Digital Lamang: Mga Young Adult
3 ka Dali (ug Dili makahahadlok) nga mga Paagi sa Pagpaambit sa Ebanghelyo ngadto sa Uban
Kanunay kong mahadlok nga mopaambit sa ebanghelyo tungod sa kahadlok nga mabalibaran, apan pipila ka kasinatian nakatabang nako unsa diay kasayon kini.
Sa batan-on pa ko, kanunay kong mahadlok nga mopaambit sa ebanghelyo ngadto sa akong mga higala.
Apan dihang nadawat nako ang akong call nga magmisyon, ang tanan nakong higala sa eskwela nasayod nga moadto ko sa Espanya human sa gradwasyon, bisan kadaghanan nila wala masayod kon ngano. Mao nga gipahimuslan nako ang ilang mga pangutana aron masultihan sila og dugang mahitungod sa Basahon ni Mormon, kon unsay akong buhaton isip misyonaryo, ug mahitungod ni Jesukristo.
Misangpot kini sa pagpanghatag nako og lima ka kopya sa Basahon ni Mormon ngadto sa labing suod nakong mga higala ug gani sa pipila ka magtutudlo sa eskwelahan sa wala pa matapos ang tuig, ug bisan ang akong kasingkasing magbutokbutok sa kahadlok dihang ako mipaambit kanila, mibati ko og kahinam ug kalagsik gikan sa Espiritu human niana.
Kadto nga kasinatian nagpakita kanako nga ang pagpaambit sa atong mga pagpamatuod sa ebanghelyo ni Jesukristo dili angay nga pinugos o makahadlok o gani dili makahimuot. Sa pagkatinuod, dunay daghang paagi nga kita sa natural nga paagi makapaambit unsay naa sa atong kasingkasing kon naggikan kini sa atong gugma sa ebanghelyo, pinaagi man sa personal o sa virtual. Tungod kay “ang ebanghelyo ni Kristo … mao ang gah[o]m sa Dios alang sa kaluwasan” (Mga Taga-Roma 1:16), mahimo kamong masaligon, maisugon, ug mapaubsanon samtang mopaambit niini.
Aniay pipila ka ideya gikan sa akong mga kasinatian ug sa mga kasulatan nga nakatabang nako.
1. Magmatinuoron
Sa didto pa ko sa Barcelona sa akong misyon, ang akong kompanyon ug ako naglakaw subay sa gambalay sa simbahan dihang nakakita kami og usa ka batan-ong babaye nga naglakaw padulong namo. Gibati namo ang pag-aghat nga makig-istorya niya, mao nga gipahunong namo siya ug gipangutana kon nakakita na ba siya sa gambalay sa simbahan kaniadto. Among nahibaloan nga ang iyang ngalan si Maya (tanan nga ngalan giusab), ug gidapit nako siya sa pag-adto sa usa ka gabii nga dula nga among giplano kauban sa uban nga young adult sa mosunod nga Biyernes. Misugot siya.
Didto sa gabii nga dula, nahinumdoman gihapon nako kon sa unsang paagi si Maya ug Alicia, nga among higala kinsa bag-o lang nakabig, nga nagkinataw-anay. Si Alicia maayo kaayo nga higala ni Maya. Nangutana siya ni Maya mahitungod sa iyang pamilya, iyang mga ganahan, ug sa iyang mga gituohan sa iyang relihiyon ug nakatukod og paghigalaay uban ni Maya paglabay sa panahon. Nahibalo mi og dugang pa mahitungod sa kaagi ni Maya sa relihiyon ug sa iyang debosyon sa Dios, ug mipakita usab siya og interes sa pagkat-on og dugang kon sa unsang paagi kita makipagsulti sa Dios.
Paglabay sa panahon, dihang ang akong kompanyon ug ako, si Alicia, ug uban sa ward nakaila ni Maya ug padayon nga midapit niya ug sa pagpakita og gugma, mibati siya sa Espritu sa gipahiuli nga ebanghelyo ni Jesukristo ug nakahukom nga magpabunyag. Samtang among nahinumdoman ang pail[o]b ug inigsoon nga pagkamabination, (tan-awa sa Doktrina ug mga Pakigsaad 4:6), nasayod ko nga ang pagkamatinuoron sa paghigalaay nga nasinati ni Maya nakaimpluwensiya sa iyang desisyon.
2. Mag-ampo aron Mamatikdan ang Misyonaryo nga mga Oportunidad
Human nauli gikan sa akong misyon, mibalhin ko sa akong balay sa Guatemala ug misugod sa pag-eskuwela sa Brigham Young University sa Utah, USA. Nasubo ko og naluya og gamay nga mobalhin sa dapit diin ingon og ako wala kaayoy daghang oportunidad nga makapaambit sa ebanghelyo. Mao nga ako nag-ampo sa matinguhaong paagi aron makakita og tawo kinsa nagkinahanglan nga makadungog sa kamatuoran.
Human sa pipila ka semana, ako naglakaw human sa pagsimba ug nakakita og taas nga tawo nga nagtan-aw sa mga poster sa campus. Diha dayon mibati ko nga kinahanglan kong makig-istorya niya. Nakulbaan ko tungod kay nagbansay pa ko sa akong Iningles ug walay ideya unsay isulti. Gilabyan nako siya apan dayon mibalik ko ug mipaila sa akong kaugalingon, misalig sa Langitnong Amahan nga motabang nako (tan-awa sa Doktrina ug mga Pakigsaad 100:5–6).
Duna mi nindot nga pagsultihanay, ug giingnan ko niya nga dili siya miyembro sa Simbahan apan estudyante siya ug naganahan kaayo siya sa serbisyo nga gihimo sa mga tawo sa Simbahan. Dili ko makatuo nga nakig-istorya ko og usa ka dili miyembro sa campus sa BYU! Naghinatagay mi og numero sa telepono, ug sa kataposan napaila-ila nako siya sa mas daghang miyembro sa Simbahan ug mitabang kaniya nga makat-on og dugang sa ebanghelyo.
Ang maong tawo wala mopasakop sa Simbahan, apan pinaagi niana nga kasinatian nakakat-on ko nga kon magtinguha kita sa pagpanalangin sa kinabuhui sa ubang mga tawo, ang Dios motabang nato nga makakuha og mga oportunidad sa atong tibuok palibot (tan-awa sa Doktrina ug mga Pakigsaad 4:3). Mao nga karon dili ko mag-ampo alang sa misyonaryo nga mga oportunidad—mag-ampo ko nga makabaton og mga mata nga makakita sa misyonaryo nga mga oportunidad nga anaa sa akong atobangan.
3. Mopakita sa Hingpit nga Gugma ni Kristo ngadto sa Uban
Dihang magminyo na ko, si Maria, usa ka suod nako nga sakop sa akong pamilya, mibisita nako. Kaniadto si Maria mihukom nga mobiya sa Simbahan aron ipadayon ang usa ka relasyon sa laing babaye. Wala ko mouyon sa iyang tanan nga pagpili, apan gihigugma nako si Maria ug gitahod ang iyang kabubut-on, mao nga gipaningkamotan nako nga mapadayon ang maayo nga relasyon kaniya.
Dihang si Maria ug si Kristen mibisita, duna koy oportunidad nga makahatag nilang duha og panalangin sa pagkapari, kay sila nagpangita og giya nga makalatas sa mga panglimbasog sa ilang kinabuhi. Ang Manluluwas sa kanunay motubag sa hugot nga pagtuo niadtong kinsa mga anaa gawas sa pakigsaad o wala magtuman sa Iyang mga sugo (tan-awa sa Mateo 8:5–13; Marcos 7:24–30; Lucas 7:36–50). Mao nga bisan og dili ko sigurado kon unsay akong isulti, nag-ilis ko ug nangandam nga matugotan ang gahom sa Dios nga modagayday pinaagi kanako.
Atol sa mga panalangin, mibati ko nga mopaambit og piho nga tambag kang Maria ug ni Kristen ug sa paghimo og piho nga mga saad. Wala gyod ko makalimot sa kusog nga Espiritu nga gibati namong tanan. Mituo ko nga kini nakausab sa tanan kanamo ngadto sa mas maayo.
Tungod sa among gugma sa usag usa, makapaambit ko og mga pagbati mahitungod sa ebanghelyo ngadto ni Maria sa paagi nga wala siya maabi-abi sa uban. Ang gugma mopasarang kanato sa paghimo sa Iyang buhat pinaagi sa pag-abli sa mga pultahan nga mopaambit sa ebanghelyo ug pagdapit sa Iyang tabang diha sa atong mga paningkamot (tan-awa sa Doktrina ug mga Pakigsaad 4:5). Diha sa hingpit nga gugma, ang Manluluwas mipaambit og mga kamatuoran uban sa babaye sa may atabay, bisan og siya nakasala ug usa ka Samarianhon (see Juan 4). Mibati siya sa gugma ug mga kamatuoran nga Iyang gipaambit ngadto niya ug siya nausab sa kahangtoran pinaagi sa Iyang mensahe.
Ug bisan ang atong mga pagdapit nga magpakabuhi sa ebanghelyo wala dawata, ang pagpaambit sa gugma sa Dios ngadto sa uban makahimo gihapon og malungtaron nga kalainan sa ilang kinabuhi.
Makabaton kita og Kaisog Kon Magtabang sa Uban nga Moadto padulong ni Kristo
Mahitungod sa misyonaryo nga buhat, si Elder Dieter F. Uchtdorf sa Korum sa Napulog Duha ka Apostoles mitudlo:
“Salig sa Ginoo nga mahitabo ang Iyang mga milagro. Sabta nga dili inyong trabaho ang pagkabig sa mga tawo. Mao kana ang tahas sa Espiritu Santo. Inyong tahas ang pagpakigbahin kon unsa ang anaa sa inyong kasingkasing ug ang pagpuyo sumala sa inyong gituohan.
“Busa dili mo kinahanglang maluya kon ang tawo dili dayon modawat sa mensahe sa ebanghelyo. …
“Tali ra kana sa indibidwal ug sa Langitnong Amahan.
“Ang inyo mao ang paghigugma sa Dios ug sa inyong silingan, nga Iyang mga anak.
“Tuohi, higugmaa, buhata.
“Sunda kini nga dalan, ug ang Dios mobuhat og mga milagro pinaagi kanimo sa pagpanalangin sa Iyang bililhong mga anak.”1
Kon ang atong gugma alang sa uban mas dako kay sa atong kahadlok nga balibaran, kita makakita sa matahom nga mga panalangin ni Kristo nga gibukhad samtang maningkamot kita sa pagpundok sa Israel. Ang pagbugto niana nga mga babag nga anaa kanako isip tin-edyer nakatabang nako sa pag-establisar og usa ka lig-ong pagpamatuod bahin sa kaimportante sa misyonaryo nga buhat sa akong kinabuhi. Makadapit kita sa uban nga makaduol ngadto kang Kristo pinaagi sa natural, ginagmay, ug sa yano nga mga paagi, ilabi na sa pag-ilaila kanila, pagtanyag og tabang, ug paghigugma kanila.
Dili tanan nga akong mga paningkamot sa pagpaambit kon unsay naa sa akong kasingkasing ang misangpot sa pagkakabig, apan akong namatikdan nga kon ako aduna niana nga kaisog sa pagpaambit sa ebanghelyo, nagtabang ako sa uban nga mas mapaduol kang Kristo, ug ako usab mag-uswag padulong sa unahan sa akong kaugalingon nga panaw sa dalan sa pakigsaad. Human sa tanan, makakaplag kita og dako nga kalipay ug mga panalangin kon maningkamot kita nga mahisama ni Jesus ug modala sa uban ngadto Kaniya.