’a iā’u e ha’amata i te rave ? » ⁶

Tau ’āva’e i ma’iri a’e nei, i te taime nō te ’ōro’a mo’a, ’ua ui au iā’u iho i teie mau uira’a, ’e ’ua māere au i te mana’o tei tae mai. « Fa’aea i te hi’o i tā ’oe niuniu ’ia tīa’i ana’e ’oe i roto i te mau rēni ’āna’ira’a ta’ata ». ’Ua riro te hi’ora’a i tā’u niuniu i roto i te rēni ’āna’ira’a ta’ata ’ei ’ohipa feruri ’ore; e taime maita’i te reira nō’u nō te rave e rave rahi mau ’ohipa, nō te hi’o i te rata uira, te mau rēni parau rarahi, ’aore rā, te mau mea i ni’a i te rēni tūreiara’a.

’Ia po’ipo’i a’e, tei roto vau i te hō’ē ’āna’ira’a ta’ata roa i te fare toa. Rave mai ra vau i tā’u niuniu ’e i muri iho, ha’amana’o a’era vau i te mana’o tā’u i fāri’i. Vaiiho a’era vau i tā’u niuniu ’e hi’ohi’o a’era ’ati a’e iā’u. ’Ite atura vau i te hō’ē rū’au i roto i te ’āna’ira’a, i mua iā’u. ’Aita i rahi te tauiha’a i roto i tāna pere’o’o tura’i, te tahi noa punu mā’a nā te mimi. ’Ua huru ’ē ri’i au, terā rā ’ua parau atu vau i te tahi mea māramarama mau mai teie, « tē ’ite nei au ē, e mimi tā ’oe ». ’Ua parau mai ’oia ē, tē fātata mai ra te hō’ē vero, ’e ’aita ’oia e hina’aro ’ia tupu mai te reira ’e ’aita e mā’a nā te mimi. ’Ua paraparau ri’i māua, ’e i muri iho, ’ua fāriu mai ’oia i ni’a iā’u ’e nā ’ō mai ra, « ’ua ’ite ’oe, ’aita vau i parau i te hō’ē ta’ata, terā rā, e mahana fānaura’a teie nō’u ». ’Ua putapū roa tō’u ’ā’au. ’Ua parau atu vau iāna ’ia ’oa’oa i tōna mahana fānaura’a, ’e ’ua pure au i roto iā’u iho nō te ha’amāuruuru i te mea ē, ’aita vau i ni’a i tā’u niuniu ’e ’aita i ma’iri i te hō’ē rāve’a nō te ’ite mau ’e nō te nati i te hō’ē ta’ata ’ē atu tei hina’aro i te reira.

Ma tō’u ’ā’au ato’a ’aita vau e hina’aro ’ia riro mai terā tahu’a ’aore rā, terā ta’ata ’āti levi i ni’a i te ’ē’a nō Ieriko—te ta’ata e hi’o noa ’e haere ’ē atu ai. ⁷ Pinepine roa rā vau i te feruri ē, mai terā vau.

’Aita i maoro a’e nei, ’ua ha’api’i mai au i te hō’ē ha’api’ira’a faufa’a roa nō ni’a i te hi’o-hōhonu-ra’a nā roto mai i te hō’ē tamāhine ’o Rozlyn te i’oa.

’Ua fa’ati’ahia mai teie ’ā’amu iā’u nā te hō’ē hoa tei ’ati roa ’a fa’aru’e mai ai tāna tāne e 20 matahiti iāna. E paura’a taime tō tāna mau tamari’i i rōpū i nā metua, riro atura te haerera’a i te purera’a ’ōna ana’e ’ei ’ohipa fifi rahi. ’Ua fa’ati’a ’oia :

« I roto i te hō’ē ’Ēkālesia tei ha’afaufa’a rahi i te ’utuāfare, e nehenehe te pārahira’a ’oia ana’e e riro ’ei mea ’oto roa. I taua sābati mātāmua ra, ’ua tomo vau i roto ma te pure ē, ’eiaha hō’ē ta’ata ’ia paraparau mai iā’u. E ’ere i te mea ’ōhie i te tāpe’ara’a i te roimata ’eiaha ’ia tahe mai. ’Ua pārahi au i te vāhi mātarohia e au, ma te ti’aturi ē, e’ita te ta’ata e ’ite i te ta’ata ’ore i ni’a i te pārahira’a.

« ’Ua fāriu mai te hō’ē tamāhine nō tā mātou pāroita -e ’ua hi’o mai iā’u. Fa’ahua ’ata atu ra vau. ’Ua ʼata ato’a mai ’oia. E nehenehe au e ’ite i te mana’o pe’ape’a i ni’a i tōna hōho’a mata. ’Ua tāparu marū noa atura vau ’eiaha ’oia e haere mai e paraparau iā’u—’aita tā’u e parau maita’i ’e ’ua ’ite au ē, e ta’i au. Hi’o fa’ahou atura vau i ni’a i tō’u nā turi, ma te ’ape i te hi’o i te ta’ata.

« I te roara’a o te hora i muri iho, ’ua ’ite au iāna ’ia hi’ohi’o mai iā’u i terā ’e terā taime. I te fa’aotira’a iho ā te purera’a, haere mai ra ’oia i iā’u ra. Muhumuhu atura vau ē, ‘’ia ora nā e Rozlyn’ Tauahi mai ra ’oia iā’u ’e nā ’ō mai ra, ‘’e te tuahine Smith, e nehenehe au e parau e mahana ’ino teie nō ’oe. ’Eiaha e ’ino’ino. ’Ua here au ia ’oe. Mai tei ferurihia, ’ua tahe mai te roimata ’a tauahi fa’ahou mai ai ’oia iā’u. ’A haere ’ē atu ai rā vau, feruri a’era vau ē, e nehenehe paha tā’u e rave i te reira’.

Hōho’a

Rozlyn ’e te tuahine Smith

« ’Ua ’ite mai teie tamāhine iti marū 16 matahiti, ’āfa ’āpī a’e iā’u, i te mau sābati ato’a nō te roara’a o te toe’a o te reira matahiti nō te tauahi mai iā’u ’e ’ia ani mai ē, e aha tō ’oe huru ?’ ’Ua fa’atupu te reira i te ta’a-’ē-ra’a mau i te mea tā’u i feruri ’a haere mai ai au i te purera’a. Te parau mau ’oia ho’i, ’ua ha’amata vau i te ti’aturi i ni’a i te reira mau tauahira’a. ’Ua ’ite mai te hō’ē ta’ata iā’u. ’Ua ’ite te hō’ē ta’ata ē, tei reira vau. Tē vai ra hō’ē ta’ata e tau’a mai ra ».