“Mopili Ko nga Maminaw Kaniya,” Liahona, Mar. 2022.
Mga Tingog sa mga Santos sa Ulahing mga Adlaw: Kababayen-an nga may Hugot nga Pagtuo
Mopili Ko nga Maminaw Kaniya
Sa dihang mihisgot og cake ang usa ka sister atol sa iyang pagpamatuod, mihangad ako ug misugod sa pagpaminaw og maayo.
Natawo ako sa Simbahan, mao nga nakatambong ako sa Primary ug sa mga kalihokan sa kabatan-onan. Nalingaw ako sa Primary tungod sa mga awit ug sa mga leksiyon.
Apan, isip usa ka tin-edyer misugod ako sa pagkawala human ako mibalhin ngadto sa usa ka bag-o nga ward. Mitambong ko sa mga kalihokan sa kabatan-onan sa kasagarang mga semana, apan dili ko makighalubilo ug dili kaayo mosalmot. Wala ko naganahi sa pagsimba sa Dominggo, apan mitambong ko panagsa. Nakaamgo ko nga wala gayod ko nakabig ngadto sa ebanghelyo ug sa mga pagtulun-an niini. Wala ko makabaton og akong kaugalingon nga pagpamatuod.
Sama sa naandan atol sa usa ka miting sa pagpuasa ug pagpamatuod, ang akong hunahuna naglatagaw. Wala gayod ko naminaw samtang ang mga miyembro sa ward mipaambit sa ilang mga pagpamatuod, apan miingon ako og amen sa kataposan sa matag pagpamatuod. Dayon miadto sa pulpito ang usa ka sister ug nagsugod sa pagpaambit sa iyang pagpamatuod. Sa dihang siya mihisgot og cake, mihangad ako ug misugod sa pagpaminaw og maayo.
“Kanunay akong makigsulti ngadto sa Langitnong Amahan, bisan kon mag-bake ako og cake,” miingon siya. “Moingon ako og mubo nga pag-ampo nga ang cake motubo ug maluto og maayo. Nasayod ako nga Siya motubag sa atong mga pag-ampo.”
Wala kaayo ko naghunahuna mahitungod niana nga pagpamatuod hangtod ang among sakyananan dili moandar sa dihang gikinahanglan namo nga moadto sa tindahan aron mopalit og pipila ka pagkaon. Nianang higayona nahinumdoman nako ang mga pulong sa sister. Mao nga, mibalik ako sa akong kwarto aron mohangyo sa Dios nga tabangan kami aron moandar ang sakyanan. Miluhod ako ug nag-ampo. Sa dihang nahuman ko, gikuha nako ang mga yawe sa sakyanan ug gisulod kini sa yawehanan. Ug dayon miabot ang tubag sa akong pag-ampo—ang tingog sa pag-andar sa sakyanan.
Tungod niana nga tubag sa usa ka yano nga pag-ampo, miuswag ako gikan sa pagkahapit nga nawala nganha sa usa ka dalan nga mitabang kanako nga makaangkon og personal nga pagpamatuod ug nahimong mas hingpit nga nakabig ngadto sa ebanghelyo. Ang mga pulong sa akong paborito nga awit sa Primary, “Gibati Ko ang Gugma sa Akong Manluluwas,”1 nahimong labaw pa kay sa mga pulong lamang sa usa ka awit. Nahimo kini nga mga pagbati nga aduna gayod ako.
Nag-ampo na ako karon mahitungod sa tanang butang. Ug bisan ang tubag o ang pagkatukma sa panahon dili kanunay nga maoy akong gitinguha, mopili gihapon ko nga maminaw Kaniya samtang hinumdoman nako ang mga pulong ni Nephi: “Apan tan-awa, ako moingon nganha kaninyo nga kamo kinahanglan gay[o]d nga mag-ampo sa kanunay, ug dili mawad-an sa pagla[o]m” (2 Nephi 32:9).