Giunsa sa Ginoo Sa Pagpadali sa Iyang Buhat—Pinaagi sa Social Media

Imahe

misyonaryo nga mga sister nagtudlo

Gilitratohan ni Mindy Selu

Sa akong tibuok dekada nga panginabuhi sa paghimo og sulod sa video, akong nakita ang gahom nga makahimo sa pagkonektar sa internet pinaagi sa nagkadaiyang mga kasakangkapan. Sukad nga ang pagpanuktok og pultahan dili na opsiyon atol sa pandemya, daghang mga misyonaryo nahatagan og smartphone aron makakonektar sa mga tawo kinsa wala unta silay kahigayonan nga makahimamat sa laing paagi. Ug daghang misyon usab karon adunay nagpahinungod nga mga managkompanyon nga nagserbisyo isip social media o mga tech specialist, nagtabang sa pagpadagan sa Facebook page sa misyon, naghimo og mga sulod sa social media, naghimo og mga pahinumdom [ads] sa ComeuntoChrist.org, ug nagkontrolar sa badyet nga gigamit ngadto sa mga pahinumdom.

Si Elder Elias Magallanes sa Argentina Córdoba Mission miingon nga tungod sa teknolohiya, siya ug ang iyang mga kompanyon nakatudlo og mas daghang mga tawo, “Ako nagtuo nga daghang mga tawo ang napanalanginan, salamat niini nga pandemya kay nakakat-on sila bahin sa ebanghelyo.”

Si Sister Colby Sinclair, usa sa duha ka espesyalista sa social media sa Temple Square Mission, midugang nga ang iyang misyon nakadangat sa daghan pang katawhan gamit sa mga video niini. “Kami migahin tingali og mga 15 ka oras sa video nga among gihimo, apan nakahimo kami sa pagpadangat niini sa 15,000 ka tawo! Kasagaran kami adunay usa ka leksiyon sa matag usa niadtong 15,000 ka tawo, ug kini mokabat og 15,000 ka oras.”

Apan bisan sa mga benepisyo sa pagpaambit sa ebanghelyo sa internet, adunay pipila ka pagsulay ug sayop aron makit-an ang labing maayong mga pamaagi sa pagbuhat niini.

Miingon si Elder Magallanes: “Kon ang tanan nga misyonaryo mobiya ug ang Argentine nga mga misyonaryo lang ang ania dinhi, walay usa nga nasayod kon unsaon sa paggamit ang mga smartphone. Kinahanglan makat-on kami pinaagi sa pagbansay ug pagdiskobre kon unsaon sa paggamit sa mga butang alang sa among kaugalingon.”

Ang mga misyonaryo sa France Paris Mission nakat-on nga unsa ang labing maayo alang kanila mao ang pagpost mahitungod sa mga hilisgotan nga may kalabotan sa: kalinaw, kalipay, hugot nga pagtuo, ug pagpasalamat. Miingon si Sister Olivia Jackson: “Ang misyonaryo nga buhat walay kinutuban. Adunay daghan kaayong nagkalailaing paagi sa pagdapit ug pagpaambit sa Kahayag ni Kristo.”

Si Sister Emily Webber sa Temple Square Mission wala mobati nga kwalipikado sa paghimo og sulod [content] alang sa iyang misyon, apan siya nakakat-on kon kita mosalig sa Ginoo, Siya motabang kanato sa paggamit sa atong mga abilidad sa pagtuman sa Iyang buhat. “Ako nasayod nga ang Dios mitabang sa pagpalambo sa matag abilidad nga anaa nako nga makahimo sa pagbuhat niini. Mas nakita nako ang impluwensiya sa Ginoo samtang naghimo kami niining sulod.”

Sa wala pa mibiya si Elder Ethan Glines sa iyang misyon ngadto sa Consepcion, Chile, siya naghunahuna nga ang iyang mga talento sa pag-edit og video lagmit magpundo ra sulod sa duha ka tuig. Apan sa dihang siya nabalhin pagdistino atol sa pandemya ngadto sa Omaha, Nebraska, USA, ang iyang presidente sa misyon mihangyo kaniya sa pagdala sa iyang kahimanan sa camera aron sa paghimo og sulod sa social media alang sa misyon. Sa dihang si Elder Glines mibalik ngadto sa Chile, siya nakahimo sa pagpadayon gamit ang iyang mga talento sa pag-edit og video pinaagi sa iyang buluhaton sa bag-ong katungdanan sa social media specialist. Gitan-aw ni Elder Glines kini isip laing saksi nga ang Dios tinuod gayod nga anaa sa detalye sa atong mga kinabuhi ug “gusto nga kita mogamit sa atong mga talento tungod kay Siya mihatag sa atong mga talento.” Ang mga misyonaryo sa tibuok kalibotan naggamit sa ilang mga kahanas sa pagpadayon sa buhat sa Ginoo.

Imahe

mga kamot naggunit og usa ka cell phone

Si Elder David A. Bednar sa Korum sa Napulog Duha ka Apostoles miingon, “Isip mga disipulo ang atong katuyoan mao ang paggamit sa social media isip paagi sa pagpakita sa kahayag ug kamatuoran sa gipahiuli nga ebanghelyo ni Jesukristo ngadto sa kalib[o]tan nga nagkangitngit ug nagkalibog.”²

Kini alang kanatong tanan: magserbisyo man kamo sa misyon o dili, kon kamo dugay nang miyembro o usa ka kinabig, ang inyong pagpamatuod sa Manluluwas makahimo og epekto sa usa ka tawo. Ug oo, ang pagpaambit sa ebanghelyo sa social media mahimong makahulga o makahadlok, apan ang inyong pagpamatuod, bisan unsa ka yano, gikinahanglan.

Miingon si Sister Lucy Collins, kinsa miserbisyo sa Mormon Battalion Historic Site: “Kon kamo adunay hunahuna sa pagpaambit og usa ka butang diha sa social media kalabot sa ebanghelyo o usa ka mensahe sa paglaom o kalinaw o kalig-on, ipaambit kini! Unsa kadaghan ang mga higayon nga kamo nakatambong sa miting sa pagpamatuod diin kamo naglingkod didto ug adunay tawo nga mipaambit sa ilang pagpamatuod ug kamo nakaingon nga, ‘Wow, alang kadto kanako karon’? Ingon niana gihapon alang sa pagpost sa inyong mga hunahuna mahitungod sa ebanghelyo ni Jesukristo, tungod kay adunay tawo sa gawas nga nagkinahanglan niini. Busa buhata lang kini!”

Ang inyong pagpamatuod dili kinahanglan nga taas o maayo kaayo ang pagkahimo aron mo-epekto sa uban. Makasunod kamo sa Espiritu sa pagpaambit og usa ka yano, tim-os nga pagpamatuod diha sa normal ug natural nga mga paagi. Aniay pipila ka ideya aron kamo makasugod:

• Magpost og usab o mopaambit og sulod [content] gikan sa mga account sa Simbahan ngadto sa imong personal nga account.

• Modapit sa uban sa pag-apil kanimo sa ward o kalihokan sa institute.

• Pagmamugnaon! Gamita ang inyong gasa ug mga talento sa paghimo og sulod nga nakasentro sa ebanghelyo.

• Pangutana sa inyong lokal nga misyonaryo unsa nga kapanguhaan ang ilang gigamit ug kon unsaon ninyo nga makaapil.

Kon ang mga miyembro dili mahadlok sa pagpaambit sa ilang yano nga mga pagpamatuod, kini makatandog og daghang mga kasingkasing.

Pipila ka tuig ang milabay, naghimo ko og usa ka video nga ikauban sa kampanya sa Dan-agi ang Kalibotan sa Pasko nga nakakuha og kapin sa 2.5 milyon ka mitan-aw [view]. Naghunahuna ko, “Butangan ba kaha nako og usa ka kasulatan diha sa kataposan? O mohatag sa mga tawo og usa ka hagit nga mabunyagan? Akoa ba kining katungdanan sa pagpahinungod sa akong YouTube nga channel ngadto sa misyonaryo nga buhat?”

Nanglimbasog gayod ako sa kataposan nga pangutana. Daghan na ang mga tawo nga akong naabot karon kaysa nag-unang mga misyonaryo ug sa nag-unang mga pioneer nga ilang gipangandoy! Busa miadto ko sa templo dala kining pangutana, andam alang sa bisan unsa nga tubag nga akong makuha.

Ug ang tubag nga miabot mao nga, “Buhata ang imong pagpangalagad, ug buhata ang imong calling.”

Nakaamgo ko nga si Jesukristo wala nagkinahanglan kanako nga mobunyag sa tanan sa akong mga tig-subscribe. Siya nagkinahanglan nga akong tutokan ang pagserbisyo sa mga tawo sa akong palibot.

Ang paghimo og sulod mao lang ang usa ka aspeto sa pagpaambit sa ebanghelyo ni Jesukristo. Ang pipila sa labing epektibo nga paggamit sa pagpaambit sa ebanghelyo mao ang pinaagi sa social media nga modangat ngadto sa inyong kaila, motubag diha sa seksiyon sa komentaryo, o magpadala og direkta nga mga mensahe.

Dili importante kon pila ka view o likes ang nakuha sa video. Dili importante kon kamo adunay 2.5 milyon ka sumusunod o 25. Ang labing importante nga butang mao ang pagkonektar ngadto sa usa ka tawo, pagpangalagad ngadto sa usa ka tawo. Sama lang sa gibuhat sa Manluluwas.

Ang mga misyonaryo karon nagdala sa buhat sa kaluwasan ngadto sa matag suok sa yuta—o sa labing minos kutob sa maabot sa koneksiyon sa internet—ug kita makahimo sa samang butang. Makapaambit kita sa atong yano nga pagpamatuod, kita makahimo og sulod nga mobayaw ug modasig sa uban, ug kita makatabang ngadto sa usa ka tawo.